ސައުދީގެ ރަސްގެފާނު ސަލްމާން ބިން އަބްދުލްއަޒީޒްގެ ހިލޭ އެހީގެ ދަށުން މާލޭގައި ބިނާކުރި ކިންގް ސަލްމާން މިސްކިތުގެ ނުނިމި ހުރި މަސައްކަތްތައް ނިންމަން ފައިސާ ހަމަޖައްސައިފި ކަމަށް ދަޢުލަތުގެ މާލީ ވުޒާރާއިން ހާމަކޮށްފިއެވެ.

ސަޢޫދީ ސަރުކާރުގެ ހިލޭ އެހީގެ ދަށުން ރާއްޖޭގައި ބިނާކުރާ އެންމެ ބޮޑު މިސްކިތް ކަމަށްވާ ކިންގް ސަލްމާން މިސްކިތް ބިނާކުރުމުގެ މަސައްކަތް ފެށީ ރައީސް ޔާމީންގެ ސަރުކާރުގައެވެ. އެމަސައްކަތް ގާތްގަނޑަކަށް ނިމިފައިވާއިރު، އަދިވެސް މިސްކިތް ހުޅުވާނެ ދުވަހެއް ސަރުކާރުން ހާމަކޮށްފައެއް ނުވެއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެންމެ ފަހުން ނޫސްވެރިންނާ ބައްދަލުކުރެއްވި ދުވަހު ވިދާޅުވީ އަންނަ ރޯދަމަހު މިސްކިތް ބޭނުން ކުރަން ފެށޭތޯ މަސައްކަތް ކުރަށްވާނެ ކަމަށެވެ.

ސަލްމާން މިސްކިތް ނުހުޅުވި ގިނަދުވަސްވާތީ އިސްލާމިކް މިނިސްޓަރު ޑރ. އަހުމަދު ޒާހިރު، ވަނީ މިސްކިތް ހުޅުވުމަށް ބޭނުންވާ ފައިސާ ހަމަޖައްސަވައި ދެއްވުންއެދި ރައީސް އިބްރާހިމް މުހައްމަދު ޞާލިޙަށް މިދިޔަ މަހު ސިޓީއެއް ފޮނުއްވާފައެވެ. އެ ސިޓީގައި އެދިފައިވަނީ މިސްކިތް ހުޅުވުމަށް ކުރަންޖެހޭ ޚަރަދުތަކަށް ދެ މިލިއަން ޑޮލަރު ސައުދީ ސަރުކާރުން ދޭނެ ކަމަށް ފޮރިން މިނިސްޓްރީން އަންގާފައިވާތީ، މަސައްކަތް އަވަސްކުރުމަށް ދައުލަތުގެ ބަޖެޓުން މިވަގުތަށް އެ ފައިސާ ހަމަޖައްސައި ދިނުމަށެވެ.

މާލީ ވުޒާރާއިން މިއަދު ހާމަކޮށްފައިވަނީ އިސްލާމިކް މިނިސްޓްރީގެ އެންގުމާ އެއްގޮތަށް ފައިސާ ދޫކުރުމަށް ރައީސް އޮފީހުން އެދުމުން އެ ފައިސާ މިހާރު ހަމަޖައްސާފައިވާ ކަމަށެވެ. އަދި ވަރަށް އަވަހަށް ފައިސާ ދޫކުރާނެ ކަމަށްވެސް މާލީ ވުޒާރާއިން ހާމަކޮށްފައިވެއެވެ.

ސަޢޫދީ ސަރުކާރުގެ ހިލޭ އެހީގެ ދަށުން ރާއްޖޭގައި ބިނާކުރާ ކިންގް ސަލްމާން މިސްކިތުގައި ނަމާދުކުރުމަށް ޚާއްޞަ ބައިގައި އެއްފަހަރާ 6000 މީހުންނަށް ނަމާދުކުރެވޭނެއެވެ. ކިންގް ސަލްމާން މިސްކިތް ފަރުމާކޮށްފައިވަނީ ކުތުބުޚާނާއަކާއި، ޤުރުއާނާބެހޭ މަރުކަޒަކާއި، މަލްޓި ޕަރޕަސް ހޯލަކާއި، ޖަލްސާކުރާ މާލަމަކާއި، އޮޑިޓޯރިއަމަކާއި ޕާކިންގް އޭރިއާއެއްވެސް ހިމެނޭގޮތަށެވެ.

6 ފަންގިފިލާއަށް ބިނާ ކޮށްފައިވާ ސަލްމާން މިސްކިތުގެ މައި އިމާރާތުގެ އުސްމިނުގައި 33.5 މީޓަރު ހުންނައިރު، މިސްކިތުގެ ވަށައިގެން ބިނާކުރާ 5 މުންނާރުގެ އުސްމިނުގައި 44 މީޓަރު ހުންނާނެއެވެ. އަދި ނަމާދުކުރުމަށް ޚާއްސަކޮށްފައިވާ ސަރަޙައްދުތަކާއި، މިސްކިތުގެ ގޯތިތެރެ ހިމެނޭހެން، ދިހަހާސް މީހުންނަށް އެއްފަހަރާ ބޮޑު ޖަމާޢަތުގައި ނަމާދުކުރެވޭނެއެވެ. ތުރުކީގެ ޓާމެކްސް ކުންފުންޏާ ހަވާލުކޮށްގެން އަޅާފައިވާ ސަލްމާން މިސްކިތަކީ ގާތްގަނޑަކަށް 370 މިލިއަން ރުފިޔާ ޚަރަދުކޮށްގެން އިމާރާތްކޮށްފައިވާ ބިނާއެކެވެ.

ރައީސް އިބްރާހިމް މުހައްމަދު ޞާލިހުގެ ސަރުކާރުން ސަލްމާން މިސްކިތަށް މާބޮޑު ސަމާލުކަމެއް ނުދޭކަމަށް ގިނަ ބަޔަކު ތުހުމަތު ކުރަމުންދާއިރު، އެ މިސްކިތް ހުޅުވޭނެ ދުވަހެއް މިހާތަނަށް ރަސްމީކޮށް ހާމަކޮށްފައެއް ނުވެއެވެ.