ކޯވިޑް-19 އަށް ގިނަޢަދަދެއްގެ ބަޔަކު ޕޮޒިިޓިވްވުމާއި ގުޅިގެން ގދ. ތިނަދޫގައި ކާފިއު ހިންގަން ފަށައިފިއެވެ.

ތިނަދޫގައި މިހާތަނަށް 1361 މީހަކު ވަނީ ކޮވިޑަށް ޕޮޒިޓިވްވެފައެވެ. އެރަށުގައި މިވަގުތު ބަލިޖެހިފައި ތިބިމީހުންގެ ޢަދަދު 161 ކަށް އަރާއިރު 1200 މީހަކު ވަނީ ބަލިން ރަނގަޅުވެފައެވެ. އަދި މިބަލީގައި އެރަށުން ވަނީ 05 މީހުން ނިޔާވެފައެވެ.

ތިނަދޫ ކައުންސިލުން މިއަދު ކުރި އިޢުލާނުގައި ބުނެފައިވަނީ ތިނަދޫން ކޮވިޑް-19 ގެ އައު ވޭރިއެންޓަށް ބަޔަކު ފައްސިވެ ބަލިޖެހޭ މީހުންގެ އަދަދު ދުވަހެއް ދުވަހަކަށް އިތުރުވަމުންދާތީ އެޗްޕީއޭއިން އެރަށް މޮނީޓަރިންގ ހާލަތަށް ގެނެސްފައިވާ ކަމަށެވެ. އެހެންކަމުން އެޗްޕީއޭއިން އަންގާފައިވާ ސިއްހީ ރައްކާތެރިކަމުގެ ފިޔަވަޅުތައް އެޅުމަށް ތިނަދޫ އިމަޖެންސީ އޮޕަރޭޝަން ސެންޓަރުން ނިންމާފައިވާ ކަމަށް އިޢުލާނުގައިވެއެވެ.

ތިނަދޫގައި ކޯވިޑް-19 ފެތުރެމުންދާތީ ތިނަދޫ ކައުންސިލުން ވަނީ އެ ރަށުގައި އަޅާފައިވާ ފިޔަވަޅުތައް ވަރުގަދަކޮށްފައެވެ. އެގޮތުން ރޭގަނޑު 9:00 އިން ފަތިހު 4:00 އަށް ބޭރަށް ނުކުމެ އުޅުން ވަނީ މަނާކޮށްފައެވެ. މީގެ އިތުރުން ޒަރޫރީ ބޭނުންތަކަށް މެނުވީ ގެއިން ބޭރަށް ނުނުކުތުމަށާއި ޕާޓީތަކާއި ހަފްލާތައް، އަދި ރަސްމިއްޔާތުތައް ބޭއްވުން ހުއްޓައިލުމަށް ވަނީ އަންގާފައެވެ.



އޭގެއިތުރުން އެއްފަހަރާ ތިން މީހުންނަށްވުރެ ގިނަ މީހުން އާއްމު ތަންތާގައި އެއްވެ ނޫޅުމާއި, ސެލޫން، ޖިމް އަދި ބޯކޮށާ ތަންތަން ބަންދުކުރުމަށާއި ހުރިހާ ކުޅިވަރު ހަރަކާތްތަކާއި ކަސްރަތު ކްލާސްތައް ހުއްޓައިލުމަށް އަންގާފައިވެއެވެ. ހަމައެއާއެކު ފިހާރަތަކުން ހިދުމަތްދިނުމުގައި އެޗްޕީއޭގެ ގައިޑްލައިނަށް އަމަލުކުރުމާއި ޔުނިވާސިޓީ ކޮލެޖް ފަދަ ތަންތަނަށް، ދަރިވަރުން ހާޒިރުވެގެން ކްލާސްތައް ކުރިއަށް ގެންދިޔުން ހުއްޓައިލުމަށްވެސް އަންގާފައިވެއެވެ.