ސަރުކާރުން މިހާރު ކުރިއަށް ގެންދާ ބޯހިމެނުމުގެ މަސައްކަތަށް ރައީސް ޔާމީން އެއްބާރުލުން ދެއްވާނެ ކަމަށް ރައީސް ޔާމީންގެ ސަރުކާރުގައި މުލިއާގޭގެ ޗީފް އޮފް ސްޓާފްގެ މަގާމުގައި ހުންނެވި އަހުމަދު މުސްތަފާ (މުސްތޮ) ވިދާޅުވެއްޖެއެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް (އެމް.ބީ.އެސް) ގެފަރާތުން ކުރިއަށް ގެންދާ ބޯހިމެނުމުގެ ލިސްޓިންގގެ މަސައްކަތްތައް ސެޕްޓެންބަރު މަހުގެ 13 އިން 14 ގެ ނިޔަލަށް ވަނީ ކުރިއަށް ގެންގޮސްފައެވެ. އަދި ބޯހިމެނުމުގެ ތަފްޞީލް މަޢުލޫމާތު ނެގުމުގެ މަސައްކަތްތައް ކުރިއަށްދާނީ ސެޕްޓެންބަރު 17 އިން 25 ގެ ނިޔަލަށެވެ.

މިހާރު ޕީޕީއެމްގެ ޓެރެޝަރާގެ މަޤާމުގައި ހުންނެވި މުސްތޮ ވިދާޅުވީ އިއްޔެ ހެނދުނު 6:08 ގައި ރައީސް ޔާމިން އޭނާއަށް ގުޅުއްވައި، އެމަނިކުފާނު ބޯހިމެނުމަށް މައުލޫމާތު ދެއްވުމުގެ އިންތިޒާމު ހަމަޖައްސަވައިދެއްވުމަށް އެދިވަޑައިގެންނެވި ކަމުގައެވެ.

"ވިސްނާ ބަޔަކަށް ތަފާތު ފެންނާނެ." މުސްތޮ އިތުރަށް ވިދާޅުވެފައިވެއެވެ.

ބޯހިމެނުމުގެ މަސައްކަތަކީ ރާއްޖޭގެ އާބާދީއާއި ތަރައްޤީއާއި ގުޅޭ އަސާސީ މަޢުލޫމާތު ހޯދުމަށް ހިންގާ އެންމެ ބޮޑު ސަރވޭއެވެ. ރާއްޖޭގައި އެންމެފަހުން ބޯހިމަނާފައިވަނީ ރައީސް ޔާމީންގެ ވެރިކަމުގައި 2014 ވަނަ އަހަރުގައެވެ.

މިއަހަރުގެ ބޯހިމެނުމުގައި ޢާއްމު ފަރުދުންގެ ދިރިއުޅޭ ތަނާއި ބެހޭ މައުލޫމާތުތަކާއި، ދިރިއުޅޭ ތަނުގެ ބޮޑުމިނާއި، މީހުންގެ އުފަން ތާރީޚާއި އުމުރާއި ޖިންސު ފަދަ މަޢުލޫމާތުތައް އެއްކުރުމަށްވަނީ ހަމަޖެހިފައެވެ. އަދި ތަޢުލީމީ ފެންވަރާއި، އަދާކުރާ ވަޒީފާއާއި، ލިބޭ އާމްދަނީއާއި ޚަރަދުތަކުގެ ތަފްޞީލުގެ އިތުރުން ފުރަތަމަ ކައިވެނި ކުރި އުމުރާއި، ދަރިންގެ އަދަދާއި، ފުރަތަމަ ދަރިފުޅު ލިބުނު އުމުރު ފަދަ މަޢުލޫމާތުތައް އެއްކުރާނެއެވެ.