ގއ. ވިލިނގިލީގައި އަންހެނުންތަކެއްގެ ގައިގައި ދަތްއަޅައި އެކަކުގެ އިނގިލި ބުރިކޮށްލި މީހާގެ މައްޗަށް ދަޢުވާކޮށްފިއެވެ.

އެމައްސަލައާ ގުޅިގެން މިދިޔަ މެއިމަހުގެ ދެ ވަނަ ދުވަހު 31 އަހަރުގެ ދިވެހި ފިރިހެނެއް ހައްޔަރުކޮށްފައިވެއެވެ. މި މާރާމާރީ ހިންގި މައްސަލައިގައި ހައްޔަރުކުރީ ގ. ޗެރީ ހައުސް، ޢަލީ ޙަސަން އެވެ. އޭނާގެ މައްޗަށް ޕްރޮސިކިއުޓަރ ޖެނެރަލްގެ އޮފީހުން މިހާރު ވަނީ 5 ދަޢުވާއެއް އުފުލާފައެވެ.

އޭނާގެ ބަންދު މުއްދަތު ޖެހުމަށް ކޯޓަށް ޙާޟިރުކުރުމުން ކޯޓުގެ ހުރުމަތް ކެނޑުމާ ގުޅިގެން 150 ދުވަހަށް ޖަލަށްލުމަށް ވިލިނގިލި މެޖިސްޓްރޭޓް ކޯޓުން ހުކުމްކޮށްފައިވެއެވެ. އަދި ޝަރީއަތް ނިމެންދެން އޭނާ ބަންދުގައި ބަހައްޓަން ވެސް ކޯޓުން އެ ދުވަހު އަމުރުކޮށްފައިވެ އެވެ. ނަމަވެސް ފަހުން ކޯޓުންވަނީ އޭނާ ބަންދުން ދޫކޮށްލާފައެވެ.

ކޯޓުން އެމީހާ ދޫކޮށްލުމާގުޅިގެން އެ މައްސަލާގައި އަނިޔާ ލިބުނު މީހާގެ އާއިލާގެ ފަރާތުން އެ މައްސަލަ އިސްތިއުނާފު ކޮށްދިނުމަށް އެދި ޕީޖީ އަށް ފޮނުވި ސިޓީގެ ޖަވާބުގައި ޕީޖީން ބުނެފައިވަނީ ކ. މާލެ، ގ. ޗެރީހައުސް، ޢަލީ ޙަސަން 02 މޭ 2022 ދުވަހުގެ 04:30 ހާއިރު، ގއ. ވިލިނގިލި، ޝާދީވިލާ ގެއަށް ހުއްދަނުހޯދައި ވަދެ، އެގޭގައި ތިބި ބަޔަކާމެދު މާރާމާރީ ހިންގައި ބޮޑެތި އަނިޔާތަކެއް ދިން މައްސަލައިގައި، ޢަލީ ޙަސަންގެ މައްޗަށް 5 ދަޢުވާ ކުރުމަށް 06 ޖޫން 2022 ގައި ގއ. ވިލިނގިލީ މެޖިސްޓްރޭޓް ކޯޓަށް ހުށަހަޅާފައިވާ ކަމަށެވެ.

އޭނާގެ މައްޗަށް ދަޢުލަތުން އުފުލާފައިވަނީ އެނގިހުރެ ހުއްދަ ނޫން ތަނަކަށް ވަނުމުގެ ދައުވާ އާއި ގައިގައި އަތްލުމުގެ ދައުވާގެ އިތުރުން އަނިޔާއެއް ދިނުމުގެ ތިން ދައުވާއެވެ.

ޕީޖީ އޮފީހުން ބުނީ އަލީ ޙަސަން ޝަރީޢަތް ނިމެންދެން ބަންދުކޮށްދެއްވުން އެދި 07 ޖޫން 2022 ގައި ކޯޓަށް ފޯމް ހުށައެޅުމުން މިމަހުގެ 13 ވަނަ ދުވަހަށް އަޑުއެހުމެއް ތާވަލްކޮށްދީފައިވާ ކަމަށެވެ.

ގއ. ވިލިނގިލި، ޝާދީވިލާ ގެއަށް ގަދަކަމުން ވަދެ އެ ގޭގައި ތިބި ހަތަރު މީހަކަށް ހަމަލާ ދިނުމުގެ ސަބަބުން އަނިޔާވީ އުމުރުން 60 އަހަރާއި، 39 އަހަރާއި، 31 އަހަރުގެ އަންހެނަކަށާއި އުމުރުން 74 އަހަރުގެ ފިރިހެނަކަށެވެ. ހޮސްޕިޓަލްގައި މި ހަތަރު މީހުންނަށްވެސް ފަރުވާ ދިނުމަށްފަހު ވަނީ ދޫކޮށްލާފަ އެވެ.