ގެވެށި އަނިޔާގެ މައްސަލައެއްގައި މިދިޔަމަހުގެ ދެވަނަ ދުވަހު ފުލުހުން ހައްޔަރުކުރި އިންޑިއާގެ ސްރިނިވަސަން ސުބްރަމަނިގެ މައްޗަށް ދަޢުލަތުން ކްރިމިނަލް ކޯޓުގައި ދަޢުވާ އުފުލައިފިއެވެ.

މާލޭގެ ގެއެއްގައި ބިދޭސީ އަންހެނަކަށް އޭނާގެ ފިރިމީހާ ގެވެށި އަނިޔާކުރި މައްސަލާގައި އަނިޔާ ލިބުނު އަންހެން މީހާގެ ފައިގެ ދެ ތަނަކަށް ތޫނު އެއްޗެއް ބޭނުންކޮށްގެން ޙަމަލާ ދީފައިވާއިރު ކުށުގެ ވެށީގައި ދެވަޅި އޮތްކަމަށް ފުލުހުން ބުނެއެވެ. އެ މައްސަލާގައި ފިރިހެން މީހާގެ މައްޗަށް ދައުވާ ކޮށްފައިވާއިރު އޭނާ އަނބިމީހާއަށް ޙަމަލާދިނީ ސިޓިންރޫމްގައި ނިދާފައި އޮށްވާ ކަމަށް ދަޢުވާގައި ވެއެވެ.

މ. ރިހިވިދުވަރު ގޭގެ ދެވަނަ ފްލޯގައި ހިނގި މި ޙާދިސާގައި އެތަނުން އެއްވަޅީގައި ތިލަނެތްކަމަށާއި އަންހެން މީހާ ހޮސްޕިޓަލަށް ގެންގޮސް އެކްސްރޭ ނެގުމުން އެއްވަޅީގެ ތިލަ އޮތީ އަންހެންމީހާގެ ފައިގެ ފަލަމަސްގަނޑުގެ ތެރޭގައިކަމަށް މައްސަލައިގެ ބަންދު މަޖިލީހުގައި ފުލުހުން ވަނީ ކޯޓުގައި ބުނެފައެވެ. ފުލުހުން ކުށުގެ ވެއްޓަށް ޙާޟިރުވުމުން މި ޙާދިސާގައި ހައްޔަރުކުރި ޢުމުރުން 27 އަހަރުގެ އިންޑިއާ ފިރިހެންމީހާ ވަނީ އޭނާގެ އަތުގައި އޮތް ވަޅި އަމިއްލަ ބަނޑަށް ހަރާލާފައެވެ.

ކޯޓުގައި ފިރިހެންމީހާ ބުނެފައިވަނީ އަނބިމީހާގެ ގަޔަށް ވަޅިހެރުނީ ދެމަފިރިންކުރި ޒުވާބެއްގެތެރެއިން ކަމަށާއި އޭނާގެ އަތުގައި އޮތް ވަޅި އަމިއްލަ ބަނޑަށް ހެރީ ފުލުހުން ފެނުމުން ބިރުން ކަމަށެވެ.

އެމައްސަލާގައި މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ކަމަށްޓަކައި ފިރިހެން މީހާ ހުރީ ކޯޓު އަމުރެއްގެ ދަށުން ފުލުހުންގެ ބަންދުގައެވެ.