ސ. ހިތަދޫ، މަންދޫބުގެ، ރުޝާން އަޙްމަދުދީދީ ދޫކޮށްލަން، އައްޑޫ ސިޓީ ހިތަދޫ މެޖިސްޓްރޭޓް ކޯޓުން އަމުރުކުރީ ބޭސްފަރުވާގެ ބޭނުމަށް އޭނާ ދޫކޮށްލުމަށް ހުރަހެއްއޮތްކަމަށް ނުދެކޭކަމަށް ޕީޖީގެ ވަކީލުން ކޯޓުގައި ބުނުމުން ކަމަށް ހިތަދޫ ކޯޓުން ބުނެފިއެވެ.

ހިތަދޫ މެޖިސްޓްރޭޓް ކޯޓުން ބޭސްފަރުވާއަށް ދޫކޮށްލުމަށް އަމުރުކޮށްފައި ވަނީ، 2020 ވަނަ އަހަރު ރާއްޖެއަށް 80 ކިލޯގެ މަސްތުވާތަކެތި އެތެރެ ކުރި މައްސަލައިގައި ދައުވާ ކޮށްފައިވާ ހިތަދޫ މަންދޫބުގޭ ރުޝާން އަހުމަދުދީދީ އެވެ. އޭނާ ޝަރީއަތް ނިމެންދެން ބަންދުކުރުމަށް ހައިކޯޓުން މީގެ ކުރިން ވަނީ އަމުރުކޮށްފައެވެ.

ރުޝާން 90 ދުވަހަށް ދޫކޮށްލުމަށް ހިތަދޫ ކޯޓުން ނިންމި މައްސަލާގައި ފްރޮސިކިއުޓާ ޖެނެރަލް ހުސައިން ޝަމީމް ވިދާޅުވީ ހައިކޯޓުގެ ޙުކުމެއް ދިރި އޮއްވާ، އެހުކުމް ސަސްޕެންޑުކުރުމަކީ ދަށުކޯޓަކުން މެޖިސްޓްރޭޓަކު ކުރާ ކަހަލަ ކަންކަމެއްނޫންކަމަށެވެ. އަދި މިގޮތަށް ނިންމާ މައްސަލަ ހައިކޯޓުގައި އިސްތިއުނާފުކޮށް، ޖޭއެސްސީގައި ޝަކުވާ ވެސް ކުރާނެ ކަމަށް ޝަމީމް ވިދާޅުވިއެެވެ.

ނަމަވެސް ހިތަދޫ ކޯޓުން ނެރުނު ބަޔާނުގައި ބުނެފައިވަނީ ޕީޖީ ޝަމީމް ކުރަށްވާފައިވަނީ އެމަގާމުގައިހުރެ ކުރުން އެކަށީގެންވާ ކަމެއް ނޫންކަމަށެވެ. އަދި ޝަމީމްގެ އަމަލުގެ ސަބަބުން މީޑިއާގައި ކަންހިނގި ގޮތާ ޚިލާފަށް ޚަބަރު ފެތުރިފައިވާކަމަށް ހިތަދޫ ކޯޓުން ވަނީ ބުނެފައެވެ.

އެ ބަޔާނުގައި ވަނީ ހައިކޯޓުގެ އަމުރެއްގެ ބާރުކެނޑޭ ގޮތަށް ހިތަދޫ ކޯޓުން އަމުރުކުރެވިދާނެތޯ ސުވާލުކޮށް އެކަމާމެދު ޕީޖީގެ ހަތަރު ވަކީލުން ހިމެނޭގޮތަށް، ދެ ޚަސްމުން ދެކޭގޮތް ޝަރީއަތަށް ހުށަހެޅުމަށް ފުރުސަތުދިން ކަމަށެވެ. އަދި އޭގެ ތިން ދުވަސް ފަހުން ރުޝާން ދޫކޮށްލީ ހައިކޯޓުގެ އަމުރު އެގޮތުގައި އޮތްނަމަވެސް އޭނާގެ ބަންދު މުރާޖަޢާ ކުރުމަށްފަހު ދޫކޮށްލަންޖެހޭ ސަބަބުތަކެއް ހުރިނަމަ ދޫކޮށްލުމަށް ހުރަހެއް އޮތްކަމަށް ނުދެކޭކަމަށް ޕީޖީގެ ވަކީލުން ކޯޓުގައި ބުނުމުން ކަމަށްވެސް އެ ބަޔާނުގައިވެއެވެ.

ހައިކޯޓުގެ އަމުރެއް ސަސްޕެންޑްކޮށް އައްޑު އަތޮޅު ހިތަދޫ މެޖިސްޓްރޭޓް ކޯޓުން މިގޮތަށް އަމުރު ނެރުނު ނަމަވެސް ކޯޓުތަކާއި ބެހޭ ގާނޫނުގައި ބުނާގޮތުން ހައިކޯޓުގެ އަމުރަކަށް ބަދަލު ގެނެވޭނީ ހަމައެކަނި ސްޕްރީމް ކޯޓަށެވެ. މަތީ ކޯޓުގެ ނިންމުންތަކާ އެއްގޮތަށް އަމަލުކުރުމަށް ކޯޓުތަކާއިބެހޭ ގާނޫނުން ވަނީ ދަށު ކޯޓުތަކަށް ލާޒިމްކޮށްފައެވެ.