ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް މަރުގެ އިންޒާރު ދިން ކަމަށް ތުހުމަތުކޮށް ހައްޔަރު ކުރި އިސްމާޢީލް ޔާސިފްގެ މިއަދުގެ ޝަރީޢަތް ކެންސަލްކޮށްފިއެވެ.

ރައީސް ނަޝީދު "ދެން ރާއްޖެ އައިސްފިނަ ބަދުރުގެ ދުވަހު އަބޫ ޖަހުލަށް ހެދިގޮތް ހަދާނަން" ކަމަށް ބުނެ އިންޒާރު ދިން 40 އަހަރުގެ އިސްމާއީލް ޔާސިފް ރ. މީދޫއިން ހައްޔަރުކުރީ އޮގަސްޓްމަހުގެ 23 ވަނަ ދުވަހުއެވެ. މި މައްސަލައިގެ އަޑުއެހުން މިއަދު ހެނދުނު 09:00 އަށް ތާވަލު ކުރުމަށްފަހު އަޑުއެހުން ކެންސަލް ކޮށްފައިވަނީ އިދާރީ ސަބަބަކާހުރެއެވެ.

ޕްރޮސެކިއުޓަރ ޖެނެރަލްގެ އޮފީހުން ބުނީ އިސްމާޢީލް ޔާފިސް، ޓެރަރިސްޓް ޖަމާޢަތެއްކަމަށްވާ އިސްލާމިކް ސްޓޭޓް ޖަމާޢަތަށް ބައިއަތު ހިފިކަން އަންގައިދޭ ލިޔުމެއް ސޯޝަލް މީޑިއާގައި ޝާއިޢުކޮށް، 2020 ވަނަ އަހަރުން ފެށިގެން އިސްމާޢީލް ޔާފިސް ބޭނުންކުރާ ސޯޝަލް މީޑިއާގެ އެކި ޕްލޯޓްފޯރމްތަކުގައި ރައީސް ނަޝީދަށް އިންޒާރުދީ އެކި ޕޯސްޓްތައް ކޮށްފައިވާ މައްސަލައިގައި 3 ދައުވާއެއް ކުރުމަށް ކޯޓަށް ހުށަހަޅާފައިވާ ކަމަށެވެ.

ރައީސް ނަޝީދަށް މަރުގެ އިންޒާރު ދިން މައްސަލައިގައި ހ. ލައިޓްނައިޓް، އިސްމާއީލް ޔާފިސްގެ މައްޗަށް ދައުލަތުން ތިން ދައުވާއެއް އުފުލާފައިވެއެވެ. އެއީ ޓެރަރިޒަމްގެ އަމަލެއް ކުރަން ހިތްވަރު ދިނުމުގެ ދައުވާ، ޓެރަރިޒަމްގެ އަމަލެއް ހިންގާނެ ކަމުގެ އިންޒާރު ދިނުމުގެ ދައުވާ، އަދި ޓެރަރިސްޓް ޖަމާއަތަކަށް ތާއީދު ކުރި ކަމުގެ ދައުވާއެވެ. ޔާފިސް ވަނީ އެ ތިން ދައުވާއަށް ވެސް އިންކާރު ކޮށްފައެވެ.

އެމްޑީޕީގެ ޤައުމީ މަޖިލީހުގެ އިންތިޚާބުގައި ތާޢީދު ކުރަށްވާނީ ބަރުލަމާނީ ނިޒާމަށް ތާޢީދު ކުރާ ފަރާތްތަކަށް ކަމަށް ވިދާޅުވެ ސޯޝަލް މީޑިއާގައި ރައީސް ނަޝީދު ހިއްސާކޮށްފައިވާ ޕޯސްޓަކަށް ކޮމެންޓުކޮށް ޔާސިފް ވަނީ، ރައީސް ނަޝީދަށް މަރުގެ އިންޒާރު ދީފައެވެ.

އައިސިސްގެ ދިދަ އާއި ކަނޑިއަކާއެކު އެ ކޮމެންޓު ކުރި މީހާ ވަނީ ރައީސް ނަޝީދު "ދެން ރާއްޖެ އައިސްފިނަ ބަދުރުގެ ދުވަހު އަބޫ ޖަހުލަށް ހެދިގޮތް ހަދާނެ" ކަމަށް ބުނެފައެވެ. އަދި ހައެއް މެއި ގައި ކަންވީގޮތަށްވުރެ، ދެން ކުރިމަތިވާ ކަންތައް ހިތިވާނެ ކަމަށް އެމީހާ ވަނީ ބުނެފައެވެ.

މި މައްސަލާގައި ކޯޓަށް ޙާޟިރު ކުރުމުންވެސް ޔާސިފްވަނީ ދެފަހަރެއްގެ މަތިން ރައީސް ނަޝީދު އަވަހާރަކޮށްލާނެ ކަމަށް ބުނެފައެވެ. ޔާސިފް ހައްޔަރުކޮށްގެން އޭނާ ފުރަތަމަ ގެންދިޔައީ އުނގޫފާރު ކޯޓަށެވެ. އެ ކޯޓުގެ ހުރުމަތް ކަނޑައިގެން ވެސް އޭނާ ވަނީ 15 ދުވަހަށް ޖަލަށް ލާން ހުކުމްކޮށްފައެވެ. އޭގެ ފަހުން އޭނާގެ ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރުކުރުމުން، ކޯޓުގެ ހުރުމަތް ކަނޑައިގެން އެދުވަހުވެސް އޭނާ 15 ދުވަހަށް ޖަލަށްލުމަށް ހުކުމް ކޮށްފައިވެއެވެ.

ކޯޓުގެ ހުރުމަތް ކަނޑައިގެން ޔާސިފް 15 ދުވަަހަށް ޖަލަށްލާފައިވަނީ، ކޯޓުގައިވެސް ތަކުރާރުކޮށް ރައީސް ނަޝީދު އެނބުރި ރާއްޖެއަށް އަތުވެއްޖެނަމަ އަވަހާރަކޮށްލާނެ ކަމަށް އިންޒާރު ދިނުމުންނެވެ.