ހުޅުމާލެ ދެވަނަ ފިޔަވަހީގައި ޢިމާރާތްކޮށްފައިވާ ހިޔާ ފްލެޓު ލިބުނު މީހުންގެ ތެރެއިން ފްލެޓު އެއްބަސްވުމުގައި 40 މީހަކު ސޮއިކޮށްފައިވާ ނުވާކަމަށް ހައުސިންގ މިނިސްޓްރީން ހާމަކޮށްފިއެވެ.

ހިޔާ ފުލެޓުތަކަށް ފައިސާ ދައްކައި ހަލާސްކުރުމަށް ހަމަޖެހިފައި ވަނީ 25 އަހަރުގެ މުއްދަތަށް ބަހާލައިގެންނެވެ. އެގޮތުން އިންސްޓޯލްމަންޓުގެ ގޮތުގައި މެނޭޖްމަންޓް ފީއާއެކު މަހަކު 8،500 ރުފިޔާ ކުލީގެ ގޮތުގައި ދައްކަން ޖެހޭނެކަމަށް ސަރުކާރުން ވަނީ ނިންމާފައެވެ.

ހައުސިން މިނިސްޓްރީން ކުރި އިޢުލާނު ގައި ބުނެފައިވަނީ ހިޔާ މަޝްރޫޢުގެ ދަށުން ޢިމާރާތް ކޮށްފައިވާ 6720 ފުލެޓަށް ހޮވިފައިވާ ފަރާތްތަކަށް ފުލެޓު އެގްރީމަންޓްގައި ސޮއިކުރުމުގެ ކަންކަން ނިންމުމަށް ވަރަށްގިނަ ދުވަސްތަކެއް ދެވިފައިވާކަމަށެވެ. އެގޮތުން ތަފާތު އެކިފަހަރު މަތިން މުއްދަތު ދިނުމުން ވެސް 40 މީހަކު އެއްބަސްވުމުގައި ސޮއިކޮށްފައި ނުވާތީ ތަޅުދަނޑި ޙަވާލުކުރެވިފައި ނުވާކަމަށް މިނިސްޓްރީން މަޢުލޫމާތުދެއެވެ.

އެހެންކަމުން މިހާތަނަށް އެޗް.ޑި.ސީއާއެކު ފުލެޓު އެގްރީމަންޓްގައި ސޮއިކޮށްފައިނުވާ ފަރާތްތަކުން މި ސެޕްޓެމްބަރު މަހުގެ 29 ވަނަ ދުވަހުގެ ކުރިން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އަށް ގޮސް ސޮއިކުރުމުގެ ކަންކަން ނިންމުމަށް މިނިސްޓްރީން ވަނީ ފަހު ފުރުސަތު ދީފައެވެ.

އަދި މި މުއްދަތުގެ ތެރޭގައި ސޮއިނުކޮށްފިނަމަ ފްލެޓު ލިބުމަށް ހޮވިފައިވާ ހޮވުން ބާތިލުވާނެ ކަމަށް މިނިސްޓްރީގެ އިޢުލާނުގައި ބުނެފައިވެއެވެ.