ރޫޓު ފިހާރައިން ބޭންކް އޮފް ސިލޯނަށް ޖަމާކުރުމަށް ގެންދިޔަ 4.2 މިލިއަން ދިވެހި ރުފިޔާ ފޭރުނު މައްސަލައިގައި ފޭރުމުގެ ކުށުގެ ދައުވާ އުފުލާފައިވާ 4 މީހަކު ދައުވާއަށް އިއުތިރާފުވެފައިވާތީ އެމީހުންގެ މައްޗަށް ކުށް ސާބިތުވާކަމަށް ކްރިމިނަލް ކޯޓުން ކަނޑައަޅައިފިއެވެ.

2020 ވަނަ އަހަރުގެ އޮކްޓޯބަރު މަހުގެ 25 ވަނަ ދުވަހު ބޭންކް އޮފް ސިލޯނަށް ފައިސާ ޖަމާކުރުމަށް ދިޔަ ރޫޓު ގެ ވެހިކަލްގައި ތިބި މުވައްޒަފުންނަށް ހަމަލާދީ، އެ ވެހިކަލްގައި ހުރި ހަތަރު މިލިއަނަށްވުރެ ގިނަ ރުފިޔާ ފޭރުނު މައްސަލާގައި އަމަލީގޮތުން ބައިވެރިވިކަމުގެ ތުހުމަތުގައި ހަތް މީހަކު ފުލުހުން ހައްޔަރުކުރިއެވެ.

މި މައްސަލައިގައި ދިވެހިރާއްޖޭގެ ޤާނޫނުލް އުޤޫބާތުގެދަށުން ފޭރުމުގެ ކުށުގެ ދަައުވާ އުފުލާފައިވާ 4 މީހުންވެސް ވަނީ އެމީހުންގެ މައްޗަށް އުފުލާފައިވާ ފޭރުމުގެ ކުށުގެ ދަޢުވާ އަށް ކްރިމިނަލްކޯޓުގެ ޝަރީޢަތުގެ މަޖިލީހުގައި އިއުތިރާފުވެފައެވެ. އެހެންކަމުން ޝަރީޢަތުންވަނީ އެ 4 މީހުންގެ މައްޗަށް ކުށް ސާބިތުވާކަމަށް ކަނޑައަޅައި އަވަސް ނިޔާގެ ދަށުން ޙުކުމް އިއްވުން މިމަހުގެ ވިއްސަށް ތާވަލުކޮށްފައެވެ.

މައްސަލާގައި ކުށަށް އިޢުތިރާފްވުމުގެ ސަބަބުން ކުށް ސާބިތުވެފައިވަނީ ލ. ގަން ތުނޑި، ކީމިޔާގެ، ޢަބްދުﷲ ރާޝިދުއާއި، ގއ. ވިލިނގިލި، ކަނީރުމާގެ، މުޙައްމަދު މުސްޢަބު ޒުބައިރުއާއި، ކ. މާލެ، ދަފްތަރު ނަންބަރު ރސ 3678، ޙުސައިން ޢަބްދުލްމަޖީދުއާއި، ކ. މާލެ، ވ. ޕިންކްވިލާ، އަޙްމަދު އަމީރުގެ މައްޗަށެވެ.

މި ޙާދިސާގެ ވީޑިއޯއިން ފެންނަގޮތުގައި ދެ ސައިކަލެއްގައި 4 މީހަކު ގޮސް، ބޭންކް އޮފް ސިލޯން ކުރިމައްޗަށް މަޑުކޮށްލައެވެ. އޭރު ފައިސާ ހިފައިގެން އައި ރޫޓުގެ ވެހިކަލް ވެސް އެތަނަށް މަޑުކުރަނީއެވެ. ބެލެވޭ ގޮތުގައި މި ހަތަރު މީހުން އައީ ފައިސާ ގެނައި ވެހިކަލަށް ފާރަލަމުން އޭގެ ފަހަތުންނެވެ.

އޭގެތެރެއިން ދެމީހުންވަނީ ވެހިކަލުގެ ދޮރު ހުޅުވާލުމާއެކު ސައިކަލުން ފައިބައިގެން ގޮސް ވެހިކަލުން ފޭބި މީހުންނަށް ޙަމަލާދީފައެވެ. 4.2 މިލިއަނެއްހާ ރުފިޔާ ޖަމާކުރަން ބޭންކް އޮފް ސިލޯނަށް ގެންދިޔަ މަގުމަތީގައި ބަޔަކު ފޭރެން މަސައްކަތް ކުރި ނަމަވެސް އެ ވަގުތު އެތާނގައިތިބި މުވައްޒަފުންނާއި ބޭންކުގެ ސެކިއުރިޓީން ފޭރެން އުޅުނު މީހުންނަށް ހުރަސް އަޅައި ހިފަހައްޓައި ފައިސާތައް ވަނީ ސަލާމަތްކޮށްފައެވެ.