ސީލައިފް ގްލޯބަލްގެ މެނޭޖިން ޑިރެކްޓަރު އަހުމަދު މޫސާ މުހައްމަދު، އަންމަޓީ ބަންދުން ދޫކޮށްލުމަށް ކުރި އަމުރު ސުޕްރީމް ކޯޓުގައި އިސްތިއުނާފް ކުރުމަށް ޕްރޮސިކިއުޓަރ ޖެނެރަލްގެ އޮފީހުން ނިންމައިފިއެވެ.

ޕްރޮސިކިއުޓަރ ޖެނެރަލް ޙުސައިން ޝަމީމް މިއަދު ވިދާޅުވީ އަންމަޓީގެ މައްސަލާގައި ހައިކޯޓުން ނިންމިނިންމުމާމެދު ހިތްހަމަނުޖެހޭތީ އެ މައްސަލަ ސުޕްރީމްކޯޓުގައި އިސްތިޢުނާފް ކުރުމަށް ނިންމަވާފައިވާ ކަމަށެވެ. އެގޮތުން ޝަރީއަތްކުރުމާބެހޭ ޖިނާއީ އިޖުރާއަތުގެ ގަވާއިދުގެ 169 ވަނަ މާއްދާގައި ޖިނާއީ އިޖުރާއަތުގެ ޤާނޫނުގެ 198 ވަނަ މާއްދާގެ ބޭނުމަށްޓަކައި، އިސްތިއުނާފުކުރުމުގެ މުއްދަތު ގުނާނީ، ފުރަތަމަ މަރުޙަލާގެ ކޯޓުން މައްސަލަ ނިންމި ދުވަހާއި އިސްތިއުނާފުކުރުމުގެ މުއްދަތު ހަމަވާ ދުވަހާއި އެދެމެދަށް އަންނަ ރަސްމީ ބަންދު ދުވަސްތައް ނުހިމަނައި ކަމަށް ބަޔާންކޮށްފައިވާ ކަމަށެވެ.

އެހެންކަމުން އަންމަޓީގެ މައްސަލާގައި 48 ގަޑިއިރު ގުނާނީ، ކޯޓުން އަމުރު ނެރުނު ދުވަހާއި، މުއްދަތު ހަމަވާ ދުވަހާއި، އެދެމެދަށް ބަންދު ދުވަހެއް އަތުވެއްޖެނަމަ، އެދުވަސްވެސް ނުލައިކަމަށް ޝަމީމް ވިދާޅުވިއެވެ. އަންމަޓީ ދޫކޮށްލުމަށް 20 މާރޗްގައި ކްރިމިނަލް ކޯޓުން އަމުރުކޮށްފައިވާއިރު އެ އަމުރު ޕީޖީ އޮފީހުން ހައިކޯޓުގައި އިސްތިއުނާފްކުރީ މާރޗް 23 ގައެވެ.

ހުޅުމާލެއިން ގިނަބަޔަކަށް ބޯހިޔާވަހިކަން ދޭނެކަމަށްބުނެ ޙާލުގައިޖެއްސި ސީލައިފް ގްލޯބަލްގެ ވެރިޔާ ވ. ތިނަދޫ، ރެޑްހައުސް، އަހުމަދު މޫސާ (އަންމަޓީ) ޝަރުތުތަކަކާއެކު ދޫކޮށްލި މައްސަލަ އިޖުރާއީ ގޮތުން ނުބެލޭނެ ކަމަށް ހައިކޯޓުން ނިންމީ، އެ މައްސަލަ އިސްތިއުނާފް ކުރަން އޮންނަ 48 ގަޑިއިރު ފާއިތުވި ފަހުން ދައުލަތުން އިސްތިއުނާފް ކޮށްފައިވާ ކަމަށް ކަނޑައެޅުމަށްފަހުއެވެ.

ހައިކޯޓުގެ ހުކުމުގައިވަނީ ދުވަސް ގުނުމުގައި އެކަމެއް ހިނގާ ދުވަހާއި ނިމޭ ދުވަސް ނުގުނޭނެ ކަމަށް ގާނޫނުގައި އޮތްނަމަވެސް، ގަޑިއިރު ގުނުމުގައި އެފަދަ އުސޫލެއް ގާނޫނުގައި ނެތް ކަމަށެވެ. އަދި ހައްޔަރުކުރާ މީހުންގެ ބަންދާ މެދު 24 ގަޑިއިރުގެ ތެރޭގައި ގޮތެއް ނިންމުމުގައި ވެސް މިހާތަނަށް ކޯޓުތަކުން ގަޑިއިރު ގުނަނީ ހައްޔަރުކުރާ ދުވަސް ހިމަނައިގެން ކަމަށް ހުކުމުގައިވެ އެވެ. އެހެންކަމުން މިފަދަ އަމުރުތަކުގެ އިސްތިއުނާފް މުއްދަތުވެސް ގުނަން ޖެހޭނީ އެ އުސޫލުން ކަމަށް ހައިކޯޓުން ވަނީ ކަނޑައަޅާފައެވެ.

އެކަމާ ގުޅިގެން ޕީޖީ ޝަމީމް އިތުރަށް ވިދާޅުވީ ގަވާއިދުގައި، މުއްދަތު ގުނާއިރު، ނުގުނާނެ ދުވަސްތައް ލިޔުއްވިއިރު، ޤާނޫނުގައި، ބައެއް އިސްތިއުނާފުގެ މައްސަލަތަކުގައި 48 ގަޑިއިރު، އަނެއްބައި މައްސަލަތަކުގައި 10 ދުވަސް އޮތްކަން، ގަވާއިދު ލިޔުއްވި، ސުޕްރީމް ކޯޓަށް ހަމަ ރަނގަޅަށް އެނގިވަޑައިގަންނަވާނެ ކަމަށެވެ.

"ވީމާ، މިއީ، އަތްދަށުން ގޮސްފައި އޮތް ކަމެއްކަމަކަށް ބެލޭކަށްވެސް ނެތެވެ." ޝަމީމް އިތުރަށް ވިދާޅުވިއެވެ.

ޝަމީމް ވިދާޅުވީ ވަގުތު ގުނުމާގުޅޭ އުޞޫލަކީ، މިހާތަނަށް ޢަމަލުކުރަމުންއައި އުސޫލުކަމަށާއި މިމައްސަލަ ބެއްލެވި ފަނޑިޔާރުންވެސް، މީގެ ކުރިން އެތައް މައްސަލައެއްގައި، މިހާރު ޢަމަލުކުރަމުންދާ ގޮތަށް މުއްދަތު ގުނާފައިވާ ކަމަށެވެ. އަދި މިމައްސަލައިގައި، ފަނޑިޔާރުންގެ ވިސްނުންފުޅު ތަފާތުވީ ވަކި ޚާއްޞަ ސަބަބެއް، އެ ޤަޟިއްޔާގައި ލިޔުއްވާފައިނުވާތީ، މިމައްސަލަ ޚާއްޞަވީ ގޮތެއް އަދި ނޭނގޭ ކަމަށްވެސް ޝަމީމްވަނީ ވިދާޅުވެފައެވެ.