ރާއްޖޭގެ 09 ސްކޫލެއްގައި ހިންގާ ސްޕެޝަލް އެޑިއުކޭޝަން ނީޑް (ސެން) ކްލާސްތަކުގައި ކުދިންނަށް ކިޔަވާދިނުމަށް ބޭނުންވާ ތަކެތި ބޭންކް އޮފް މޯލްޑިވްސްގެ ފަރާތުން ހަދިޔާކޮށްފިއެވެ.

ބޭންކުން ބުނީ މިއީ ބޭންކުގެ ސީއެސްއާރު ސްޓްރެޓެޖީގެ ދަށުން ކުރިއަށް ގެންދާ ޙަރަކާތެއް ކަމަށެވެ. އެގޮތުން ހާއްސަ އިސްކަމެއްދީގެން ނުކުޅެދުންތެރިކަން ހުންނަ ފަރާތްތަކަށް އެހީވުމަށް މި ހަދިޔާކުރި އާލާތްތަކަކީ ކުދިންގެ ގާބިލުކަމާއި، އެހެންމީހުންނާއި ގުޅިގެން މުޖުތަމައުގައި ހަރަކާތްތެރިވުމަށް ބޭނުންވާ ހުނަރު ތަރައްގީކުރުމާއި އެކުދިންގެ ތައުލީމީ ބޭނުންތައް ބަލައިގެން ހޯދާފައިވާ ވަސީލަތްތަކެއް ކަމަށް ބޭންކުން މަޢުލޫމާތުދެއެވެ.

ބޭންކުން ފޯރުކޮށްދިން އެހީތެރިކަމާ އެކު 9 ސްކޫލްގެ ސެން ކްލާސްތަކުގައި ކިޔަވަމުންދާ 330 އަށްވުރެ ގިނަ ދަރިވަރުންނަށް ކިޔަވައިދިނުމަށް އިތުރު ލުއިފަސޭހަތަކެއް ލިބިގެންދާނެ ކަމަށް ބޭންކުން ޤަބޫލުކުރެއެވެ. މިއަހަރު ބޭންކުން ސެން ކްލާސްތަކަށް މި ތަކެތި ހަދިޔާކޮށްފައިމިވަނީ "އިންޓަރނޭޝަނަލް ޑޭ އޮފް އެޑިޔުކޭޝަން" ފާހަގަ ކުރަމުންދާ ދުވަހުގައެވެ.

މިފަހަރު ބޭންކުން ތަކެތި ހަދިޔާކުރި ސްކޫލްތަކަކީ ށ. ފުނަދޫ ސްކޫލާއި ހޮޅުދޫ މޭނާ ސްކޫލާއި، ނައިފަރު މަދްރަސަތުލް އިފްތިތާޙާއި، ކ. ގުރައިދޫ ސްކޫލާއި އއ. އުކުޅަސް ސްކޫލާއި އދ. އަތޮޅު ތަޢުލީމީ މަރުކަޒާއި، ލ.ގަން އިހައްދޫ ސްކޫލާއި، ގއ. އަތޮޅު ސްކޫލާއި ގދ. މަޑަވެލި ސްކޫލަށެވެ.

މިވޭތުވެދިޔަ ދެއަހަރުތެރޭ ބޭންކް އޮފް މޯލްޑިވްސްގެ ފަރާތުން ވަނީ ރާއްޖޭގެ 29 ސްކޫލެއްގައި ހިންގާ ސެން ކްލާސްތަކަށް ބޭނުންވާ ތަކެތި ހަދިޔާކޮށްފައެވެ.