އެމެރިކާއިން ރާއްޖެއަށް އިތުރު ވެކްސިން ޑޯޒްތަކެއް ހަދިޔާކުރުމާއި ގުޅިގެން ރާއްޖޭގެ ހާރިޖީ ވަޒީރު އަބްދުﷲ ޝާހިދު، އެމެރިކާގެ ހާރިޖީ ވަޒީރު އެންޓޮނީ ބްލިންކަންއަށް ޝުކުރު އަދާކުރައްވައިފިއެވެ.

އެމެރިކާއިން އިއްޔެ ވަނީ ރާއްޖެއަށް އިތުރު 210،600 ޑޯޒްގެ ފައިޒާ ވެކްސިން ހަދިޔާކޮށްފައެެވެ. މިއީ ކޮވެކްސް ފެސިލިޓީގެ ތެރެއިން ރާއްޖެއަށް ފޮނުވި ވެކްސިނެވެ.

އެމެެރިކާއިން ހަދިޔާ ކުރި ވެކްސިނާއި ގުޅިގެން ޚާރިޖީ ވަޒީރު އަބްދުالله ޝާހިދު ކުރެއްވި ޓްވީޓެއްގައި ވަނީ އެމެރިކާއިން ފޯރުކޮށްދިން އެހީތެރިކަމަށް އެމެރިކާގެ ހާރިޖީ ވަޒީރު އެންޓޮނީ ބްލިންކަންއަށް ޝުކުރު އަދާކުރައްވާފައެވެ.

ޝާހިދުގެ ވިދާޅުވީ އެމެރިކާއިން ހަދިޔާކުރި ވެކްސިނާއެކު ރާއްޖޭގެ ހުރިހާ ރައްޔިތުންނަށް ބޫސްޓަރ ޑޯޒް ދިނުމަށް ކުރާ މަސައްކަތް ވަރުގަދަވެގެންދާނެކަމަށެވެ.

Thank you @SecBlinken and the Government of the United States for the donation of 210,600 doses of COVID-19 vaccines today through COVAX.

These vaccines will bolster our efforts to provide booster shots for all Maldivians and assist in our vaccination efforts.@USAIDMaldives

— Abdulla Shahid (@abdulla_shahid) January 28, 2022

ކޮވިޑާ ގުޅިގެން އެމެރިކާއިން ވަނީ މިހާތަނަށް ރާއްޖެއަށް 440،000 ޑޯޒްގެ ފައިޒާ ވެކްސިނާއި ހަތް މިލިއަން ޑޮލަރުގެ އެމާޖެންސީ ވަސީލަތްތައްވެސް ހަދިޔާކޮށްފައެެވެ. އަދި 60 ވެންޓިލޭޓަރާއި އެއް ލައްކަ ރެޕިޑް ޑައިގްނޯސްޓިކް ޓެސްޓު ކިޓްވެސް އެގައުމުން ރާއްޖެއަށް ހަދިޔާކޮށްފައިވެއެވެ.

ރާއްޖޭގައި ކޮވިޑް ބަލީގެ ހާލަތު މިހާރު ގޯސްވެފައިވާ މިންވަރުން އަރައިގަތުމަށް ކުރެވޭނެ އެންމެ މުހިންމު ކަމަކީ ކޮވިޑް-19 ވެކްސިންގެ ބޫސްޓާ ޑޯޒް ޖެހުން ކަމަށް ސިއްހީ މާހިރުން ވިދާޅުވެއެެވެ.

ރާއްޖެއިން ބޫސްޓާއެއްގެ ގޮތުގައި ޖަހަނީ ފައިޒާ ވެކްސިންގެ ޑޯޒެކެވެ. އެގޮތުން 18 އަހަރުން މަތީގެ އެންމެންނަށް ވެސް ބޫސްޓާ ޑޯޒް ޖެހުމުގެ ފުރުސަތު މިމަހު ވަނީ ހުޅުވާލާފައެވެ. ރާއްޖެއިން ބޫސްޓާ ޑޯޒް ޖެހި މީހުންގެ އަދަދު މިހާރު ވަނީ 62000 އަށް އަރާފައެވެ.