ކޮންމެ ހާލެއްގައިވެސް އެމްޑީޕީ ވެރިކަމުގައި ބޭއްވުމަށް މަސައްކަތް ކުރަށްވާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީީސް މުޙައްމަދު ނަޝީދު ވިދާޅުވެއްޖެއެވެ.

ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ރައީސްގެ މަޤާމުގައިވެސް ހުންނެވި ރައީސް ނަޝީދު މި މޭރުމުން ވިދާޅުވެފައިވަނީ އިންޑިއާގެ "ދަ ހިންދޫ" ނޫހަށް ދެއްވި އިންޓަރުވިއުއެއްގައެވެ. ރައީސް ނަޝީދު ވިދާޅުވީ މުހިއްމީ އެމްޑީޕީގެ ވެރިކަމެއް އޮތުން ކަމަށާއި އެކަމަށްޓަކައި ކުރަށްވަން ޖެހިވަޑައިގެންނެވި ކޮންމެ ކަމެއްވެސް ކުރަށްވާނެ ކަމަށެވެ.

ރައީސް ނަޝީދު ވިދާޅުވީ އަބަދުވެސް ވެރިކަމަށް ކުރިމަތިލެއްވުމުގެ ވިސްނުންފުޅު ގެންގުޅުއްވާ ކަމަށާއި އެހެން ނަމަވެސް ރައީސް ޞާލިޙާ ދެބޭފުޅުން އިންތިޚާބުގައި ވާދަކުރުމަކީ ވަރަށް ނާދިރު ކަމެއް ކަމަށެވެ. އެކަމަކީ އެމަނިކުފާނުވެސް އަދި ރައީސް ޞާލިޙުވެސް އެދިވަޑައިގަންނަވާ ކަމެއް ނޫން ކަމަށް ރައީސް ނަޝީދު މިއަދު ވިދާޅުވިއެވެ.

ރާއްޖެއަށް އެންމެ މުހިންމީ އެމްޑީޕީގެ ވެރިކަމެއް އޮތުންކަން ފާހަގަ ކުރަށްވަމުން ރައީސް ނަޝީދު ވިދާޅުވީ ރާއްޖެއަށް ބަރުލަމާނީ ނިޒާމެއް ގެނައުމަށް އެމަނިކުފާނު ގެންގުޅުއްވާ ވިސްނުންފުޅު ބަދަލުނުވާ ކަމަށެވެ. ނަމަވެސް ރިޔާސީ އިންތިޚާބެއް ބާއްވާނަމަ އެމްޑީޕީގެ ކެނޑިޑޭޓެއް ހުންނާނެ ކަމަށްވެސް ރައީސް ނަޝީދު ވިދާޅުވިއެވެ.

ލަންކާގެ މިނިސްޓަރ އޮފް ޔޫތު އެންޑް ސްޕޯޓްސް، މިނިސްޓަރ އޮފް ޑިވެލޮޕްމަންޓް ކޯޑިނޭޝަން އެންޑް މޮނިޓަރިންގ އަދި ސްޓޭޓް މިނިސްޓަރ އޮފް ޑިޖިޓަލް ޓެކްނޮލޮޖީ އެންޑް އެންޓަރޕްރައިސް ޑިވެލޮޕްމަންޓް، ހިޒް އެކްސެލެންސީ ނަމާލް ރާޖަޕަކްސާގެ ދަޢުވަތަކަށް އެޤައުމަށް ކުރައްވާ ދަތުރުފުޅެއްގައި އުޅުއްވާ ރައީސް ނަޝީދު ވިދާޅުވީ ރާއްޖޭގައި މިހާރު އޮތް ނިޒާމުގެ ތެރެއިން ވަކިން، އެކަނި ނުކުމެ ޕާޓީއަކަށް އިންތިޚާބެއް ކާމިޔާބު ވުމަކީ ނާދިރު ކަމެއް ކަމަށެވެ.