ށ. ދިގުވެލިދޫގައި އެއާޕޯޓެއް އަޅަން ކުރީގެ ރައީސް ޢަބްދުالله ޔާމީން ވައުދުވެވަޑައިގެންފިއެވެ.

ކޮމަންޑޫ ދާއިރާގެ ބައި- އިލެކްޝަންގައި ޕީޕީއެމްގެ ފަރާތުން ވާދަކުރައްވާ ކެންޑިޑޭޓު މޫސާ ފަތުޙީ އަށް ތާޢީދު ހޯއްދެވުމަށް އެދާއިރާގެ ކޮމަންޑޫގައި މިއަދު ހަވީރު ބޭއްވި ޖަލްސާގައި ރައީސް ޔާމީން ވަނީ މިއީ 2023ގެ އިންތިޚާބުގެ ފުރަތަމަ ފިޔަވަޅުކަމަށް ވިދާޅުވެ ގިނަ ވަޢުދުތަކެއް ވެވަޑައިގެންފައެވެ.

ރައީސް ޔާމީން ވިދާޅުވީ ޕީޕީއެމްގެ ސަރުކާރުން ށ. ދިގުވެލިދޫގައި އެއާޕޯޓެއް އަޅައި އެ އަތޮޅުގެ ރައްޔިތުންނަށް ހަދިޔާ ކުރާނެ ކަމަށެވެ. އޭގެ އިތުރުން އެދާއިރާގެ ރައްޔިތުންނަށް ބޭނުންވާ ބޯހިޔާވަހިކަންވެސް ޙައްލު ކުރަށްވާނެ ކަމަށާއި ށ. ކީކިމިނި މަސްފެކްޓްރީ ވެސް ޕީޕީއެމްގެ ސަރުކާރެއްގައި އިތުރަށް ތަރައްޤީ ކުރަށްވާނެ ކަމަށް ރައީސް ޔާމީން މިއަދު ވިދާޅުވި އެވެ.

މިއަދުގެ ޖަލްސާގައި ރައީސް ޔާމީން ވަނީ އިންޑިއާ އައުޓް ޙަރަކާތުގައި ސަރުކާރު ކޯލިޝަންގެ ޕާޓީތަކުން ބައިވެރިނުވާތީ އެ ޕާޓީތަކުގެ ލީޑަރުންނަށްވެސް ފާޑުވިދާޅުވެފައެވެ.

ރައީސް ޔާމީން ށ އަތޮޅުގެ ރައްޔިތުންނަށް ގިނަ ވަޢުދުތަކެއް ވެވަޑައިގެންފައިވާއިރު ރައީސް ޞާލިޙްވެސް ވަނީ ކޮމަންޑޫ ދާއިރާއަށް ވަޑައިގެން އެ ދާއިރާގެ ރައްޔިތުންނަށް ގިނަ ވަޢުދުތަކެއް ވެވަޑައިގެންފައެވެ. އަދި އޭގެ ތެރެއިން ބައެއް ވަޢުދުތަކުގެ ޢަމަލީ މަސައްކަތް ސަރުކާރުން މިހާރުވަނީ ފަށާފައެވެ.

އިންތިޚާބާ ދިމާކޮށް ހިންގާ މަޝްރޫޢުތަކަކީ ނުފޫޒު ފޯރުވުމުގެ ޢަމަލުތަކެއް ކަމަށް އިދިކޮޅު ޕާޓީތަކުން ބުނި ނަމަވެސް އިލެކްޝަން ކޮމިޝަނުން ބުނެފައިވަނީ މެނިފެސްޓޯގައި ހިމެނޭ ކަމެއްނަމަ އެކަމެއް މި ދުވަސްވަރުވެސް ކުރިއަށް ގެންދެވޭނެ ކަމަށެވެ.