ރާއްޖޭގައި ޢުމުރުން ފަސް އަހަރާއި އެގާރަ އަހަރާ ދެމެދުގެ އުމުރުފުރާގެ ކުދީންނަށް ކޮވިޑް ވެކްސިން ޖެހުމަށް ތައްޔާރުވަމުން އަންނަ ކަމަށް ހެލްތު ޕްރޮޓެކްޝަން އޭޖެންސީ އެޗްޕީއޭ އިން ބުނެފި އެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ހެލްތު ޕްރޮގްރާމް މެނޭޖަރު އޮފް އިމިއުނައިޒޭޝަން ނާޝިޔާ އަބްދުލްޣަފޫރު ވިދާޅުވީ ފަސް އަހަރާއި 11 އަހަރާ ދެމެދުގެ ކުދީންނަށް ވެކްސިން ދިނުމަށް މަސައްކަތް ކުރަމުން އަންނަ ކަމަށެވެ.

މިވަގުތު ކުރިއަށްދަނީ ފަސް އަހަރާއި 11 އަހަރާ ދެމެދުގެ ކުދީންނަށް ވެކްސިން ޖެހުމަށް ޕްލޭންތައް ހެދުން ކަމަށް ނާޝިޔާ ވިދާޅުވިއެވެ. އެގޮތުން އެކަމަށް ބޭނުންވާ މައުލޫމާތު އެއްކޮށްފައިވާ ކަމަށާއި އެ އުމުރާފުރާގެ ކުދިންނަށް ވެކްސިން ދިނުމަށް ޓެކްނިކަލް މަޝްވަރާތައް ނިމުމުން އިއުލާން ކުރާނެ ކަމަށްވެސް އޭނާ ވިދާޅުވިއެވެ.

ރާއްޖޭގައި އުމުރުން 12 އަހަރާއި 17 އަހަރާ ދެމެދުގެ ކުދިންނަށް ފައިޒަރ ވެކްސިންގެ ފުރަތަމަ ޑޯޒް ޖަހަން ފަށާފައިވަނީ މިދިޔަ އަހަރުގެ އޯގަސްޓް މަހުގެ 15ވަނަ ދުވަހުގައެވެ. އަދި ދެވަނަ ޑޯޒް ޖެހުމުގެ މަސައްކަތް ފެށީ މިދިޔަ އަހަރުގެ ސެޕްޓެމްބަރ 7 ވަނަ ދުވަހުއެވެ.

ރާއްޖޭގައި 12 އަހަރާއި 17 އަހަރާއި ދެމެދުގެ ވެކްސިނަށް ޝަރުތުހަމަވާ 36،665 ކުދިން ތިބިއިރު އޭގެތެރެއިން 36،029 ދަރިވަރުން ވަނީ ވެކްސިންގެ ފުރަތަމަ ޑޯސް ޖަހާފައެވެ. އަދި 32،358 ކުދިން ވަނީ ވެކްސިންގެ ދެޑޯސް ފުރިހަމަކޮށްފައެވެ. އެ އުމުރުފުރާގައި ވެކްސިންގެ އެއްވެސް ޑޯސެއް ނުޖަހާ 636 ކުދިން އެބަތިބި ކަމަށް ތަޢުލީމާބެހޭ ވުޒާރާއިން ހާމަކޮށްފައިވެއެވެ.

ރާއްޖޭގެ ވެކްސިން ޖެހޭ އާބާދީގެ ހުރިހާ ރައްޔިތުންނަށް ބޭނުންވާ މިންވަރަށް ރާއްޖެއަށް ވެކްސިންލިބި އަދި މިހާތަނަށް ވެކްސިން ޖެހޭ އާބާދީގެ ބޮޑު ބަޔަކަށް ވެކްސިންދީ ނިމިފައިވާއިރު މިއީ ރާއްޖެއަށްވުރެ ހުރިހާ ގޮތަކުން ކުރިއަރާފައިވާ ބައެއް ޤައުމުތަކާއި އަޅާބަލާއިރުވެސް ބޮޑު ކުރިއެރުމެކެވެ.