ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހަތް މީހަކު ހޯދަން ފުލުހުން ފޮޓޯއާއި ވަނަވަރު އާންމުކޮށްފި އެވެ.

ފުލުހުން މިއަދު ބުނީ ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ތަހުގީގު ކުރަމުންދާ، ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހަތް މީހަކު ހޯދުމުގެ މަސައްކަތް ފުލުހުން ކުރަމުންދާ ކަމަށެވެ.



މިމައްސަލައާ ގުޅިގެން ހޯދަމުންދަނީ ކ. މާލެ ދަފްތަރު ނަންބަރު ރސ2260، މަޢުޞޫމް މުޙައްމަދުދީދީ (27އ) އާއި ތ. ތިމަރަފުށި ސީނުގެ، އަޙްމަދު ޝިމްޙާޒު (22އ) އާއި ކ. މާލެ މ. ލޮނުމިދިލިގެ، ލޫޠު އަޙްމަދު އާސިފް (18އ) އާއި ގއ. މާމެންދޫ ގްލޭނޫރަންމާގެ، އަޙްމަދު ރަބީޢު (24އ) އާއި ގއ. ގެމަނަފުށި ކެނެރީގެ، އަޙްމަދު ނާޒިހު (27އ) އާއި ސ. ހުޅުދޫ ނާދީ، މުނާދު ޖަޢުފަރު (20އ) އާއި ސ. މަރަދޫ ކޮރަލް، އަޙްމަދު ސާތިޢު (21އ) އެވެ.



ފުލުހުން އެދިފައިވަނީ މިމީހުންނާ ބެހޭ އެއްވެސް މައުލޫމާތެއް އެނގޭ ފަރާތެއްވާނަމަ ފުލުހުންގެ ހޮޓްލައިން ނަންބަރު 3322111 އަށް ނުވަތަ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ނަންބަރު 9911099 އަށް ގުޅުއްވައި ހިއްސާކުރެއްވުމަށެވެ.

މި ފަހަކަށް އައިސް މާލޭގައި މާރާމާރީތައް ހިންގުން ވަނީ ވަރަށް ބޮޑަށް އިތުރު ވެފައެވެ. އެގޮތުން، މިދިޔަ ހޯމަ ދުވަހު ވެސް މާލޭގައި ދެ މާރާމާރީއެއް ހިންގާފައިވެއެވެ. އެ ދުވަހު ފުރަތަމަ މާރާމާރީ ހިންގާފައިވަނީ މާވެޔޮ މިސްކިތް ކައިރީގައެވެ. ފަތިހު ހިންގި އެ މާރާމާރީގައި ދެ ދިވެއްސަކަށް އަނިޔާވެގެން ހޮސްޕިޓަލްގައި ފަރުވާ ދީފައިވެއެވެ. އެރޭ ހިންގި ދެވަނަ މާރާމާރީގައި ވެސް މީހަކަށްވަނީ އަނިޔާވެފައެވެ.

އޭގެ އިތުރުން ރޭވެސް މާލެއާއި ހުޅުމާލޭގައި ތިން މާރާމާރީއެއް ހިންގާފައިވެއެވެ. މާރާމާރީތަކާއި ގުޅިގެން ފުލުހުންވަނީ ހުޅުމާލޭގައި ހާއްސަ އޮޕަރޭޝަނެއް ފަށާފައެވެ. އެގޮތުން އެސްއޯ ފުލުހުންދަނީ ހިޔާ ފުލެޓުތަކުގައި ފޯރިމަރައި ބައެއް މީހުން ހައްޔަރު ކުރަމުންނެވެ.