ދީނީ ވާހަކަ ދެއްކުމުގައި އިޚްލާސްތެރިވުމަށާއި މިހާރު ދީނީ ވާހަކަ ތިޔަ ދައްކަވަނީ ރައްޔިތުންނާއި ގައުމަށް ހެޔޮއެދިގެންތޯ ވިދާޅުވެ، ރައްޔިތުންގެ މަޖިލީހުގެ ކުރީގެ މެމްބަރު ބްރިގޭޑިއަރ ޖެނެރަލް ރިޓަޔަރޑް އިބްރާހިމް މުޙައްމަދު ދީދީ، ޑރ ޖަމީލާ ބޮޑު ސުވާލެއް ކުރިމަތިކުރައްވައިފިއެވެ.

ލޮކްޑައުންގައި ރައްޔިތުންގެ މަޖިލިސް ބޭއްވޭނަމަ މިސްކިތްތައްވެސް މިހާރުން މިހާރަށް ހުޅުވާލުމަށް ގޮވާލާ ޑރ. ޖަމީލް ކުރައްވާފައިވާ ޓްވީޓަކަށް ރައްދު ދެއްވަމުން ބްރިގޭޑިއަރ ޖެނެރަލް ޑީޑީ ވިދާޅުވީ، ދީނީ ވާހަކަ ދައްކަން ޖެހޭނީ އިޚްލާސްތެރިކަމާ އެކުގައި ކަމަށާއި، ސިޔާސީ މަންފާ ހާސިލް ކުރުމަށް ދީން ބޭނުން ކުރުމަކީ ކޮށްގެންވާނެ ކަމެއް ނޫން ކަމަށެވެ.

"ތިޔައީ ރައްޔިތުންނާ ޤައުމަށް ހެޔޮ އެދިގެން ދައްކާ ވާހަކައެއްތޯ؟ ނުވަތަ މުޅި ރާއްޖެއަށް ބަލި ފެތުރި ރައްޔިތުން ނުރައްކަލަށް ހުށައެޅި ޤައުމު ސުންނާފަތިވުން އެދިވަޑައިގެން ސިޔާސީ ގޮތުން ދައްކަވާ ވާހަކަފުޅެއް ނޫންތޯ؟ ރައްޔިތުންނަށް މިކަން ވަރަށް ސާފު!" ބްރިގޭޑިއަރ ޖެނެރަލް ޑީޑީ ވިދާޅުވިއެވެ.

މީގެ އިތުރުން ޑީޑީ ވަނީ ޑރ. ޖަމީލް ސިޔާސީވެ ވަޑައިގެންނެވި ނަމަވެސް މިހާރު ތީ ބޮޑުވަރުކަމަށް ވިދާޅުވެ ޑރ. ޖަމީލަށް ވަރަށް ބޮޑަށް ފާޑުވިދާޅުވެފައެވެ. ރައްޔިތުންގެ މަޖިލީހުގެ 87 މެމްބަރުން މަޖިލީހުގެ ޗެމްބަރުގައި ރައީސް ނަޝީދަށް ކޮންޓްރޯލް ކުރެއްވެވުނަސް، އެތައްހާސް ރައްޔިތުން ދުވާލަކު ފަސްފަހަރު މިސްކިތްތަކުގައި ކޮންޓްރޯލް ކުރުމަކީ ކުރެވޭނެ ކަމެއް ނޫންކަމަށް ބްރިގޭޑިއަރ ޖެނެރަލް ރިޓަޔަރޑް އިބްރާހިމް މުޙައްމަދު ދީދީ ވިދާޅުވެފައިވެއެވެ.

ރާއްޖޭގައި ކޯވިޑް-19 ކޮންޓްރޯލްވެފައި ނުވާކަން ފާހަގަކުރަށްވާ ބްރިގޭޑިއަރ ދީދީ ވަނީ، ދީނީ ވާހަކަ ދެއްކެވުމުގައި މިހާރަށްވުރެ ތެދުވެރިކަމާއި އިޚްލާސްތެރިކަމާއެކު ބުއްދީގެ ހަމަތަކުން ވާހަކަ ދެއްކެވުމަށް ޑރ. ޖަމީލަށް ނަސޭޙަތްތެރިވެ ވަޑައިގެންފައެވެ. އަދި ދީނީ ކަންތައްތަކާއި، ސިޔާސީ ކަންތައްތައް މަސްހުނި ނުކުރުމަށް އިރުޝާދު ދެއްވަމުން ބްރިގޭޑިއަރ ދީދީ ވަނީ އެމީހެއްގެ ހިތުގައި ވަންހަނާ ވެފައިވާ މަޤްޞަދުތައްވެސް ﷲ މޮޅަށް ދެނެވޮޑިގެންވާކަން ޑރ. ޖަމީލަށް ހަނދުމަކޮށްދެއްވާފައެވެ.