ރައީސް އޮފީހުގެ ކުރީގެ ލީގަލް އެފެއާޒު މިނިސްޓަރު އަލްއުސްތާޛާ އައިޝަތު އާޒިމާ ޝަކޫރުގެ މައްޗަށް ކުރާ ދެ ދައުވާގެ ޝަރީއަތް މަދަނީ މިންގަނޑުން ކުރިއަށް ގެންދެވޭނެކަމަށް ކްރިމިނަލް ކޯޓުން މިއަދު ނިންމައިފިއެވެ.



އާޒިމާގެ މައްޗަށް އުފުލާފައިވަނީ ރަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާއާއި މަނީ ލޯންޑަރިންނަށް މަގުފަހިކޮށްދިނުމުގެ ދައުވާއެވެ. އާޒިމާގެ މައްޗަށް ދޮގު މައުލޫމާތު ދިނުމުގެ ދައުވާ ކުރަނީ ވެރިކަމުގައި ހުންނަވައިގެން މަނީލޯންޑަރ ކުރެއްވި ކަމުގެ ކުށް ދަށުކޯޓާއި ހައިކޯޓުގައި ސާބިތުވި ކުރީގެ ރައީސް ޢަބްދުالله ޔާމީންގެ އެކައުންޓަށް ޖަމާވި އެއްމިލިއަން ޑޮލަރު އެސްކްރޯ އެކައުންޓަށް ޖަމާކުރި މައްސަލައިގައި އެންޓި ކޮރަޕްޝަން ކޮމިޝަނަށް އާޒިމާ ދޮގު މައުލޫމާތު ދެއްވާފައިވާ ކަމަށް ބުނާ މައްސަލައިގައެވެ.

އަދި މަނީ ލޯންޑްރިންއަށް މަގުފަހިކޮށްދިނުމުގެ ދައުވާ ކުރަނީ އެ ފައިސާ އެސްކްރޯ އެކައުންޓަށް ޖަމާނުކޮށް، އިންވެސްޓްމަންޓް އެކައުންޓަކަށް ބަދަލުކުރުމުގައި ބޭންކުން ލިޔުމެއް ހޯދުމުގައި އާޒިމާ މަސައްކަތް ކުރަށްވައި، އެ ފައިސާ އަސްލު އޮޅުވާލަން މަސައްކަތް ކުރެއްވި ކަމަށް ތުހުމަތުކޮށެވެ. އާޒިމާގެ މައްޗަށް މި ދައުވާތައް އުފުލާފައިވަނީ 2019 ވަނަ އަހަރުގެ ފެބްރުއަރީ މަހުގެ 17 ވަނަ ދުވަހު އެވެ.

މި ދަޢުވާތަކަށް އާޒިމާވަނީ އިންކާރު ކުރައްވާފައެވެ. އަދި ރައީސް ޔާމީންގެ މައްޗަށް ސުޕްރީމްކޯޓުން އިއްވާފައިވާ ޙުކުމްގެ މައްޗަށް ރިޢާޔަތްކޮށް މި މައްސަލަ މަދަނީ މިންގަނޑުން ކުރިއަށް ނުގެންދެވޭނެކަމަށް ކަނޑައެޅުއްވުމަށް އާޒިމާ ވަނީ ޝަރީޢަތުގެ މަޖިލީހުގައި އެދިވަޑައިގެންފައެވެ. އާޒިމާ ވިދާޅުވީ މަދަނީ މިންގަނޑުން މައްސަލަ ކުރިއަށް ގެންދެވޭނީ އޭނާ ކުރެއްވި އަމަލެއްގެ ސަބަބުން މަނީ ލޯންޑަރިން ހިންގަން ފުރުސަތު ލިބުނު ކަމުގެ ހެކި ހުރެގެން ކަމަށެވެ. ނަމަވެސް ދައުވާ ސާބިތުކުރުމަށް ހުށަހަޅާފައިވާ ހެކީގެ ތެރޭގައި ހިމެނޭ ނޯޓްގައި އޮތީ ދައުވާގައި ބުނާ މައްސަލާގައި ހިމެނޭ އެކައުންޓް ނަންބަރު ނޫން ކަމަށް އާޒިމާ މިއަދު ވިދާޅުވިއެވެ.

ދައުލަތުގެ ވަކީލް މިއަދު ވިދާޅުވީ ޖިނާއީ އިޖުރާއާތުގެ 115 ވަނަ މާއްދާގައި އޮތީ، މަދަނީ މިންގަނޑުން ޝަރީއަތް ކުރިއަށް ގެންދިއުމުގައި ފަނޑިޔާރުން ރިއާޔަތްކުރައްވަންޖެހޭނީ ހުށައަޅާފައިވާ ދައުވާ އާއި އެ ދައުވާ ސާބިތުކުރުމަށް ހުށަހަޅާފައިވާ ހެކިތަކަށް އެކަނި ކަމަށެވެ. އަދި މި މަރުޙަލާގައި ހެއްކާއި ބޭހޭގޮތުން ވާހަކަދައްކަން ނުޖެހޭނެ ކަމަށް ދަޢުލަތުގެ ވަކީލް ވިދާޅުވިއެވެ.

މިއަދުގެ އަޑުއެހުމުގައި ދައުލަތުން ވަނީ އާޒިމާގެ މައްޗަށް ދަޢުވާ އުފުލާފައިވާ ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާ ސާބިތުކުރުމަށް 11 ހެއްކެއް ހުށަހަޅައިފަ އެވެ. އަދި މަނީ ލޯންޑަރިންއަށް މަގު ފަހިކޮށްދިނުމުގެ ކުށުގެ ދައުވާ ސާބިތުކުރުމަށް 20 ހެއްކެއް ހުށަހެޅި އެވެ. އާޒިމާގެ ފަރާތުންވެސް ވަނީ ދިފާއުގައި ގިނަ ހެކިތަކެއް ހުށައަޅާފައެވެ.

މިއަދުގެ އަޑުއެހުން ނިންމާލައްވަމުން ޤާޟީ އަލީ އާދަމް ވިދާޅުވީ މި މަރުޙަލާއަކީ ހެކިތަކުގެ ފުނަށް ފަނޑިޔާރު ވާސިލުވާން ޖެހޭ މަރުޙަލާއެއް ނޫން ކަމަށެވެ. މަދަނީ މިންގަނޑަކީ ޝަރީއަތަށް ބުރަވެވޭ ބުރެވެވުމެއް ކަމަށާއި ހެކި ވަޒަންކުރުން ނޫން ކަމަށް ޝަރީއަތުން ފާހަގަކުރި އެވެ. އެހެންކަމުން އާޒިމާ ޝަކޫރުގެ މައްޗަށް ކުރާ ދެ ދައުވާގެ ޝަރީއަތް މަދަނީ މިންގަނޑުން ކުރިއަށް ގެންދެވޭނެކަމަށް ކްރިމިނަލް ކޯޓުން މިއަދުވަނީ ކަނޑައަޅުއްވާފައެވެ.

އާޒިމާ މިއަދުވަނީ އެނިންމެވުން އިސްތިޢުނާފް ކުރާނެކަމަށް ވިދާޅުވެފައެވެ.

މަނީ ލޯންޑަރިންނާއި ޓެރަރިޒަމް ފައިނޭންސް ކުރުން ހުއްޓުވުމުގެ ގާނޫނުގެ ދަށުން އާޒިމާގެ މައްޗަށް، މަނީ ލޯންޑަރ ކުރުމަށް މަގުފަހިކޮށްދިނުމުގެ ދައުވާ އުފުލާފައިވާ އިރު އެ މައްސަލަ ސާބިތުވެއްޖެ ނަމަ 50،000 ރުފިޔާ އާއި 500،000 ރުފިޔާއާ ދެމެދުގެ އަދަދަކުން އޭނާ ޖޫރިމަނާކުރާާނެއެވެ. ނުވަތަ ދެ އަހަރާއި 10 އަހަރާއި ދެމެދުގެ ޖަލު ހުކުމެއް އިއްވާނެއެވެ.

ގާނޫނުލް އުގޫބާތުގެ 521 ވަނަ މާއްދާގެ ދަށުން ރަސްމީ އިދާރާއަކަށް ދޮގު މައުލުމާތު ދިނުމުގެ ދައުވާ އާޒިމާގެ މައްޗަށް އުފުލާފައިވާ އިރު އެ މައްސަލައިގައި އަދަބު ކަނޑައެޅުމުގެ އަސާސީ މިންގަނޑަކީ ހަތަރު މަހާއި 24 ދުވަހެވެ. އެ މައްސަލަ ސާބިތުވެއްޖެ ނަމަ އަންނާނެ އެންމެ ބޮޑު އަދަބަކީ އެއް އަހަރު ދުވަހުގެ ޖަލު ހުކުމެކެވެ.