ގއ. ކޮނޑޭ އަލަ އޮޅުތަކަށް ގޮތްނޭނގޭ ބައްޔެއް ޖެހި ދަނޑުވެރިން ކަންބޮޑުވުން ފާޅުކުރަން ފަށައިފިއެވެ.

އޮޅުއަލަ ހެއްދުމުގައި މުޅި ރާއްޖެއަށްވެސް މަޝްހޫރު ގއ ކޮނޑޭ ރައްޔިތުންނަކީ އަބަދުވެސް އޮޅުއަލަ ހައްދަމުން ގެންދާ ބައެކެވެ. އެރަށުގައި ހައްދާފައިވާ އަލަ އޮޅުތަކަށް މިދުވަސްވަރު ގޮތްނޭނގޭ ބައްޔެއްޖެހި ރައްޔިތުން ވަނީ މާޔޫސްވެފައެވެ.

"ރަސް އޮންލައިން" އަށް މަޢުލޫމާތު ދެއްވަމުން ގއ ކޮނޑޭ ވިޝާން ޙަސަން ވިދާޅުވީ، ގޮތްނޭނގޭ ބައްޔެއްގެ ސަބަބުން ރައްޔިތުން ބުރަ މަސައްކަތުން ހެއްދި އަލަ އޮޅުތައް މަރުވަމުންދާ ކަމަށާއި، އެކަމުގައި ބަލަހައްޓައިގެން ތިބުން ނޫންގޮތެއް އެ ރައްޔިތުންނަށް އަދި ނެތް ކަމަށެވެ. އޭނާ ވިދާޅުވީ ކޮނޑޭގައި 50 އަށްވުރެ ގިނަ އަލަ އޮޅު އޮންނާނެ ކަމަށާއި އޭގެ ތެރެއިން ގިނަ އޮޅު ތަކަށް މި މައްސަލަ ދިމާވެފައިވާ ކަމަށެވެ.



"މިވާގޮތަކީ، ފަތްތައް ދޮންވެފަ އަލަގަނޑާއެކު ފުޅަވެގެންދަނީ. މި ބަލި ފެނުނުތާ މިހާރު ދެމަސްވަރު ވެއްޖެ. ދަނޑުވެރިން މިކަމުގެ ޝަކުވާ ކައުންސިލާ ހިއްސާކުރުމުން އެދެވޭ ޖަވާބެއް ކައުންސިލުން ނުދިން ކަމަށް ދެ ދަނޑުވެރިއަކު ވަނީ ބުނެފަ." ވިޝާން ވިދާޅުވިއެވެ.

ކޮނޑޭ އަލައޮޅުތަކަށް ދިމާވެފައިވާ މައްސަލަތަކާ ގުޅޭގޮތުން ކޮނޑޭ ކައުންސިލްގެ ރައީސް އަޙްމަދު އަބްދުލް ޙަކީމް މި ނޫހަށް މަޢުލޫމާތު ދެއްވަމުން ވިދާޅުވީ، ކޮނޑޭ ދަނޑުތަކަށް ދިމާވެފައިވާ މައްސަލަތައް ޙައްލު ކުރުމާ ގުޅޭގޮތުން އެގްރިކަލްޗަރ މިނިސްޓްރީއާއި ގުޅިގެން އެ މައްސަލަތަކަށް ޙައްލެއް ހޯދުމުގެ މަސައްކަތް ކުރަމުން ގެންދާ ކަމަށެވެ. އަދި ރައްޔިތުންނަށް ކުރިމަތިވާ ކަންތައްތައް ކައުންސިލުން ވަރަށްގާތުން ބަލަމުން ގެންދާ ކަމަށް އޭނާ ވިދާޅުވިއެވެ.

ގއ. ކޮނޑޭ އަކީ އަބަދުވެސް ދަނޑުވެރިކަން ކޮށްގެން ޢާއްމު ކާބޯތަކެތި ހައްދަމުންދާ ބައެއް އުޅޭ ރަށެކެވެ. އޭގެތެރެއިން ބަނބުކޭލާއި، އޮޅުއަލަ އަކީ އެރަށުގައި އެންމެ ގިނައިން ހައްދާ ފަލަމަޑީގެ ބާވަތްތަކެވެ. އެހެން ނަމަވެސް ރާއްޖެއަށް ކުރަމުންދާ ވިއްސާރައިގައި އެރަށުގައި ހައްދާފައިވާ ގިނަ ޢަދަދެއްގެ ބަނބުކެޔޮގަސް ވަނީ ވެއްޓިފައެވެ. އަދި ރަށުގައި ކޮންމެސް ވަރަކަށް މިންޓްލީފް ވެސް ހައްދަމުން ގެންދެއެވެ.



"އެންމެ ފަހުން ކުރި ވިއްސާރައިގަ ބަނބުކެޔޮ 7 ގަސް ވަނީ ވެއްޓިފަ. އޭގެ އިތުރުން 100 އަށްވުރެ ގިނަ ފަތްކެޔޮ ގަހާއި، 4 ފެންފޯއް ރުކުގެ އިތުރުން 2 އަނބުގަހާ، 2 ރުއްވެސް ވަނީ ވެއްޓިފަ. އޭގެ ފަހުން މި އަލަ އޮޅުތަކަށް ބަލި ޖެހުނީ. މީ ހަމަ މިރަށުގެ ރައްޔިތުންގެ ރިހޭ ފައިމައްޗަށް ފޮއި ވެއްޓުން." ނޫހަށް މަޢުލޫމާތު ދެއްވަމުން ވިޝާން ވިދާޅުވިއެވެ.

ރާއްޖޭގައި ދަނޑުވެރިކަމުގެ ސިނާއަތު ކުރިއެރުވުމުގެ މަގްސަދުގައި ސަރުކާރުން ވަނީ އެގްރޯ ނެޝަނަލް ކޯޕަރޭޝަންގެ ނަމުގައި ކުންފުންޏެއް ވެސް އުފައްދާފައެވެ. އެ ކުންފުނީގެ މަގްސަދުތަކުގެ ތެރޭގައި ރާއްޖޭގެ ދަނޑުވެރިކަމުގެ އުފެއްދުންތައް ހަމަ އަގުގައި ގަނެ އެތަކެތި މާކެޓްކޮށް ވިއްކުމާއި ސަޕްލައިޗެއިން ތަރައްގީކުރުމަށް މަސައްކަތް ކުރުން ހިމެނިފައިވެއެވެ.



ރަށްރަށުގެ ދަނޑުވެރިންނަށް ދިމާވާ އެކިޙާލަތްތަކުގައި އެގްރޯނެޓުން އެ ރައްޔިތުންނަށް އެހީތެރިކަން ފޯރުކޮށްދޭނެ ކަމަށް މީގެ ކުރިން އެގްރޯނެޓުން ވަނީ ބުނެފައެވެ.