ރޫޓު ފިހާރައިން ބޭންކް އޮފް ސިލޯނަށް ޖަމާކުރުމަށް ގެންދިޔަ 4.2 މިލިއަން ދިވެހި ރުފިޔާ ފޭރުނު މައްސަލައިގައި ފޭރުމުގެ ކުށުގެ ދައުވާ ސާބިތުވެ 4 މީހަކަށް 2 އަހަރާ 4 މަހާއި 24 ދުވަހުގެ ޖަލު ޙުކުމެއް އިއްވައިފިއެވެ.

2020 ވަނަ އަހަރުގެ އޮކްޓޯބަރު މަހުގެ 25 ވަނަ ދުވަހު ބޭންކް އޮފް ސިލޯނަށް ފައިސާ ޖަމާކުރުމަށް ދިޔަ ރޫޓު ގެ ވެހިކަލްގައި ތިބި މުވައްޒަފުންނަށް ހަމަލާދީ، އެ ވެހިކަލްގައި ހުރި ހަތަރު މިލިއަނަށްވުރެ ގިނަ ރުފިޔާ ފޭރުނު މައްސަލާގައި އަމަލީގޮތުން ބައިވެރިވިކަމުގެ ތުހުމަތުގައި ހަތް މީހަކު ފުލުހުން ހައްޔަރުކުރިއެވެ.

މި މައްސަލައިގައި ދިވެހިރާއްޖޭގެ ޤާނޫނުލް އުޤޫބާތުގެދަށުން ފޭރުމުގެ ކުށުގެ ދަައުވާ އުފުލާފައިވާ 4 މީހުންވެސް ވަނީ އެމީހުންގެ މައްޗަށް އުފުލާފައިވާ ފޭރުމުގެ ކުށުގެ ދަޢުވާއަށް ކްރިމިނަލްކޯޓުގެ ޝަރީޢަތުގެ މަޖިލީހުގައި އިއުތިރާފުވެފައެވެ. އެހެންކަމުން ކްރިމިނަލް ކޯޓުގެ ގާޒީ ޙަސަން ސައީދުވަނީ އެ 4 މީހުންގެ މައްޗަށް ކުށް ސާބިތުވާކަމަށް މީގެކުރިން ކަނޑައަޅާފައެވެ.

މި ކުށުގެ އަސާސީ އަދަބަކީ 3 އަހަރާއި 2 މަހާއި 12 ދުވަހަށް ޖަލަށް ލުމެވެ. ނަމަވެސް އެމީހުން އިބްތިދާއީ މަރުޙަލާއާއި އަވަސްނިޔާގެ ޝަރީއަތުގެ މަރުޙަލާގައިވެސް ކުށަށް އިއުތިރާފުވެފައިވާތީއާއި، އަދަބު މަތި ކުރާނެ ޙާލަތެއް ނެތުމާއެކު، އެމީހުންނަށް އިއްޔެ އިއްވާފައިވަނީ 2 އަހަރާ 4 މަހާއި 24 ދުވަހުގެ ޖަލު ޙުކުމެކެވެ. ނަމަވެސް އެމީހުން ބަންދުގައި ތިބި މުއްދަތު ޙުކުމުން ކެނޑުމުން އެމީހުން ޖަލުގައި ތަންފީޒު ކުރަން ޖެހެނީ ގާތްގަނޑަކަށް އަހަރު ދުވަހުގެ މުއްދަތެކެވެ.

މައްސަލާގައި ކުށަށް އިޢުތިރާފްވުމުގެ ސަބަބުން ކުށް ސާބިތުވެ ޙުކުމް އިއްވާފައިވަނީ ލ. ގަން ތުނޑި، ކީމިޔާގެ، ޢަބްދުﷲ ރާޝިދުއާއި، ގއ. ވިލިނގިލި، ކަނީރުމާގެ، މުޙައްމަދު މުސްޢަބު ޒުބައިރުއާއި، ކ. މާލެ، ދަފްތަރު ނަންބަރު ރސ 3678، ޙުސައިން ޢަބްދުލްމަޖީދުއާއި، ކ. މާލެ، ވ. ޕިންކްވިލާ، އަޙްމަދު އަމީރުގެ މައްޗަށެވެ.

މި ޙާދިސާގެ ވީޑިއޯއިން ފެންނަގޮތުގައި ދެ ސައިކަލެއްގައި 4 މީހަކު ގޮސް، ބޭންކް އޮފް ސިލޯން ކުރިމައްޗަށް މަޑުކޮށްލައެވެ. އޭރު ފައިސާ ހިފައިގެން އައި ރޫޓުގެ ވެހިކަލް ވެސް އެތަނަށް މަޑުކުރަނީއެވެ. ބެލެވޭ ގޮތުގައި މި ހަތަރު މީހުން އައީ ފައިސާ ގެނައި ވެހިކަލަށް ފާރަލަމުން އޭގެ ފަހަތުންނެވެ.

އޭގެތެރެއިން ދެމީހުންވަނީ ވެހިކަލުގެ ދޮރު ހުޅުވާލުމާއެކު ސައިކަލުން ފައިބައިގެން ގޮސް ވެހިކަލުން ފޭބި މީހުންނަށް ޙަމަލާދީފައެވެ. 4.2 މިލިއަނެއްހާ ރުފިޔާ ޖަމާކުރަން ބޭންކް އޮފް ސިލޯނަށް ގެންދިޔަ މަގުމަތީގައި ބަޔަކު ފޭރެން މަސައްކަތް ކުރި ނަމަވެސް އެ ވަގުތު އެތާނގައިތިބި މުވައްޒަފުންނާއި ބޭންކުގެ ސެކިއުރިޓީން ފޭރެން އުޅުނު މީހުންނަށް ހުރަސް އަޅައި ހިފަހައްޓައި ފައިސާތައް ވަނީ ސަލާމަތްކޮށްފައެވެ.