ރާއްޖޭގައި ކޯވިޑް ބޫސްޓަރ ޑޯސް ޖެހުމަށް ޝަރުތު ހަމަވެފައިވާ މީހުންގެ ތެރެއިން ބޫސްޓަރ ޑޯސް ނުޖަހާ މީހުންނަށް ފިޔަވަޅުތައް ހަރުކަށިކުރަން ސަރުކާރުން މަޝްވަރާކުރަން ފަށައިފިއެވެ.

އެޗްޕީއޭގެ އުސޫލުގައިވާ ގޮތުން ބޫސްޓަރ ޑޯސް ޖަހަން ޖެހޭނީ ކޯވިޑް 2 ޑޯސް ފުރިހަމަކުރިތާ 6 މަސްވެފައިވާ މީހުންނެވެ.

"ރަސް" އޮންލައިންއަށް މައުލޫމާތު ލިބިފައިވާ ގޮތުގައި ކޮވިޑް-19 އިން ދިފާއުވުމަށް ޖަހަން ޖެހޭ ވެކްސިންގެ ބޫސްޓަ ޑޯޒް ނުޖަހާ ނަމަ 14 ދުވަހަށް ކަރަންޓީން ވާން ޖެހޭ ގޮތަށް އުސޫލެއް ހަދަން ސަރުކާރުން މިހާރު ވަނީ މަޝްވަރާކުރަން ފަށާފައެވެ. އަދި މިގޮތަށް އުސޫލެއް ހަދަން މަޝްވަރާ ކުރަން ފެށީ މި ދުވަސްވަރު ރާއްޖޭގައި ކޮވިޑްގެ ހާލަތު ގޯސްވެފައިވުމާއި ބޫސްޓަރ ޑޯޒް ޖަހަންދާ މީހުންގެ އަދަދުވެސް މަދުވުމުންނެވެ.

ސަރުކާރުން ގެންނަން އުޅޭ ބަދަލުތަކުގެ ތެރޭގައި އާއްމު އުސޫލުން މިހާރު އޮންނަ 7 ދުވަހުގެ ކަރަންޓީން ރަށްރަށަށް ދަތުރުކުރާއިރު 14 ދުވަހަށް ބަދަލުކުރުން ހިމެނެއެވެ. ނަަމަވެސް، މި އުސޫލު ތަންފީޒުކުރަން ފަށާނީ ކޮންއިރަކުން ކަމެއް ނޭނގެއެވެ.

ރާއްޖެއިން އިއްޔެވެސް ވަނީ 2484 މީހަކު ކޮވިޑަށް ޕޮޒިޓިވްވެފައެވެ. ބައްޔަށް ޕޮޒިޓިވްވި މީހުންގެ ތެރޭގައި ހިމެނެނީ ގްރޭޓަރ މާލެ ސަރަހައްދުން ޕޮޒިޓިވްވި 1268 މީހަކާއި އެހެނިހެން ސަރަހައްދު ތަކުން ޕޮޒިޓިވްވި 1216 މީހުންނެވެ. މީގެ ތެރޭގައި ރިސޯޓުތަކުން ޕޮޒިޓިވްވި 81 މީހުންނާއި، އަތޮޅުތެރޭގެ ރަށްތަކުން ޕޮޒިޓިވްވި 728 މީހަކު ހިމެނެއެވެ.

އެޗްޕީއޭގެ ތަފާސް ހިސާބުތައް ދައްކާގޮތުން ރާއްޖެއިން ބަލިޖެހުނު މީހުންގެ ޖުމްލަ އަދަދު މިހާރު ވަނީ 117،467 އަށް އަރާފައެވެ. އަދި މިވަގުތު ބަލިޖެހިފައި ތިބި މީހުންގެ އަދަދު އުޅެނީ 14،636 ގައެވެ.

އެޗްޕީއޭ ގެ ތަފާސްހިސާބުން ދައްކާގޮތުން މިވަގުތު ހޮސްޕިޓަލްގައި އެޑްމިޓްކޮށްގެން ފަރުވާދެމުން ގެންދަނީ 47 މީހުންނަށެވެ.