ޕީޖީ އޮފީހުގެ މުވައްޒަފުންނަކީ، ސިކުނޑީގެ ހުނަރު ވިއްކައިގެން، ކައިގެން ބޮއިގެން އުޅޭ ބައެއް ކަމަށް ޕްރޮސިކިއުޓަރ ޖެނެރަލް ޙުސައިން ޝަމީމް ވިދާޅުވެއްޖެއެވެ.

ބަންޑާރަ ނައިބު އޮފީހުގެ ރެކްރިއޭޝަން ކުލަބު، ބަންޑާރަ ކުލަބުން އިސްނަންގަވައިގެން، ކުރިއަށް ގެންދަވާ ބަންޑާރަ ކަޕާ ގުޅިގެން ޝަމީމް އޭނާގެ އަމިއްލަ ބްލޮގްގައި ވިދާޅުވީ ޕީޖީ އޮފީހުގެ މުވައްޒަފުންނަކީ، އެމީހުންގެ ސިކުނޑީގެ ހުނަރު ވިއްކައިގެން، ކައިގެން ބޮއިގެން އުޅޭ ބައެއް ކަމަށެވެ. އެހެންކަމުން ސިކުނޑީގެ ދުޅަހެޔޮކަން އިތުރުކޮށް، ނަފްސާނީ ބަލިތަކުން ދުރުވެ ތިބުމަށްޓަކައި، ހަށިގަނޑުގެ ދުޅަހެޔޮކަމަކީ ކޮންމެހެން ފުރިހަމަވާންޖެހޭ އަސާސީ ކަމެއްކަން ޝަމީމް ފާހަގަކުރެއްވިއެވެ.

"ދުޅަހެޔޮ ޞިއްޙަތެއްގައި ތިބުމުގެ ސަޤާފަތެއް އާލާވުމުން، އެކަމުގެ ފައިދާ، އޮފީހަށާއި، މުވައްޒަފަށާއި، މުވައްޒަފުގެ ޢާއިލާއަށްވެސް ކުރާނެއެވެ. ބަންޑާރަ ކަޕަކީ، އެމަގަށް ވާޞިލުވުމަށް ކޮށުނު މަގެއް ކަމަށް ބަލައިގެން، ހުރިހާ އިދާރާއަކުން މަސައްކަތް ކޮށްފިނަމަ، މިއީ އަހަރަކު އެއްފަހަރު ބާއްވާ ފުޓްސަލް މުބާރާތަކަށްވުރެ މާ ބޮޑު ކަމަކަށްވާނެއެވެ." ޝަމީމް ވިދާޅުވެފައިވެއެވެ.

ޝަމީމް ވިދާޅުވީ ބަންޑާރަކަޕުން ދެކަމެއް ޙާޞިލުވާނެ ކަމަށެވެ. ފުރަތަމަ ކަމަކީ، ކުޅިވަރުގެ ތެރެއިން އުފެދޭ ގުޅުންތަކުން، މޫނެއް ނެތް ނަންތަކަކަށް މޫނެއް ލިބުން ކަމަށާއި އަދި ދެވަނަ ކަމަކީ، ކުޅިވަރުން ދަސްކޮށްދޭ އެހެނިހެން އަޚްލާޤުތައްކަން ޝަމީމް ފާހަގަކުރެއްވިއެވެ.

"ކުޅިވަރަކީ ކުޅިވަރެއް ނޫނެވެ. ކުޅިވަރަކީ އެތައް ކަމެއް ދަސްކޮށްދޭ ބާރުގަދަ އިޖްތިމާޢީ ޙަރަކާތެކެވެ." ޝަމީމް ވިދާޅުވެފައިވެއެވެ.

ޝަމީމް ވިދާޅުވީ ޤާނޫނީ ޒުވާބެއްގައި ދެކޮޅު އޮންނައިރު، ކޮންމެވެސް އެއްބަޔަކުގެ ކޮޅު ބަލިވާނެ ކަމަށެވެ. އެހެންނަމަވެސް ބަލިވާ ޓީމާއި މޮޅުވާ ޓީމުވެސް، އެއްބަޔަކު އަނެއް ބަޔަކަށް އިޙްތިރާމް ކުރަން ކުޅިވަރުގެ ތެރެއިން ދަސްވާކަމަށާއި އެކަކު އަނެކަކަށް ޒާތީގޮތުން ޒުވާބުނުދީ، އެކުގައި ސައި ބޮއިލެވޭ ވަރުގެ ގުޅުމެއް ދަމަހައްޓަން ދަސްކޮށްދޭކަމަށް ޝަމީމް ވިދާޅުވިއެވެ. ހަމައެއާއެކު ކުޅިވަރުގެ ތެރެއިން ޓީމެއްގެ ގޮތުގައި މަސައްކަތްކުރުމަށް ދަސްވާނެކަމަށް ޝަމީމް ވިދާޅުވިއެވެ.

"ފުޓްސަލްއަކީ ޓީމް ކުޅިވަރެކެވެ. ކުޅިވަރުގެ ތެރެއިން ދަސްވާ ކަމަކީ، ޓީމެއްގެ ގޮތުގައި މަސައްކަތްކޮށް، ކާމިޔާބު ޙާޞިލުކުރާށެވެ. މަސައްކަތުގައިވެސް ހަމަ އެގޮތެވެ. އަޅުގަނޑުމެން ކޯޓަށް ގޮސް، ވަކާލާތުކޮށް، މަސައްކަތްކުރަނީ ޓީމެއްގެ ގޮތުގައެވެ. ތިމާއަށް ނޭނގޭ މަޢުލޫމާތެއް، ނުވަތަ ޤަޟިއްޔާއެއް، ނުވަތަ މައުޟޫޢެއް އެހެން މީހަކަށް އެނގޭނަމަ، އޭނާގެ އެހީތެރިކަން ލިބެއެވެ. ނިމޭ ރޮނގު ހުރަސްކުރާނީ އެންމެން އެއްކޮށް ގޮހެވެ. އެންމެން ގޮވައިގެންނެވެ." ޝަމީމް ވިދާޅުވެފައިވެއެވެ.