ނޫމަޑި މައްސަލާގައި ކުރީގެ ހައުސިން މިނިސްޓަރު އަދި މާލޭ ސިޓީގެ މިހާރުގެ މޭޔަރު ޑރ. މުހައްމަދު މުއިއްޒުގެ މައްޗަށް ދައުލަތުން އުފުލާފައިވާ ދޮގު ބަޔާން ދިނުމުގެ ކުށުގެ ދައުވާއަކީ ފުރިހަމަނުވާ ބާތިލު ދައުވާއެއްކަމަށް މުޢިއްޒުގެ ވަކީލުން ވިދާޅުވެއްޖެއެވެ.

ޕްރޮސެކިއުޓާ ޖެނެރަލްގެ އޮފީހުން ބުނީ ޖޫން 25، 2019 ގައި ނޫމަޑި ރިސޯޓްސް އެންޑް ރެޒިޑެންޝަން އޭޖީ، ނޫމަޑިން ދިވެހި ސަރުކާރާ ދެކޮޅަށް ނެދަލޭންޑްސްގެ ދަހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަނަށް ހުށަހަޅާފައިވާ މައްސަލާގައި އެކުންފުނީގެ ހެކިވެރިއެއްގެ ގޮތުގައި ހެކި ދެއްވާފައި ވަނީ ޑރ. މުއިއްޒު ކަމަށެވެ.

މިދަޢުވާއަށް މުޢިއްޒު އިންކާރު ކުރަށްވާފައިވާއިރު މި މައްސަލައިގައި މިއަދު އޮތް އަޑުއެހުމުގައި މުއިއްޒުގެ ވަކީލު އާދަމް ޝަމީމް ވަނީ 4 ކަމެއް ޝަރީޢަތަށް ހުށައަޅުއްވާފައެވެ. އެގޮތުން ޝަމީމް ވިދާޅުވީ ޙާދިސާ ހިނގި ތަނުގައި ނެތްކަމުގެ ދިފާއު ނަގަން ބަލާއިރުވެސް، ޙާދިސާ ހިނގި ތަން ނުވަތަ ކުށް ކުރިތަން އެނގެން ޖެހޭކަމަށާއި ނަމަވެސް ދަޢުވާގައި އެކަން ސާފުކޮށް ބަޔާން ކޮށްދީފައިނުވާކަމަށެވެ. އެހެންކަމުން މިދައުވާއަކީ ޖިނާއީ އިޖުރާއަތުގެ ޤާނޫނުގައި ބަޔާންކޮށްފައިވާ ކަންކަން ފުރިހަމަނުވާ ބާތިލު ދައުވާއެއްކަމަށް ކަނޑައަޅުއްވައި ދެއްވުމަށް ވަކީލް ވަނީ ހުށައަޅުއްވާފައެވެ.

އޭގެ އިތުރުން މައްސަލާގައި ދަޢުލަތުން ހުށައަޅާފައިވާ ބައެއް ޝަފަހީ ހެކިތަށް ބަލައި ނުގަތުމަށްވެސް މުޢިއްޒުގެ ފަރާތުން ހުށައެޅުއްވިއެވެ. މިއަދުގެ ޝަރީޢަތުގައި ދަޢުލަތުން ވަނީ މުޢިއްޒުގެ ފަރާތުން ހުށައެޅުއްވީ އެއްވެސް ޤާނޫނީ ބުރަދަނެއް ނެތް ކަންތައްތަކެއްކަން ފާހަގަކޮށް މައްސަލަ ކުރިއަށް ގެންގޮސްދެއްވުމަށް އެދިފައެވެ.

ކުރީގެ ހައުސިން މިނިސްޓަރު ޑރ. މުއިއްޒުގެ މައްޗަށް ދައުލަތުން އުފުލާފައިވާ ދައުވާގައި ބުނެފައިވަނީ ހައުސިން ޔުނިޓް މަޝްރޫއާ ގުޅިގެން ނޫމަޑިއާއެކު ދިވެހި ސަރުކާރުން 2011 ވަނަ އަހަރު ވެފައިވާ ފޭސް އެކެއްގެ އެއްބަސްވުމާއި 2013 ގައި ވެފައިވާ ފޭސް ދޭއްގެ އެއްބަސްވުމުގެ މަސައްކަތް އެކުންފުނިން ޝެޑިއުލާއި އެއްގޮތަށް ލަސްތަކެއް ނުވެ ކުރަމުން ގެންދިޔަ ކަމަށާއި ނޫމަޑިއަށް ލަގްޒަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެފައި ނުވާ ކަމަށް ބުނެ، ދޮގު ބާޔަނެއް ދީފައިވާ ކަމަށެވެ.

ނޫމަޑީގެ މައްސަލާގައި މުއިއްޒު ވަނީ ފުލުހަށާއި އަދި ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ވެސް ހާޒިރުކޮށް ސުވާލުކޮށްފައެވެ.

ދިވެހި ސަރުކާރުގެ ފަރާތުން ބަދަލުގެ ގޮތުގައި ގާތްގަނޑަކަށް 155 މިލިއަން ޑޮލަރާއި އާބިޓްރޭޝަނާ ގުޅޭ އިތުރު ހަރަދުތައް ހޯދަން އެދި ނޫމަޑީގެ ފަރާތުން ނެދަލޭންޑްސްގެ ދަ ހޭގްގައި ހުންނަ ޕާމަނަންޓް ކޯޓް އޮފް އާބިޓްރޭޝަނަށް ދެ މައްސަލައެއް ހުށަހެޅި ނަމަވެސް ސަރުކާރުން މިހާރު ވަނީ އެ ކުންފުންޏާއެކު އެއްބަސްވުމަކަށް ގޮސް 55 މިލިއަން ޑޮލަރު ދީ މައްސަލަ ހައްލުކޮށްފައެވެ. މިމައްސަލަ ސަރުކާރުން ބަލަން ފެށީ ސަރުކާރުން މިފަދަ ބަދަލުތަކުގެ ނަމުގައި އެކި ކުންފުނިތަކަށް ފައިސާ ދޭ ކަމަށް ބުނެ ގިނަ ބަޔަކު ފާޑުކިޔަން ފެށުމުންނެވެ.

މިމައްސަލަ ކްރިމިނަލް ކޯޓުގައި ބައްލަވަނީ ޤާޟީ ސަފްއަތު ހަބީބެވެ.