ތ. ދިޔަމިގިލީ މަސްޖިދުލް އަމާނާތުގެ ވަގުތީ މުދިމު، ޢުމުރުން 55 އަހަރުގެ އަހްމަދު ރަޝީދު މުހައްމަދަށް ވަޅިން ހަމަލާދިން ސާމިދުގެ މައްޗަށް ދަޢުވާ ކޮށްފިއެވެ.

ޕްރޮސެކިއުޓާ ޖެނެރަލްގެ އޮފީހުން ބުނީ ދިޔަމިގިލީ މޯނިންސްޓާ، ހަސަން ސާމިދު، މާޗު، 13، 2022 ގައި މީހަކަށް ވަޅިން ހަމަލާދީ މާރާމާރީ ހިންގިކަމަށް ތުހުމަތުކުރެވޭ މައްސަލާގައި ތޫނު އެއްޗެއް ބޭނުންކޮށްގެން ގަސްދުގައި މީހަކު މަރަން އުޅުމުގެ ކުށުގެ ދަޢުވާ 28 އެޕްރީލް 2022 ދުވަހު ތ. ދިޔަމިގިލީ މެޖިސްޓްރޭޓް ކޯޓަށް ހުށައަޅާފައިވާ ކަމަށެވެ.

ޕީޖީ އޮފީހުން ބުނީ މި މައްސަލައިގައި އަނިޔާލިބުނު މީހާ 13 މާރިޗު 2022 ދުވަހުގެ 9:55 އެހައިކަށްހައިއިރު، ތ.ދިޔަމިގިލި، ތާޖު ގެ ކައިރިން ބައިސްކަލެއްގައި ދުއްވާފައި ދަނިކޮށް، ޙަސަން ޞާމިދު ޙުސައިން އޭނާ ހުއްޓުވައި، އަނިޔާލިބުނު މީހާގެ ބޮލާއި، ކަރާއި، ބުރަކައްޓާއި، ކަނާއަތު ކޮނޑާއި، ވާއަތަށް ވަޅިއަކުން ހަމަލާދީފައިވާކަން ތަޙުޤީޤަށް ހޯދިފައިވާ ކަމަށެވެ.

މި ދަޢުވާ ސާމިދުގެ މައްޗަށް ސާބިތުވެއްޖެނަމަ 15 އަހަރާއި 25 އަހަރާ ދެމެދުގެ މުއްދަތަކަށް ޖަލަށްލެވޭނެ ކަމަށްވެސް ޕީޖީ އޮފީހުން ވަނީ ބުނެފައެވެ. އެ މައްސަލާގައި ޙަމަލާދިން ސާމިދު ޝަރީޢަތް ނިމެންދެން ބަންދުގައި ބަހައްޓަން ކޯޓުން ވަނީ އަމުރުކޮށްފައެވެ.

މި ޙަމަލާގައި އަނިޔާލިބުނު އަޙްމަދު ރަޝީދުގެ ބުރަކަށިން ހަތަރު ތަނަކަށް ވަރަށް ފުން ޒަޚަމްތަކެއް ލިބިފައިވާއިރު ގައިގެ 13 ތަނަކަަށް ވަނީ ވަޅި ހަރާފަައެެެވެ. އޭނާއަށް ދިޔަމިގިލީ ސިއްހީ މަރުކަޒުގައި ފަރުވާދިނުމަށްފަހު އިތުރު ފަރުވާއަށް މާލެ ގެނެސް އައިޖީއެމް ހޮސްޕިޓަލުގައި ދެ އޮޕްރޭޝަނެއްވަނީ ކޮށްފައެވެ.

މުދިމު އަހުމަދު ރަޝީދަށް ހަމަލާދިން މިހާދިސާ އާއި ގުޅޭ ސީސީޓީވީ ފުޓޭޖްވަނީ އާންމުވެފައެވެ. އެގޮތުން ދެމީހުން ވާހަކަ ދައްކަން ތިބުމަށްފަހު ކުއްލިއަކަށް ޒުވާނާ އެތައް ފަހަރަކު މުދިމަށް ވަޅިން ހަމަލާ ދޭ މަންޒަރު އެ ވީޑިއޯ އިން ފެނެއެެވެ.

ފުރަތަމަ ހަމަލާ ދިނުމަށް ފަހު ވަކި ހިސާބަކަށް ގޮސް އެނބުރި އައިސް އަލުން ހަމަލާދޭއިރު ޖުމުލަ 13 ފަހަރު މުދިމުގެ ގަޔަށް ވަޅިން ހަމަލާދޭ މަންޒަރު ވީޑިއޯ އިން ފެނެއެވެ. އަދި މުދިމުގެ ހަށިގަނޑަށް އެތައް ފަހަރަކު ވަޅިއަކުން ހަމަލާ ދިނުމަށް ފަހު އެތަނުން ދަމުން ސާމިދުވަނީ އެ ސަރަހައްދުގައި ހުރި ބަސްތާއެއްގައި ވަޅި ހާކާލާ އެ ވަޅީގައި ހުރި ލޭތައް ސާފުކޮށްފައެވެ.