މި ސަރުކާރަށް ތާއީދޫ ހޯދޭނީ އައްޑޫ ސިޓީއަށް ފޯކަސްކޮށްގެން ކަމަށް ރައްޔިތުންގެ މަޖިލީހުގެ ރައީސް، މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ، އެމަނިކުފާނު އައްޑޫ ސިޓީއަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ހަވީރު ހިތަދޫގެ އެމްޑީޕީ މެންބަރުންނާއެކު ބޭއްވެވި ބައްދަލުވުމެއްގައެވެ.

އެ ބައްދަލުވުމުގައި ރައީސް ނަޝީދު ވިދާޅުވީ ޒަމާނުއްސުރެ އައްޑޫއާއިމެދު ކަންކަން ކޮށްފައިވަނީ ގޯސްކޮށް ކަމަށާއި އެގޮތުން ރާއްޖެއަށް ހެޔޮއެދޭނަމަ އައްޑޫއަށް އަޅާލުމަކީ މުހިންމު ކަމެއްކަމަށް ވިދާޅުވިއެވެ. އަދި އައްޑޫއަކީ ކަންކަން ކުރެވޭނެ ފަދަ ވަސީލަތްތައް ގިނަ އަތޮޅެއްކަން ވެސް ރައީސް ނަޝީދު ފާހަގަ ކުރެއްވިއެވެ.

އެހެންކަމުން، ބާކީ އޮތް އެއް އަހަރު ދުވަހުގެ ތެރޭގައި އައްޑޫއަށް އަމާޒުކޮށްގެން ބޮޑެތި މަސައްކަތްތަކެއް ކޮށްފިނަމަ އަދިވެސް ސަރުކާރަށް މާ ބޮޑަށް ތާއީދު ލިބޭނެ ކަމަށް އެމަނިކުފާނު ވިދާޅުވިއެވެ.

"ބާކީ މިއޮތް އެއް އަހަރުތެރޭގައި ވެސް މި ތަނަށް (އައްޑޫ) ފޯކަސްކޮށްފައި އުޅެގެންފިއްޔާ އަދިވެސް އަޅުގަނޑު ދަންނަވާނީ ސަރުކާރަށް ތާއީދު ހޯދޭނެ. ދެން އަޅުގަނޑަކަށް ނޭނގޭ ސަރުކާރުން އެކަން ކުރާނެ ކަމެއް." ނަޝީދު ވިދާޅުވި އެވެ.

ރައީސް ނަޝީދު މިފަދައިން ވިދާޅުވެފައިވާއިރު، ރައީސް ޞާލިޙް ވެސް މީގެ ކުރިން ވަނީ އައްޑޫގެ ތަރައްގީއަށް މި ސަރުކާރުން އިސްކަން ދެއްވާނެކަމަށް ވިދާޅުވެފައެވެ. އަދި މިހާތަނަށް އެއް އަތޮޅެއްގައި އެންމެ ގިނަ އަދި އެންމެބިޔަ މަޝްހޫރުއުތައް ހިންގާ އެއް އަތޮޅަކީ އައްޑޫކަން ސަރުކާރުން ފާހަގަކުރެއެވެ.