މޯލްޑިވްސް ޙައްޖު ކޯޕަރޭޝަނުން ޙައްޖުދަތުރުގެ އެހީތެރިން ހޮވަނީ ޢާއްމުކޮށް އިޢުލާނުކޮށްގެން ކަމަށް މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު ޢަލީ ވިދާޅުވެއްޖެއެވެ.

މިއަދު ކުރިއަށްދިޔަ ރައްޔިތުންގެ މަޖިލީހުގެ ޖަލްސާގައި މާފަންނު މެދު ދާއިރާގެ މެމްބަރު އިބްރާހިމް ރަޝީދު ވަނީ، އިސްލާމިކް މިނިސްޓްރީގެ ތެރެއިން އަދާލަތު ޕާޓީއަށް ނުވަތަ ވަކިބަޔަކަށް ފުރުސަތު ދީގެން ހައްޖު ކޯޕަރޭޝަންގެ އެހީތެރިންގެ ގޮތުގައި އެމީހުން ހައްޖަށް ފޮނުވާފައިވާނެތޯ ސުވާލުކުރަށްވާފައެވެ.

މެންބަރުގެ ސުވާލަށް ލިޔުމުން ޖަވާބު ދެއްވަމުން މިނިސްޓަރ ވިދާޅުވެފައިވަނީ، ޙައްޖުދަތުރުގެ އެހީތެރިންގެ ގޮތުގައި މީހުން ހަމަޖައްސަނީ ހައްޖު ކޯޕަރޭޝަންގެ ހިއުމަން ރިސޯސް ޕޮލިސީއާއި އެއްގޮތަށް ކަމަށެވެ. އެގޮތުން 1433 ވަނަ އަހަރުވެސް އާންމުކޮށް އެކަމަށް ހުޅުވާލުމުން، ކުރިމަތިލި މީހުންނާއި އިންޓަވިއުކޮށް، އިންޓަވިއުއިން އެންމެ މަތީ ނަތީޖާ ހޯދި މީހުން އެކަމަށް ހޮވާފައިވާކަމަށް މިނިސްޓަރ ވިދާޅުވިއެވެ. އަދި މިނިސްޓްރީގެ އެދުމަށް މިނިސްޓްރީގެ އެއް މުވައްޒަފު ހައްޖު ދަތުރުގައި ބައިވެރިކޮށްފައިވާކަމަށްވެސް މިނިސްޓަރ ވިދާޅުވިއެވެ.

އޭގެ އިތުރުން 2022 ވަނަ އަހަރުގެ ހައްޖުވެރިންގެ ޕީސީއާރް ޓެސްޓް ހެދުމަށް މެޑިޕްލެކްސް ކުންފުންޏާ ޙަވާލުކުރީ ކީއްވެތޯ ސާފްކުރުމަށް މެންބަރު ކުރެއްވި ސުވާލުގެ ޖަވާބުގައި މިނިސްޓަރ ވިދާޅުވީ އެންމެ ކުޑަ އަގެއް ހުށަހެޅީ މެޑިފްލެކްސް ކުންފުނިންކަމަށެވެ.

އެގޮތުން އެކުންފުނިން ހުށަހެޅީ ބޮލަކަށް 200 ރުފިޔާކަމަށާއި އައިޖީއެމްއެޗުން ބޮލަކަށް 700 ރުފިޔާ ހުށައެޅިކަމަށް މިނިސްޓަރ ވިދާޅުވިއެވެ. އަދި މޯލްޑިވްސް ޕޮލިސް ސާރވިސްގައި ޓެސްޓް ހެދުމަށް ބޭނުންވާ ކެމިކަލް ނެތްކަމަށް ބުނެފައިވާކަމަށްވެސް މިނިސްޓަރ މިއަދު ލިޔުމުން ދެއްވި ޖަވާބުގައި ވިދާޅުވެފައިވެއެވެ.