ހައި ކޯޓުގެ ތާރިހުގައި އެންމެ ގިނަ މައްސަލަ ނިންމީ މިދިޔަ 2021 ވަނަ އަހަރު ކަމަށް އެކޯޓުން ހާމަކޮށްފިއެވެ.

ހައި ކޯޓުން ޢާއްމުކޮށްފައިވާ މިދިޔަ އަހަރުގެ ތަފާސްހިސާބުތަކުން ދައްކާގޮތުން މިދިޔަ އަހަރު އެ ކޯޓަށް 835 މައްސަލަ ހުށަހެޅި ނަމަވެސް، ކޯޓުގައި ރަޖިސްޓްރީ ކުރީ 625 މައްސަލަ އެވެ. މިދިޔައަހަރު ފެށުނުއިރު ހުރި ބާކީއާ އެކު އެކޯޓުން މިދިޔަ އަހަރު ވަނީ 672 މައްސަލަ ނިންމާފައެވެ.

ހައި ކޯޓުގައި މިދިޔަ އަހަރު އެންމެ ގިނައިން ނިންމާފައިވަނީ މަދަނީ މައްސަލަތަކެވެ. އެގޮތުން 325 މަދަނީ މައްސަލަ ވަނީ ނިންމާފައެވެ. އޭގެ އިތުރުން ޖިނާއީ 214 މައްސަލަ އާއި ވަޒީފާއާ ބެހޭ 67 މައްސަލަ އަދި ޓެކްސް އާ ބެހޭ 22 މައްސަލަ ވަނީ ނިންމާފައެވެ. އޭގެ އިތުރުން އާއިލީ 18 މައްސަލަ މައްސަލައާއި އިންތިހާބީ 7 މައްސަލަ އަދި މޮނިކޮން އަމުރުގެ 6 މައްސަލަ އެ ކޯޓުން ނިންމާފައިވެއެވެ.

ހައިކޯޓުން މިދިޔަ އަހަރު އެންމެ ގިނަ މައްސަލަ ނިންމީ މާޗު މަހު އެވެ. އެގޮތުން މާޗު މަހުގެ ތެރޭގައި 100 މައްސަލަ ހައި ކޯޓުން ނިންމި އެވެ.

2021 ވަނަ އަހަރުގެ ތަފާސް ހިސާބުhttps://t.co/LuFxKp9RcW pic.twitter.com/TEuQP6vjOI

— High Court of Maldives (@mvhighcourt) January 20, 2022

ތަފާސްހިސާބުތަކަށް ބަލާއިރު، ހައިކޯޓުގައި މިވަގުތު އެންމެ ގިނަދުވަސްވީ މައްސަލަތަކުގެ ގޮތުގައި ނުނިމި އޮތީ 2017 ވަނަ އަހަރު ހުށައެޅުނު 2 މައްސަލައެވެ. އޭގެ އިތުރުން 2018 ގެ 21 މައްސަލަ އާއި 2019 ގެ 186 މައްސަލަ އާއި 2020 ގެ 141 މައްސަލަ އަދި 2021 ގެ 329 މައްސަލަ ޕެންޑިންގައި އޮތްކަމަށް ތަފާސް ހިސާބުން ދައްކައެވެ.

2021ގެ ނިޔަލަށް ހައިކޯޓުގައި ނުނިމި ޖުމްލަ އޮތީ 679 މައްސަލައެވެ.