އެޗްޑީސީގެ މުވައްޒަފުން ހިޔާފްލެޓް ސަރަޙައްދުން 24 ޓަނުގެ ކުނި ނަގައިފިއެވެ.

ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީން އިއްޔެ ވަނީ ހިޔާ ފްލެޓު ސަރަހައްދުގައި ގިނަވެ އުކާނުލާހުރި ކުނިތަކުން 24 ޓަނުގެ ކުނި ނަގައި އެ ސަރަޙައްދު ސާފުކޮށްފަ އެވެ. ހިޔާ ފްލެޓުތައް ސަރަހައްދުގައި ކުނި މެނޭޖުކުރާނެ އިންތިޒާމެއް ނެތުމަކީ ފްލެޓްތަކުގައި ދިރިއުޅޭ ރައްޔިތުންގެ އެންމެ ބޮޑު އެއް ޝަކުވާއެވެ.

އެކަމާ ގުޅިގެން އެޗްޑީސީން ވަނީ އެޗް3 އަދި އެޗް5 ޓަވަރު ހިމެނޭ ސަރަޙައްދުގައި ހުރި ކުނި ފުނިތައް ސާފުކޮށްފައެވެ.

Our team has cleared over 24 tonnes of waste from the Hiyaa area yesterday. We truly appreciate the support received from the residents of H3 & H5 tower during the cleanup.
Let us all work together to keep our environment clean. pic.twitter.com/vmHT9PdvHU

— My Hulhumalè (@MyHulhumalemv) January 16, 2022

ހިޔާ ފްލެޓްގައި ދިރިއުޅޭ ފަރާތްތަކުގެ ޢަދަދު އިންތިހާއަށް އިތުރުވެފައިވީ ނަމަވެސް އެ ސަރަޙައްދަށް ބޭނުންވާ އަސާސީ ޚިދުމަތްތައް ފޯރުކޮށްދިނުމުގައި ސަރުކާރުން އިހުމާލުވެފައިވާ ކަމަށް ފްލެޓްތަކުގައި ދިރިއުޅޭ ރައްޔިތުން ދަނީ ބުނަމުންނެވެ.

ރައީސް ޔާމީންގެ ވެރިކަމުގައި ޢިމާރާތްކުރެއްވި ހިޔާ ފްލެޓްތަކަށް މި ސަރުކާރުން އިހުމާލުވަމުންދާ ކަމުގެ ޝަކުވާގެ އަޑުތައް ގަދަވެފައިވާއިރު އެ ސަރަޙައްދުގެ ދަތުރުފަތުރުގެ ޚިދުމަތަށް އެކަށީގެންވާ ނިޒާމެއް މިއަދާހަމައަށްވެސް ޤާއިމްކުރެވިފައެއް ނުވެއެވެ. ހަމައެއާއެކު ހިޔާފްލެޓްތަކުން ކުނި އުކާލުމަށް ވެމްކޯއިން ބަހައްޓާފައިވަނީ ނިސްބަތުން މަދު ޢަދަދެއްގެ ޑަސްބިން ތަކެކެވެ. އެކަމާ ގުޅިގެން ހިޔާ ސަރަޙައްދުގައި ކުނި ޖަމާވެ ދޭތެރެދޭތެރެއިން ކުނިތަކުގައި ރޯވުމުގެ ޙާދިސާތައްވެސް ދަނީ ހިނގަމުންނެވެ.

މީގެ އިތުރުން ފްލެޓްތައް ހިމެނޭ ސަރަޙައްދުގެ ސަލާމަތީ ކަންތައްތައް ނުބެލެހެއްޓޭކަމުގެ ޝަކުވާގެ އަޑުވެސް ވަނީ ގަދަވެފައެވެ.