މިއަހަރުގެ މެއި 2 ވަނަ ދުވަހު މާލޭގައި ހިންގި މާރާމާރީތަކާ ގުޅިގެން ހައްޔަރުކޮށް ދައުވާ އުފުލާފައިވާ މީހުންގެ ޝަރީއަތުގެ އަޑުއެހުމެއް ކްރިމިނަލް ކޯޓުގައި ކުރިއަށް ގެންގޮސްފިއެވެ.

އީދު ދުވަހު މާލޭގެ ދެ ސަރަޙައްދެއްގައި ވަނީ މާރާމާރީތަކެއް ހިނގާފައެވެ. ފުރަތަމަ މާރާމާރީ ހިންގާފައިވަނީ ކޯރުކެނޑި މަގުން މާވެޔޮ މިސްކިތް ކައިރީގައެވެ. އީދު ދުވަހު ފަތިހު 5:48 ހާއިރު ހިންގި އެ މާރާމާރީގައި 23 އަހަރުގެ ދިވެއްސަކަށް ވަނީ ތޫނު އެއްޗަކުން ހަމަލާދީފައެވެ.

ދެވަނަ މާރާމާރީ ހިންގާފައިވަނީ ޖަނަވަރީމަގާއި މަޖީދީމަގު ގުޅޭ ކަންމަތީގައެވެ. އީދު ދުވަހު ހެދުނު 9:17 ހާއިރު ހިންގި އެ މާރާމާރީގައި ދެ މީހަކު ޒަހަމްކޮށްލައިފައިވާ ކަމަށް ފުލުހުން މައުލޫމާތުދެއެވެ.

ޢީދު ދުވަހު ހިންގި މާރާމާރީއާ ގުޅިގެން 6 މީހެއްގެ މައްޗަށް ވަނީ ދަޢުވާ އުފުލާފައެވެ. އަދި މިއަދު ބޭއްވި މައްސަލައިގެ ފުރަތަމަ އަޑުއެހުމުގައި ދައުލަތުން ވަނީ އެމީހުންގެ މައްޗަށް ދަޢުލަތުން ކުރާ ދައުވާތައް އިއްވާފައެވެ. އެގޮތުން މަޢުޞޫމް މުޙައްމަދު ދީދީ އާއި އަޙްމަދު ސާތިޢު އާއި ލޫޠު އަޙްމަދު އާސިފްގެ މައްޗަށް އުފުލާފައިވަނީ މީހަކަށް ނުރައްކާތެރި ހާނިއްކައެއްވާގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުުގެ ކުށުގެ ދައުވާއެވެ.

ޙަސަން ޒިޔާން އިބްރާހިމް އާއި އަޙްމަދު ނާޒިހުއާއި އަޙްމަދު ޝިމްހާޒުގެ މައްޗަށް އުފުލާފައިވަނީ މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މަރާމާރީ ހިންގުމުގައި ބައިވެރިވުމުގެ ކުށުގެ ދައުވާއެވެ.



މިމީހުންގެ މައްޗަށް އުފުލާފައިވާ މާރާމާރީ ހިންގުމުގެ ދައުވާ ސާބިތުވެއްޖެނަމަ 10 އަހަރާއި 15 އަހަރާއި ދެމެދުގެ ޖަލު ޙުކުމެއް އަންނާނެއެވެެ. އަދި މާރާމާރީ ހިންގުމުގައި ބައިވެރިވުމުގެ ކުށް ސާބިތުވެއްޖެނަމަ އަންނާނީ 7 އަހަރާއި 10 އަހަރާ ދެމެދުގެ ޖަލު ޙުކުމެކެވެ.

ދެން އަންނަ އަޑުއެހުމެއްގައި މި މައްސަލައިގެ ދައުވާއަށް ޖަވާބުދާރީވުން އޮންނާނެއެވެ. އަދި ދައުލަތުން ހުށައަޅާފައިވާ ހެކި ރައްކާތެރި ކުރުމުގެ އަމުރާ ގުޅޭގޮތުން ގޮތެއް ނިންމުންވެސް އޮންނާނެކަމަށް މިއަދުގެ އަޑުއެހުން ނިންމަވާލައްވަމުން ޤާޟީ ޞަފްވަތު ޙަބީބު ވިދާޅުވިއެވެ.