މޯލްޑިވްސް ޑިވެލޮޕްމަންޓް އެލަޔަންސް އެމްޑީއޭގެ ލީޑަރ އަދި މަޝްހޫރު ވިޔަފާރިވެރިޔާ އަޙްމަދު ސިޔާމް މުޙައްމަދު، ސަން ސިޔާމްގެ ޕާސްޕޯޓް ހިފެހެއްޓި މައްސަލައިގެ ޙުކުމް އިއްވުން ހައިކޯޓުގައި މިއަދަށް ތާވަލުކޮށްފިއެވެ.

ސަން ޓްރެވަލް ކުންފުނިން ހިލްޓަނަށް ދައްކަންޖެހޭ 24 މިލިއަނަށް ވުރެ ގިނަ ޑޮލަރު ނުދެއްކި މައްސަލާގައި، މަޝްހޫރު ވިޔަފާރިވެރިޔާ އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު، ސަން ސިޔާމާއި އޭނާގެ ކުރީގެ އަނބިކަނބަލުން އައިޝަތު ފާއިޒްގެ ޕާސްޕޯޓް ހިފަހައްޓަން ސިވިލް ކޯޓުން ވަނީ އަމުރުކޮށްފައެވެ. އެ މައްސަލަ ހައިކޯޓުގައި އިސްތިޢުނާފް ކުރެއްވީ ސަން ސިޔާމްގެ ފަރާތުންނެވެ.

ހައިކޯޓުން ވަނީ އެ މައްސަލާގައި ޙުކުމް އިއްވުމަށް މިއަދު މެންދުރުފަހަށް ތާވަލުކޮށްފައެވެ. ސަން ޓްރެވަލުން ހިލްޓަނަށް 24 މިލިއަނަށްވުރެ ގިނަ ޑޮލަރު ދައްކަންޖެހުނީ ނ. އިރުފުށި ހިންގަން ހިލްޓަން އިންޓަނޭޝަނަލާ ހަވާލުކުރި އެއްބަސްވުން ބާތިލްކުރި މައްސަލާގައެވެ.

މިމައްސަލައިގައި ސަން ޓްރެވަލުން ހިލްޓަނަށް 24 މިލިއަން ޑޮލަރު ދޭން އާބިޓްރޭޝަނުން ހުކުމްކުރީ އޮގަސްޓް 17، 2015 ގައެވެ. އަދި އެ އަމުރު ތަންފީޒުކުރަން ހިލްޓަނުން ސިވިލް ކޯޓަށް ހުށަހެޅުމުން ސިވިލް ކޯޓުން ވަނީ އޮގަސްޓް 2020ގައި ސަން ޓްރެވަލްގެ އެކައުންޓްތައް ފްރީޒް ކޮށްފައެވެ.

މި މައްސަލައިގައި ސިޔާމްގެ އިތުރުން، ސަން ޓްރެވަލްގެ އަނެއް ޑިރެކްޓަރު އަދި ސިޔާމްގެ ކުރީގެ އަނބިކަނބަލުން އައިޝަތު ފާއިޒްގެ ޕާސްޕޯޓް ހިފަހައްޓަންވެސް، ވަނީ އަމުރުކޮށްފައެވެ. މައުލޫމާތު ލިބިފައިވާ ގޮތުގައި މި އަމުރު ނެރެފައިވަނީ މިދިޔަ ފެބްރުއަރީ މަހުގެ 9 ވަނަ ދުވަހުއެވެ. ނަމަވެސް މިކަމާއި ގުޅޭގޮތުން އިމިގްރޭޝަނުން ވާހަކަދައްކާފައެއްނުވެއެވެ.