އާދައިގެ ރޯގާގެ އަލާމަތްތައް ހުންނަ މީހުން ކަރަންޓީނުގެ މުއްދަތު ހަމަކޮށް ދޫކޮށްލާއިރު ޕީސީއާރު ޓެސްޓް ނުހަދާނެ ކަމަށް ޑރ.ނަޒްލާ މުސްތަފާ މިރޭ ވިދާޅުވެއްޖެއެވެ.

ނޭޝަނަލް އިމެޖެންސީ އޮޕަރޭޝަން ސެންޓަރ، އެންއީއޯސީން ދަރުބާރުގޭގައި މިރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ މުސްތަފާ ވިދާޅުވީ ބަލިން ރަނގަޅުވުމަށްފަހު ދޫކޮށްލުމުގެ ކުރިން ހަދާ ޕީސީއާރު ޓެސްޓްތައް ވަރަށް ގިނަ ފަހަރު ޕޮޒިޓިވް ކަމަށް ދައްކާ ކަމަށެވެ. ޑރ ނަޒްލާ މުސްތަފާ ވިދާޅުވީ، އާދައިގެ ރޯގާ ގޮތަށް ބަލި ޖެހޭ ނަމަ 9 ވަރަކަށް ދުވަހުގެ ތެރޭގައި ހަށިގަނޑުން ވައިރަސް ދާނެ ކަމަށް ބައެއް ދިރާސާތަކުން ދައްކާ ކަމަށެވެ. އަދި އެ ނޫން ކޭސްތަކުގައި 20 ދުވަސްވެސް ނަގާނެ ކަމަށް ޑރ.ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ، އާންމުކޮށް ބަލާ މިންގަނޑުން 14 ދުވަސް ބެލުމަށްފަހުވެސް، އެއްކޮށް އަލާމަތްތައް ރަނގަޅުވުމުން 3 ދުވަސް އިތުރަށް ބަލާނެ ކަމަށެވެ. އެތިން ދުވަސް ބެލުމަށްފަހު މީގެ ފަހުން ދޫކޮށްލާނީ ޕީސީއާރު ޓެސްޓް ނަހަދައި ކަމަށް ޑރ.ނަޒްލާ ވިދާޅުވިއެވެ.

"މިގޮތަށް ޓެސްޓް ނަހަދައި ދޫކޮށްލެވޭނީ އާދައިގެ ރޯގާ އެއްގައި ހުންނަ މީހަކު، އެކަމަކު ބޮޑަށް ބަލިވެގެން ހޮސްޕިޓަލުގައި އެޑްމިޓް ކުރުމަށްފަހު މަދުވެގެން 21 ދުވަސް ހަމަކުރަންޖެހޭނެ. ބަލީގެ އަލާމަތްތައް އެއްކޮށް ރަނގަޅުވުމަށްފަހު އިތުރު 3 ދުވަސް ބަލާނެ. އޭގެކުރިން ހޮސްޕިޓަލުން ދުލެއް ނުކުރާނެ، ދިފާއީ ނިޒާމް ބަލިކަށި މީހުން ޕީސީއާރު ޓެސްޓް ހަދަން ބުނާނެ." ޑރ.ނަޒްލާ މުސްތަފާ ވިދާޅުވިއެވެ.