އެސްޓީއޯ ޕީޕަލްސް ޗޮއިސްގެ 136 ސޭލްސް އެޖެންޓުން ތައާރަފްކޮށްފިއެވެ.

އެސްޓީއޯއިން ބުނީ އެ ކުންފުނީގެ ދަށުން ހިންގާ އެސްޓީއޯ ޕީޕަލްސް ޗޮއިސްގެ އެޖެންޓުންގެ ގޮތުގައި 136 ފަރާތެއް ކަނޑައަޅާފައިވާކަމަށެވެ. އަދި މިއަދު އޮތް ރަސްމިއްޔާތެއްގައި އެޖެންޓުންނަށް ވަނީ ސެޓްފިކެޓް ވެސް ހަވާލުކޮށްފަ އެވެ.

އެސްޓީއޯގެ މި އެޖެންޓުން މެދުވެރިކޮށް އެސްޓީއޯ ޕީޕަލްސް ޗޮއިސްގެ އިތުރުން ހޯމް އިމްޕްރޫވްމެންޓުން ވިއްކާ އިލެކްޓްރޯނިކް ސާމާނު ވެސް ރަށްރަށުން ލިބެން ހުންނާނެ ކަމަށް އެކުންފުނިން ވަނީ ބުނެފައެވެ. އެ ކުންފުނިން ބުނީ އެސްޓީއޯ ޕީޕަލްސް ޗޮއިސް އެޖެންޓް ތައާރަފުކުރުމުގެ މައިގަނޑު މަގްސަދަކީ އެސްޓީއޯއިން އެތެރެކޮށް ވިއްކާ ބުރޭންޑްތަކުގެ މުދާ ރާއްޖޭގެ ކޮންމެ ސަރަހައްދެއްގައި ވެސް ފަސޭހައިން ލިބޭނެ ގޮތް މަގު ފަހިވެ، އަތޮޅުތަކުގައި ތިބި ކުދި އަދި މެދު ފަންތީގެ ވިޔަފާރިތައް ކުރިއެރުވުން ކަމަށެވެ.

އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ވިދާޅުވީ އެސްޓީއޯގެ އެޖެންޓުން ރަށްރަށުގައި ހަމަޖެހުމާއި ގުޅިގެން ތަކެތީގެ އަގު އެއް ހަމައެއްގައި ހިފެހެއްޓިފައި ހުންނާނެ ކަމަށާއި ކުދި އަދި މެދުފަންތީގެ ވިޔަފާރިތައް ކުރިއެރުމަށްވެސް އިތުރު ބާރެއް ލިބޭނެ ކަމަށެވެ.

އެސްޓީއޯ އިން މީގެ ކުރިން ވަނީ ކާޑުގެ ބާވަތްތައް ވިއްކުމަށް ކާޑު އެޖެންޓުންނާއި ކޮންސްޓްރަކްޝަން އެޖެންޓުން ތައާރަފްކޮށްފަ އެވެ. މުޅި ރާއްޖޭގައި ކާޑު އެޖެންޓުގެ ގޮތުގައި 256 މީހުންނާއި ކޮންސްޓްރަކްޝަން އެޖެންޓުންގެ ގޮތުގައި 56 ފަރާތެއް އެބަ ތިއްބެވެ.