ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ބޭނުންވަނީ ރަށްރަށުގެ ކައުންސިލްތަކުގެ ބައިވެރިއެއްގެ ގޮތުގައި އޮންނަން ކަމަށް އެ ކުންފުނީގެ މެނޭޖިން ޑިރެކްޓަރ އަޙްމަދު ޝަރީފް ވިދާޅުވެއްޖެއެވެ.

އއ. އަދި އދ. އަތޮޅުގެ ރަށްރަށުގެ މަގުބައްތި ޖެހުމުގެ މަސައްކަތާ ސްޓެލްކޯއިން ހަވާލުވުމަށް ކައުންސިލްތަކާއެކު ފަހުމުނާމާގައި ސޮއި ކުރުމަށް މިއަދު ބޭއްވި ރަސްމިއްޔާތެއްގައި ވާހަކަ ދައްކަވަމުން ޝަރީފް ވިދާޅުވީ، ސްޓެލްކޯއަކީ ރައްޔިތުންނަށް ހިދުމަތް ކުރުމަށް އުފައްދާފައިވާ ކުންފުންޏެއް ކަމަށެވެ. އެހެންކަމުން އެ ކުންފުނީގެ އެންމެ އަސާސީ މަގުސަދަކީ ރާއްޖޭގެ ރައްޔިތުންނަށް ހިދުމަތް ކޮށްދިނުން ކަމަށެވެ.

އޭނާ ވިދާޅުވީ، ހާއްސަކޮށް ސްޓެލްކޯއިން ބޭނުންވަނީ، އަތޮޅުތެރޭގެ ރަށްރަށުގައި ކައުންސިލްތަކާއި ޖަމިއްޔާ ޖަމާއަތްތަކުން ކުރިއަށް ގެންދާ ކަންކަމުގައި އެ ފަރާތްތަކަށް ވާގިވެރިވެ އެ ފަރާތްތަކުގެ ބައިވެރިއެއްގެ ގޮތުގައި އޮތުމަށް ކަމަށެވެ.

"ރަށްރަށުގެ އިޖުތިމާއީ ކަންކަމުގައި ކައުންސިލްގެ ފަރާތުން ކުރައްވާ ކަންކަމުގައާއި އަދި އާންމު ރައްޔިތުން، ޖަމިއްޔާ ޖަމާއަތްތަކުން ކުރައްވާ ކަންކަމުގައި އަޅުގަނޑުމެން ސްޓެލްކޯއިން ބޭނުން ތިބޭފުޅުންގެ ބައިވެރިންގެ ގޮތުގައި އަޅުގަނޑުމެން ބަލައިގަންނަން." ޝަރީފް ވިދާޅުވިއެވެ.

ޝަރީފް ވިދާޅުވީ، ސްޓެލްކޯއިން މަސައްކަތާ ހަވާލު ވުމަށްފަހު އެރަށްރަށުގެ މަގުބައްތިތައް ހުންނާނީ ދިއްލިފައިކަމަށާ، ދަބަރުޖަހާފައި ހުންނަ މަގުބައްތިއެއް ދެން ނުފެންނާނެ ކަމަށެވެ. އަދި ކުންފުނީގެ ފުދުންތެރިކަން ހުރި މިންވަރަކުން ރަށްރަށުގައި އިޖުތިމާއީ ގޮތުން ކައުންސިލާއި ރައްޔިތުން ކުރާ ކަންކަމުގައި އެ ކުންފުނިން ބައިވެރިވާނެ ކަމަށް ވެސް އޭނާ ވިދާޅުވިއެވެ.

މިއަދު ސޮއި ކުރި ފަހުމްނާމާގެ ދަށުން، އެ އަތޮޅުތަކުގެ ރަށްތަކުގެ މަގުބައްތިތައް މަރާމާތުކޮށް ބެލެހެއްޓުމުގެ ހުރިހާ މަސައްކަތެއް ވެސް ކުރާނީ ސްޓެލްކޯއިންނެވެ.