އޭ ލެވެލް އިމްތިހާނުގެ ނަތީޖާ ދޫކުރަން ފަށައިފިއެވެ.

ޑިޕާޓްމެންޓު އޮފް ޕަބްލިކް އެގްޒަމިނޭޝަނުން މިއަދު ބުނީ، މިދިޔަ އަހަރުގެ އޮކްޓޫބަރު/ނޮވެންބަރުގައި ބޭއްވުނު އެޑެކްސެލް އޭލެވެލް އިމްތިހާނުގެ ސްޓޭޓްމަންޓް އޮފް ރިޒަލްޓް މިއަދުން ފެށިގެން ސެންޓަރުތަކުން ދޫކުރަމުން ގެންދާނެ ކަމަށެވެ. އެގޮތުން ނަތީޖާ ދޫކުރާނީ އެދަރިވަރު އިމްތިހާނު ހެދި ސެންޓަރުން ކަމަށް ވެސް ޑީޕީއީން ވަނީ ބުނެފައެވެ.

2021 އޮކްޓޫބަރ/ނޮވެންބަރގައި ބޭއްވުނު އެޑެކްސެލް އޭލެވެލް އިމްތިޙާނުގެ ސްޓޭޓްމަންޓް އޮފް ރިޒަލްޓް 2022 ޖަނަވަރީ 13 އިން ފެށިގެން ސެންޓަރުތަކުން ދޫކުރަމުން ގެންދާނެ ވާހަކަ ދަންނަވާލަމެވެ.

ޝުކުރިއްޔާ

— Department of Public Examinations (@dpemv) January 13, 2022

މިދިޔަ އަހަރު މޭ/ޖޫން މަހު ބޭއްވުމަށް މަސައްކަތްކުރި އޭލެވަލް އިމްތިޙާނުގެ ޕޭޕަރުތައް ލީކްވުމާ ގުޅިގެން ސަރުކާރުން ވަނީ އިމްތިޙާން ކެންސަލްކޮށް ދަރިވަރުންނަށް ދެ އޮޕްޝަނެއް ދީފައެވެ.

އެގޮތުން ފުރަތަމަ ގޮތަކީ އޮކްޓޯބަރ / ނޮވެމްބަރ ގައި ބޭއްވި އޭލެވަލް އިމްތިޙާނުގައި ބައިވެރިވުން ކަމަށާއި، ދެވަނަ ގޮތަކީ ސްކޫލްތަކުންދޭ ޓީޗަރ ބޭސްޑް އެސެސްމަންޓް ހެދުން ކަމަށް މިނިސްޓްރީން އޭރު މަޢުލޫމާތު ދެއްވިއެވެ. އަދި ޓީޗަރ ބޭސްޑް އެސެސްމަންޓަށް އެޑެކްސެލް އިން މާރކްސް ދޭނެ ކަމަށް އެޑިއުކޭޝަނުން ބުނެފައި ވެއެވެ.

2021 ވަނަ އަހަރު އޭލެވެލް އިމްތިހާނު 2،700 ދަރިވަރުން ހަދާފައިވާ އިރު، 14 ސްކޫލަކުން 74 ދަރިވަރަކު ޓީޗާ ބޭސްޑު އެސެސްމަންޓު ވަނީ ފުރިހަމަ ކޮށްފައެވެ.