ހައިކޯޓުގައި މައްސަލަ އިސްތިޢުނާފް ކުރުމަށް އޮންނަ މުއްދަތާމެދު އެއްބަސްނުވެވި އަނެއްކާވެސް މައްސަލައެއް އެކޯޓުން ބަލައިނުގަނެ ބޭރުކޮށްފިއެވެ.

ފައިވާނާއި ފުރަގަސް ފަރާތުގައާއި އަންނައުނު ތެރޭގައި ފޮރުވައިގެން ރާއްޖެ ގެނައި 2.4 ކިލޯއަށް ވުރެ ގިނަ މަސްތުވާތަކެތީގެ މައްސަލައެއްގައި ޕާކިސްތާނުގެ ތިން މީހަކު 7 ޑިސެމްބަރު 2021 ގައި ފުލުހުން ވަނީ ހައްޔަރުކޮށްފައެވެ. އަދި އެ މައްސަލައިގައި ތުހުމަތުކުރެވޭ ގދ.މަޑަވެލި ގާޑްނިން، އަފްޒާމް އަބްދުއްސައްތާރު ކޯޓުން ދޫކޮށްލި މައްސަލަ ދަޢުލަތުން ވަނީ ހައިކޯޓުގައި އިސްތިޢުނާފްކޮށްފައެވެ.

އަފްޒާމްގެ މައްޗަށް ދައުލަތުން ކުރަނީ ޕާކިސްތާނު ތިން މީހުންނާއި އަދިވެސް އިތުރު ބަޔަކާ ގުޅިގެން ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔަފާރިކުރާކަމުގެ ތުހުމަތެވެ. އެމައްސަލައިގެ ބަންދު މުރާޖަޢާ އަޑުއެހުމުގައި މިދިޔަ މާރޗްމަހުގެ 21ގައި ކްރިމިނަލް ކޯޓުން ވަނީ ޝަރުތުތަކަކާއެކު އޭނާ ބަންދުން ދޫކޮށްލާފައެވެ. ދައުލަތުން އެމައްސަލަ ހައިކޯޓުގައި އިސްތިއުނާފު ކޮށްފައިވަނީ މިދިޔަ މާރޗް މަހުގެ 24 ވަނަ ދުވަހުއެވެ.

3 ފަނޑިޔާރުންގެ ބެންޗަކުން ބެލި މި މައްސަލާގައި ފަނޑިޔާރު ފަރުހީޒާ އާއި ފަނޑިޔާރު ފައިސަލްގެ ރަޢުޔުގައި ބުނެފައިވަނީ 48 ގަޑިއިރު ގުނާނީ އެ ނިންމުމެއް ނިންމާ ވަގުތުން ފެށިގެންކަމަށް ހައިކޯޓުން ކުރިން ނިންމާފައިވާތީ އެ މައްސަލަ އިޖުރާއީގޮތުން އިތުރަށް ކުރިއަށް ނުގެންދެވޭނެ ކަމަށެވެ. އަދި އިސްތިއުނާފް ލަސްވުމުގައި މަގްބޫލު ސަބަބެއް ދައުލަތަށް ދެއްކިފައިނުވާކަމަށްވެސް ޙުކުމުގައިވެއެވެ.

އެ މައްސަލައިގައި ތަފާތު ރަޢުޔެއް ނެރުއްވަމުން އިސްފަނޑިޔާރު ހާތިފް ހިލްމީ ވިދާޅުވީ، ޖިނާއީ އިޖުރާއަތުގެ ގާނޫނުގެ 198 ވަނަ މާއްދާގެ (ރ)ގައި އިސްތިއުނާފުގެ މުއްދަތު ފެށޭނީ އަމުރު ނެރޭ ވަގުތު ނުވަތަ ގަޑިން ކަމަށް ބަޔާންކޮށްފައި ނުވާކަމަށެވެ. އޭގެ ބަދަލުގައި އެ މާއްދާގައި ލިޔެފައިވަނީ އަމުރެއް ނެރޭ ނުވަތަ އެ ނިންމުމެއް ނިންމާ ތާރީހުން ފެށިގެން ކަމަށް ފަނޑިޔާރު ވިދާޅުވިއެވެ. އެހެންކަމުން 48 ގަޑިއިރުގެ މުއްދަތު ގުނަނީ މާނަކުރުމުގެ ހަމަތައް ބަޔާންކުރުމުގެ ގާނޫނުގައި ބަޔާންކޮށްފައިވާ ގޮތަށް، ފުރަތަމަ މަރުހަލާގެ ކޯޓުން މައްސަލަ ނިންމި ދުވަހާއި އިސްތިއުނާފުކުރުމުގެ މުއްދަތު ހަމަވާ ދުވަހާއި އެ ދެމެދަށް އަންނަ ރަސްމީ ބަންދު ދުވަސްތައް ނުހިމަނާ ކަމަށް ހާތިފް ވިދާޅުވިއެވެ.

އެހެންކަމުން ދައުލަތުން އެމައްސަލަ އިސްތިއުނާފު ކުރީ 48 ގަޑިއިރުގެ މުއްދަތުގެ ތެރޭގައި ކަމަށްވާތީ މައްސަލަ ބަލައިގަނެ ކުރިއަށް ގެންދެވޭނެ ކަމަށް އިސްފަނޑިޔާރު ހާތިފް ހިލްމީގެ ރަޢުޔުގައި ވެއެވެ.

ދާދިފަހުން ހައިކޯޓުންވަނީ މިފަދަގޮތަކަށް ސީލައިފް ގްލޯބަލްގެ މެނޭޖިން ޑިރެކްޓަރު އަހުމަދު މޫސާ މުހައްމަދު، އަންމަޓީ ބަންދުން ދޫކޮށްލި މައްސަލަވެސް ކޯޓުން ބޭރުކޮށްފައެވެ.

އެކަމާ ގުޅިގެން ޕީޖީ ޝަމީމް ވިދާޅުވީ ގަވާއިދުގައި، މުއްދަތު ގުނާއިރު، ނުގުނާނެ ދުވަސްތައް ލިޔުއްވިއިރު، ޤާނޫނުގައި، ބައެއް އިސްތިއުނާފުގެ މައްސަލަތަކުގައި 48 ގަޑިއިރު، އަނެއްބައި މައްސަލަތަކުގައި 10 ދުވަސް އޮތްކަން، ގަވާއިދު ލިޔުއްވި، ސުޕްރީމް ކޯޓަށް ހަމަ ރަނގަޅަށް އެނގިވަޑައިގަންނަވާނެ ކަމަށެވެ.

ޕީޖީ އޮފީހުން މިހާރުވަނީ އިސްތިއުނާފް މުއްދަތުގުނުމުގައި ކޯޓުތަކުން ޢަމަލުކުރާގޮތާމެދު ޙައްލެއް ހޯދުމަށް ސުޕްރީމްކޯޓަށް ހުށައަޅާފައެވެ.