ހުޅުމާލޭ ދެވަނަފިޔަވަހީގައި ދިރިއުޅޭ ބެލެނިވެރިންނަށް މިހާރު ގޭ ބެލްކަނީގައި ހުރެ ދަރިފުޅު ސްކޫލަށް ވަންނަ މަންޒަރު ބަލާލެވޭނެ ކަމަށް އެޑިއުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވެއްޖެއެވެ.

ހުޅުމާލޭ ފޭސް 2 ގައި ގާއިމްކޮށްފައިވާ ކާމިލްދީދީ ޕްރައިމަރީ ސްކޫލް ރަސްމީކޮށް ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ޑރ. ޢާއިޝަތު ޢަލީ ވިދާޅުވީ ކާމިލްދީދީ ޕްރައިމަރީ ސްކޫލް ރަސްމީކޮށް ހުޅުވިގެންދިއުމާއެކު ދެވަނަ ފިޔަވަހީގައި ދިރިއުޅޭ އާއިލާތަކަށް ވަރަށް ބޮޑު ލުޔެއް ލިބިގެންދާނެކަމަށެވެ.

މިނިސްޓަރ ވިދާޅުވީ މީގެ ކުރިން ދަރިފުޅު އެކަނި ބަހަށް ލާފައި ސްކޫލަށް ފޮނުވަން ފަސްޖެހޭ ބެލެނިވެރިންނަށް މިހާރު ގޭ ބެލްކަނީގައި ހުރެ ދަރިފުޅު ސްކޫލަށް ވަންނަ މަންޒަރު ބަލާލެވޭނެ ކަމަށެވެ. އަދި މަދު މިނެޓްކޮޅެއްގެ ތެރޭގައި ހިނގާލާފައި ދަރިންގޮވައިގެން ސްކޫލަށް ދެވޭނެކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ ސްކޫލެއް ހުޅުވުމަކީ ޚާއްސަކަމެއް ކަމަށާއި، މިއިންދެނީ އެތައް ޒަމާނަކަށް އޭގެ މޭވާ ރައްޔިތުން ބިންނާނޭ މޭވާގަހެއް ކަމަށެވެ. އެގޮތުން ހުޅުމާލޭ ދެވަނަ ފިޔަވަހީގައި ޖަމީލުދީދީ ޕްރީ ސްކޫލްވެސް މިއަހަރު ތެރޭގައި ހުޅުވިގެންދާނެ ކަމަށް މިނިސްޓަރު ވިދާޅުވިއެވެ.

އަދި މި ދިރާސީ އަހަރުގެ ދެވަނަ ޓާމުގައި ހުޅުމާލޭގެ ދެވަނަ ފިޔަވަހީގައި ދިރިއުޅޭ ދަރިވަރުންނަށް ޚާއްސަ ސަލާހުއްދީން ސްކޫލުގައިވެސް ކިޔެވުން ފެށޭނެކަމަށް މިނިސްޓަރު ވިދާޅުވިއެވެ. ސަލާޙުއްދީން ސްކޫލަކީ އެލްކޭޖީން ފެށިގެން ގްރޭޑް 10އަކާއި ހަމައަށް ކިޔަވައިދޭ ސްކޫލެކެވެ.

އެޑިޔުކޭޝަން މިނިސްޓަރު ޑރ. އައިޝަތު އަލީ މީގެ ކުރިން ވިދާޅުވެފައިވަނީ ހުޅުމާލޭގައި ހަދަމުންދާ ސްކޫލުތަކުގެ މަސައްކަތް ނިމުމުން ހުޅުމާލޭގައި އިތުރު 6،000 ދަރިވަރުންގެ ޖާގަ އުފެއްދޭނެކަމަށެވެ. އޭގެ ތެރެއިން ގިނަ ސްކޫލްތައް ޢިމާރާތްކުރުމަށް ހަމަޖެހިފައިވަނީ ދެވަނަ ފިޔަވަހީގައެވެ.