ދައުލަތުގެ ބަޖެޓުން ކައުންސިލްތަކަށް ދޫކުރާ ފައިސާ އަންނަ އަހަރުން ފެށިގެން ކޮންމެ 3 މަހަކުން ދޫކުރާނެކަމަށް ފިނޭންސް މިނިސްޓަރ އިބްރާހިމް އަމީރު މިއަދު ވިދާޅުވެއްޖެއެވެ.

ފިނޭންސް މިނިސްޓަރ މިހެން ވިދާޅުވީ ލ.އަތޮޅުގައި މިހާރު ކުރިއަށްދާ ވިއަވަތި ކޮންފަރެންސްގެ ތެރެއިން ބޭއްވި ސެޝަނެއްގައި މައުލޫމާތު ދެއްވަމުންނެވެ. ފިނޭންސް މިނިސްޓްރީން މިހާރު ކައުންސިލްތަކަށް ފައިސާ ދޫކުރަމުން އަންނަނީ އަހަރަކަށް ޖެހޭވަރު، ކޮންމެ މަހަކު އެއްފަހަރު ކަހަލަ ގޮތަކަށް ބަހާލައިގެނެވެ.

ވިއަވަތި ކޮންފަރެންސްގައި ބައިވެރިވި ބައެއް ކައުންސިލަރުން ވަނީ މަހުން މަހަށް ފައިސާ ދޫކުރާތީ ދަތިތަކެއް ކުރިމަތިވާތީ ކޮންމެ ކުއާޓަރެއްގައި ފައިސާ ދޫކުރަމަށް ހުށަހަޅާފައެވެ.

މިކަމާއި ގުޅިގެން ސެޝަންގައި ބައިވެރިވެވަޑައިގެންނެވި ރައީސް އިބްރާހިމް މުހައްމަދު ޞާލިޙް ވަނީ އެ ހުށަހެޅުއްވުމަށް ތާއީދުކޮށް ވާހަކަދައްކަވާފައެވެ. އަދި ކުއާޓާލީ އެ ފައިސާ ދޫކުރެވޭ ގޮތް ވެއްޖެ ނަމަ، ކައުންސިލްތަަކަށް ފަސޭހަވާނެކަމަށް ކަމަށް ގަބޫލުކުރައްވާ ކަމަށް ރައީސް ވިދާޅުވިއެވެ.

ސެޝަންގައި ބައިވެރިވެވަޑައިގެންނެވި ފިނޭންސް މިނިސްޓަރ އަމީރު ވަނީ އަންނަ އަހަރުން ފެށިގެން އެގޮތަށް ފައިސާ ދޫކުރެވޭނެކަމަށެވެ. ނަމަވެސް، ކައުންސިލްތަކުން ފައިސާ ހަރަދުކުރާ ގޮތުގެ ތަފްސީލު، ސަރުކާރުގެ ޕޯޓަލް، 'ވިޔަ'އަށް އަޕްލޯޑް ނުކުރާނަމަ ފައިދާ ދޫކުރަން ދަތިވާނެކަމަށްވެސް އަމީރު ވިދާޅުވިއެވެ.