ރާއްޖޭގައި މަރުގެ ހުކުމް ތަންފީޒު ކުރުމާގުޅޭގޮތުން ސަރުކާރުން ގެންގުޅޭ ސިޔާސަތަކީ ކޮބައިކަން ސާފުކުރުމަށް ހޯމް މިނިސްޓަރ ޝެއިޚް އިމްރާން ޢަބްދުﷲ، ރައްޔިތުންގެ މަޖިލީހަށް ހާޒިރުކޮށްދޭން އެދިއްޖެއެވެ.

ހޯމް މިނިސްޓަރ މަޖިލީހަށް ހާޒިރުކޮށްދޭން އެދިވަޑައިގެންފައިވަނީ މަހިބަދޫ ދާއިރާގެ މެންބަރު އަޙްމަދު ޠާރިޤެވެ. އިދިކޮޅު ޕީޕީއެމްގެ ފަރާތުން މެންބަރު އަޙްމަދު ޠާރިޤް މިއަދު މަޖިލީހަށް ފޮނުވި، ވަޒީރުންނާ ސުވާލު ކުރުމުގެ ނޯޓިސްގައި ވިދާޅުވެފައިވަނީ، ދިވެހިރާއްޖޭގެ ސްޕްރީމް ކޯޓުން މަރުގެ ހުކުމް ކޮށްފައިވާ ފަރާތްތަކުގެ ތެރެއިން ހުކުމް ތަންފީޒު ކުރުމަށް އިސްލާމީ ޝަރީޢަތުގައިވާ ގޮތުގެމަތިން ހުރިހާ އިޖުރާޢަތްތަކެއް ފުރިހަމަވާ ގައިދީންގެ މައްޗަށް މަރުގެ ހުކުމް ތަންފީޒު ކުރުމާމެދު މި ސަރުކާރުގެ ސިޔާސަތަކީ ކޮބައިކަން ސާފު ކުރައްވަން ބޭނުންވެވަޑައިގަންނަވާ ކަމަށެވެ.

އަދި އެފަދަ ފަރާތްތަކުގެ ހުކުމް މި ސަރުކާރުން ތަންފީޒު ކުރާނެކަން ނުވަތަ ނޫންކަން ސާފު ކުރުމަށް ވެސް މަޖިލީހަަށް ޠާރިޤް ފޮނުއްވި ނޯޓިސްގައި އެދިވަޑައިގެންފައިވެއެވެ.

މަޖިލީހަށް ފޮނުއްވި ނޯޓިސްގެ ފޮޓޯއެއް ޓްވިޓާގައި އާންމު ކުރައްވަމުން ޠާރިޤް ވިދާޅުވީ، މި މައްސަލަ މި ހިނގާ ރަމަޟާން މަހުގެ ފަހު ދިހައެއްގެ ތެރެއިން ދުވަހަކަަށް އެޖެންޑާ ކޮށްދެއްވާނެ ކަމަށް އުންމީދު ކުރައްވާ ކަމަށެވެ.

މަރުގެ ހުކުމް ތަންފީޒު ކުރުމާ ގުޅޭގޮތުން ވަޒީރަކާ ސުވާލު ކުރަން މަޖިލީހަށް ހުށަހަޅާފައި ވާއިރު މަރުގެ ހުކުމް ތަންފީޒު ކުރަންޖެހޭ މަރުހަލާގައި ތިބި ކުށްވެރިންގެ އަދަބު ތަންފީޒު ނުކުރާތީ އެތައްބަޔަކަށް އިންސާފު ނުލިބޭކަމަށް ބުނެ ބައެއް ފަރާތްތަކުން ފާޑުކިޔަމުން ގެންދާކަން ފާހަގަކޮށްލެވެއެވެ.