ހުޅުމާލެ ފޭސްދޭކަށް ދަތުރުފަތުރުގެ ޚިދުމަތްދިނުމަށް ބޭނުންވާ ބަސްތައް އޮގަސްޓުގެ ކުރިން ގެންނާނެ ކަމަށް ސަރުކާރުން ހާމަކޮށްފިއެވެ.

ފޭސް ދޭކަށް ބަހުގެ ޚިދުމަތް ދިނުމަށް ޙަވާލުކޮށްފައިވާ ސަރުކާރުގެ ދަތުރުފަތުރުގެ ޚިދުމަތްދޭ ކުންފުނި އެމްޓީސީސީން ބުނީ މިއަހަރުގެ އޮގަސްޓުމަހުގެ ކުރިން މާލެއިން، ހުޅުމާލެ ފޭސްދޭކަށް ސީދާ ދަތުރުތައް ފެށޭނެ ކަމަށެވެ. ބަހުގެ ޚިދުމަތް މިހާރު ފޯރުކޮށްދެނީ ހުޅުމާލެ ފުރަތަމަ ފިޔަވަހިން ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓްތައް ހިމެނޭ ސަރަހައްދަށެވެ.

ހިޔާ ފްލެޓް ސަރަޙައްދަށް ބަހުގެ ޚިދުމަތް ފޯރުކޮށްދިން ނަމަވެސް އެޚިދުމަތް ފޯރުކޮށްދިނުމުގައި ހުރި ދޯދިޔާކަމުގެ ސަބަބުން ޢާއްމުންގެ ޝަކުވާވަނީ އިންތިހާއަށް ބޮޑުވެފައެވެ. އެ ޝަކުވާތަކަށް ޙައްލެއް ހޯދުމަށްޓަކައި ޒަމާނީ ބަސްތަކެއް ހޯދުމަށް ސަރުކާރުން ދަނީ މަސައްކަތް ކުރަމުންނެވެ.

މިހާރު މަސައްކަތް ކުރެވެމުންދާ ގޮތުން ރާއްޖެއިން ބޭރުން ގެންނަ ބަސްތައް މިއަހަރުގެ އޮގަސްޓުގެ ކުރިން ގެނެވި، ރައީސް ޞާލިޙްގެ ވަޢުދާއި އެއްގޮތަށް، މާލެއިން ހުޅުމާލެ ފޭސްދޭކަށް ސީދާ ދަތުރުތައް ފެށޭނެ ކަމަށް ސަރުކާރުން އުންމީދު ކުރެއެވެ.

ހިޔާ ފްލެޓްގައި ދިރިއުޅޭ ފަރާތްތަކުގެ ޢަދަދު އިންތިހާއަށް އިތުރުވެފައިވީ ނަމަވެސް އެ ސަރަޙައްދަށް ބޭނުންވާ އަސާސީ ޚިދުމަތްތައް ފޯރުކޮށްދިނުމުގައި ސަރުކާރުން އިހުމާލުވެފައިވާ ކަމަށް ފްލެޓްތަކުގައި ދިރިއުޅޭ ރައްޔިތުން ދަނީ ބުނަމުންނެވެ.

ކުރީގެ ރައީސް ޔާމީންގެ ވެރިކަމުގައި ޢިމާރާތްކުރެއްވި ހިޔާ ފްލެޓްތަކަށް މި ސަރުކާރުން އިހުމާލުވަމުންދާ ކަމުގެ ޝަކުވާގެ އަޑުތައް ގަދަވެފައިވާއިރު ހިޔާފްލެޓްތަކުން ކުނި އުކާލުމުގައި އެކަށީގެންވާ ނިޒާމެއް މިއަދާހަމައަށްވެސް ޤާއިމްކުރެވިފައެއް ނުވެއެވެ. އެކަމާ ގުޅިގެން ހިޔާ ސަރަޙައްދުގައި ކުނި ޖަމާވެ ދޭތެރެދޭތެރެއިން ކުނިތަކުގައި ރޯވުމުގެ ޙާދިސާތައްވެސް ވަނީ ހިނގާފައެވެ.

މީގެ އިތުރުން ފްލެޓްތައް ހިމެނޭ ސަރަޙައްދުގެ ސަލާމަތީ ކަންތައްތައް ނުބެލެހެއްޓޭކަމުގެ ޝަކުވާގެ އަޑުވެސް ވަނީ ގަދަވެފައެވެ.