ރާއްޖޭގެ ސްކޫލްތަކުގެ ދެވަނަ ޓާމްގެ ކިޔެވުން މިއަދު ހެނދުނު ފަށައިފި އެވެ.

ފުރަތަމަ ޓާރމްގެ ބަންދަށް ލިބުނު 21 ދުވަހަށް ފަހު ސްކޫލްތަކުގެ ދެ ވަނަ ޓާމްގެ ކިޔެވުން މިއަދު ހެނދުނު 6:45 ގައި ފަށާފައިވާއިރު މާލޭގައި ގްރޭޑް އަށަކުން ފެށިގެން ތިރީގެ ދަރިވަރުން ސްކޫލަށް ދާނީ ހަފްތާއަކު ދެ ދުވަހެވެ. އޭގެ އިތުރުން އަރަބިއްޔާ ސްކޫލްގެ ދަރިވަރުން ވަގުތީ ސްކޫލެއްގެ ގޮތުގައި މިއަދުންފެށިގެން ބޭނުން ކުރާނީ ކުރީގެ ފޮރިން މިނިސްޓްރީ ހިންގި އިމާރާތެވެ.

މީގެ އިތުރުން ވ. ތިނަދޫ އާއި ބ. ފެހެންދޫގައި ސަރުކާރުން ޤާއިމުކުރި ސެޓެލައިޓް ސްކޫލްތަކުގެ ކިޔެވުންވެސް މިއަދު ވަނީ ފަށާފައެވެ. ސެޓެލައިޓް ސްކޫލްތަކުގައި ކިޔަވައިދިނުން ކުރިއަށް ގެންދާނީ ދަރިވަރުންނާއި މުދައްރިސުން ޙާޟިރުވެތިބެ ވީޑިއޯ މެދުވެރިކޮށް ހުރަވީ ސްކޫލާއި ގުޅުވާލައިގެންނެވެ.

ތަޢުލީމީ ވުޒާރާއިން އަންގަވާފައި ވަނީ ސްކޫލްގެ ހުރިހާ ހަރަކާތްތަކެއްގައިވެސް ގައި ދުރުކަން ދެމެހެއްޓުމަށާއި ރައްކާތެރިކަމުގެ ފިޔަވަޅުތައް އަޅައިގެން ކިޔެވުން ކުރިއަށް ގެންދިއުމަށެވެ. ހަމައެއާއެކު ސްކޫލުގެ ކިޔަވައިދޭ ދަންފަޅި ކުރުކުރުމަށާއި މާސްކު ނަގައިގެން ހިންގަންޖެހޭ އެއްވެސް ހަރަކާތެއް ސްކޫލްގައި ނުހިންގުމަށް އަންގަވާފައިވެއެވެ.

އޭގެއިތުރުން ވަކި ސްކޫލްތަކުގެ ކިޔަވައިދިނުމުގެ އިންތިޒާމްތައް ހަމަޖެހިފައިވާގޮތް ސްކޫލްތަކުން ބެލެނިވެރިންނާއި ހިއްސާ ކުރަންވާނެ ކަމަށްވެސް މިނިސްޓްރީން ވަނީ ބުނެފައެވެ.