ފިހިގަނޑަކުން ކުޑަ ކުއްޖެއްގެ ގައިގައި ތަޅައި އަނިޔާކުރި މީހަކަށް ކުށް ސާބިތެއްނުވާކަމަށް ކްރިމިނަލް ކޯޓުން ނިންމައިފިއެވެ.

ކްރިމިނަލް ކޯޓުން އިއްޔެ ކުރި ޙުކުމުގައި ބުނެފައިވަނީ 27 މާރިޗު 2018 ދުވަހުގެ ރޭގަނޑުގެ ވަގުތެއްގައި، ކުޑަކުއްޖާ ފެންވަރަން އުޅެނިކޮށް، ފިހިގަނޑަކުން ކުއްޖާގެ ގައިގައި ތަޅައި އަނިޔާކޮށްފައިވާތީއާއި އޭގެ ސަބަބުން ކުއްޖާއަށް އަނިޔާވެފައިވާތީ ދަފްތަރު ނަންބަރު ރސ 8905، އާމިނަތު ޙަސަންގެ މައްޗަށް އުފުލާފައިވާ ދަޢުވާ ސާބިތުނުވާ ކަމަށެވެ.

ޕީޖީ އޮފީހުން އެއަންހެންމީހާގެ މައްޗަށް ދަޢުވާކޮށްފައިވަނީ ދިވެހިރާއްޖޭގެ ޤާނޫނުލްޢުޤޫބާތުގެ ދަށުން ގައިގާ އަތްލުމުގެ ކުށުގެ ދަޢުވާއެވެ.

އެމައްސަލާގައި ކޯޓުން ޙުކުމް ކޮށްފައިވަނީ އާމިނަތު ޙަސަންގެ މައްޗަށް، ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއްނެތް މިންވަރަށް އެކުށް ޝަރީޢަތަށް ސާބިތުނުވާކަމަށެވެ.

މި މައްސަލައަކީ ކުޑަކުއްޖެއްގެ މަސްލަޙަތު ހިމެނޭ މައްސަލައެއްކަމަށް ވާތީ މުޅިމައްސަލައިގެ ވާޤިއާތަކާއި ހެކިތައް ހިމެނޭގޮތުން މައްސަލައިގެ ރިޕޯޓު ކްރިމިނަލް ކޯޓުން ޢާއްމުކޮށްފައެއް ނުވެއެވެ.