ވޯލްޑް ބޭންކާއި އައިއެމްއެފްގެ އަހަރީ ބައްދަލުވުމުގައި ބައިވެރިވެވަޑައިގަތުމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އެމެރިކާއަށް ފުރާވަޑައިގަތުމަށް ހަމަޖެހިފައިވާ ކަމަށް ރައްޔިތުންގެ މަޖިލީހުގެ އިދާރާއިން ހާމަކޮށްފިއެވެ.

މަޖިލީހުގެ އިދާރާއިން މިއަދު ބުނީ، ރައީސް މުޙައްމަދު ނަޝީދު ރަސްމީ ދަތުރުފުޅެއްގައި އެމެރިކާގެ ވޮޝިންގޓަނަށް މިއަދު ފުރާވަޑައިގަންނަވާނެ ކަމަށެވެ.

މއަދުން ފެށިގެން މިމަހުގެ 16 އަށް ރައީސް ނަޝީދު އެމެރިކާއަށް ކުރައްވާ މި ދަތުރުފުޅަކީ އންޓަރނޭޝަނލް މަނިޓަރީ ފަންޑް (އައިއެމްއެފް) އާއި ވަރލްޑް ބޭންކުގެ އަހަރީ ޖަލްސާއާއެކު ބާއްވާ ކްލައިމެޓް ވަލްނަރަބަލް 20 ޤައުމުގެ މާލީ ވަޒީރުންގެ ބައްދަލުވުމުގައި ބައިވެރިވެވަޑައިގަތުމަށް ކުރަށްވާ ދަތުރުފުޅެއްކަމަށް ރައްޔިތުންގެ މަޖިލީހުގެ އިދާރާއިން ހާމަކޮށްފައިވެއެވެ.

ރައްޔިތުންގެ މަޖިލީހުގެ ރައީސްގެ މި ދަތުރުފުޅުގައި އައިއެމްއެފް އާއި ވަރލްޑް ބޭންކް އަދި ސީވީއެފްގެ އިސްވެރިންނާ ބައްދަލު ކުރަށްވާނެ ކަމަށް މަޖިލީހުގެ އިދާރާއިން ބުނެފައިވެއެވެ.

ރައީސް ނަޝީދުގެ މިދަތުރުފުޅުގެ އެންމެހާ ކަންކަން ބަލަހައްޓާނީ ރައްޔިތުންގެ މަޖިލިހުގެ އިދާރާއިންނާއި ސީވީއެފްގެ އޮފީހުން ކަމަށްވެސް މަޖިލީހުގެ އިދާރާއިން މަޢުލޫމާތުދީފައިވެއެވެ.