ރައްޔިތުންގެ މަޖިލީހުގެ މެންބަރުންގެ ތެރެއިން ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލައުންޖު އެންމެ ގިނައިން ބޭނުންކުރެއްވީ މޯލްޑިވްސް ނޭޝަނަލް ޕާޓީ (އެމްއެންޕީ) ގެ ރައީސް އަދި ދަނގެތީ ދާއިރާގެ މެމްބަރު މުހައްމަދު ނާޒިމްކަން ހާމަވެއްޖެ އެވެ.

މަޖިލީހުގެ މެންބަރުން ވީއައިޕީއަށް ކޮށްފައިވާ ހަރަދުތަކުގެ ތަފްސީލް ޢާއްމުކޮށްފައިވަނީ މައުލޫމާތު ހޯދާ ލިބިގަތުމުގެ ގާނޫނުގެ ދަށުން އެމައުލޫމާތު ހޯދުމަށް ސޯޝަލް އެކްޓިވިސްޓް އައިމަން ލަތީފު ހުށައެޅުމުންނެވެ. އެ މަޢުލޫމާތު ދައްކާގޮތުން މަޖިލީހުގެ މެންބަރުންގެ ވީއައިޕީ ޚަރަދުތަކަށް ޖުމްލަ 1.6 މިލިއަން ރުފިޔާ ވަނީ ޚަރަދު ކޮށްފައެވެ.

މެންބަރުން ވީއައިޕީ ބޭނުންކުރެއްވި ގޮތުގެ ތަފްސީލްތަކަށް ބަލާއިރު ދަނގެތީ ދާއިރާގެ މެންބަރު ނާޒިމްގެ ވީއައިޕީ ދަތުރުތަކަށް މަޖިލީހުންވަނީ 103،622 ރުފިޔާ ޚަރަދުކޮށްފައެވެ. އޭގެއިތުރުން ގުރައިދޫ ދާއިރާގެ މެންބަރު ޣައްސާން މައުމޫންގެ ދަތުރުތަކަށް 87،894 ރުފިޔާ ޚަރަދުކޮށްފައިވާއިރު ތިންވަނައަށް މި ޚިދުމަތް އެންމެގިނައިން ބޭނުންކުރެއްވި ކާށިދޫ ދާއިރާގެ މެންބަރު ޢަބްދުالله ޖާބިރުގެ ދަތުރުތަކަށް 86،043 ރުފިޔާ ޚަރަދުކޮށްފައިވެއެވެ.

މެންބަރުން ވީއައިޕީ ބޭނުންކުރެއްވި ގޮތުގެ ތަފްސީލް ދައްކާގޮތުން މަޖިލީހުގެ ރައީސް މުޙައްމަދު ނަޝީދު ހިމެނިވަޑައިގަންނަވާ ގޮތުން ޖުމްލަ 8 މެންބަރުން އެއްވެސް ވަރަކަށް ވީއައިޕީގެ ޚިދުމަތް ބޭނުންކުރަށްވާފައެއް ނުވެއެވެ.

މިހާރު އޮންނަގޮތުން މަޖިލީހުގެ މެންބަރުންނާއި މެންބަރުންގެ އަނބިންނާއި ފިރިންގެ އިތުރަށް ދަރިންނާއި މައިންބަފައިންނަށް ވީއައިޕީ ލައުންޖް ބޭނުންކުރެވެއެވެ. އަދި ލައުންޖް ބޭނުންކުރުމަށްފަހު ބިލު ފޮނުވަނީ މަޖިލީހަށެވެ.