28 ރަށެއްގައި ޤާއިމްކޮށްފައިވާ ޔޫތު އެންޑް ކޮމިއުނިޓީ ސެންޓަރުތަކަށް ބޭނުންވާ ބިލިއާޑް ބޯޑުތައް ޔޫތު މިނިސްޓްރީން ހަވާލުކޮށްފިއެވެ.

މި ސެންޓަރުތަކަށް ބޭނުންވާ ބިލިއާޑް ބޯޑުތައް ހަވާލުކޮށްފައިވަނީ އެކަމަށްޓަކައި މިއަދު މޯލްޑިވްސް ޕޫލް ބިލިއާޑް އެސޯސިއޭޝަންގައި ބޭއްވި ރަސްމިއްޔާތެއްގައެވެ. މިނިސްޓްރީގެ ފަރާތުން މި ބޯޑުތައް ހަވާލުކޮށްދެއްވީ މިނިސްޓަރ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަޙްލޫފްއެވެ. އަދި މި ރަށްތަކުގެ ފަރާތުން ބޯޑުތަކާއި ހަވާލުވެލެއްވީ މި ރަށްތަކުގެ ދާއިރާތަކަށް ނިސްބަތްވާ ރައްޔިތުންގެ މަޖިލީހުގެ މެމްބަރުންނެވެ.

މިއަދު ބިލިއާޑު ބޯޑު ހަވާލުކުރި ރަށްތަކަކީ، ހއ.ކެލާ، ހއ.މޮޅަދޫ، ހއ.ފިއްލަދޫ، ހއ.ދިއްދޫ، ހއ.ތަކަންދޫ، ށ.ކޮމަންޑޫ، ށ.ފޯކައިދޫ، ށ.މާއުނގޫދޫ، ނ.ކެނދިކުޅުދޫ، ރ.އުނގޫފާރު، ކ.މާފުށި، ހިންމަފުށި، އދ.ފެންފުށި، އދ.ދިއްދޫ، މ.މުލައް، މ.ދިއްގަރު، ފ.މަގޫދޫ، ތ.ތިމަރަފުށި، ތ.މަޑިފުށި، ލ.ގަން، ލ.މާބައިދޫ، ގއ.ވިލިނގިލި، ގއ.ކޮލަމާފުށި، ގއ.ދާންދޫ، ގދ.ހޯނޑެއްދޫ، ގދ.ތިނަދޫ، ގދ.މަޑަވެލި އަދި ސ.ހިތަދޫއެވެ. މީގެ އިތުރުން ހުޅުމާލެ ޔޫތު ސެންޓަރަށްވެސް މިނިސްޓްރީގެ ފަރާތުން ވަނީ ބިލިއާޑް ބޯޑެއް ހަވާލުކޮށްފައެވެ.

ބޯޑުތައް ހަވާލުކުރުމަށްފަހު ވާހަކަފުޅު ދައްކަވަމުން މިނިސްޓަރ އަޙުމަދު މަޙްލޫފް ވިދާޅުވީ، މިއީ ރާއްޖޭގެ ރަށްރަށުގައި މުނިފޫހި ފިލުވުމާއި، ކުޅިވަރު ކުޅުމަށްޓަކައި ފަހިކޮށްދެމުންދާ ފުރުސަތުގެ ތެރެއިން ކުރެވޭ ކަމެއް ކަމަށެވެ. އަދި ރަށްތަކުގެ ލިސްޓު އެކުލަވާލީ ޒުވާނުންގެ މަރުކަޒު ހުރި ރަށްރަށާއި، ބިލިއާޑް ބޯޑަށް ރިކުއެސްޓު ލިބިފައިވާ ރަށްރަށަށް ބަލައިގެން ކަމަށް މިނިސްޓަރ ވިދާޅުވިއެވެ.

ޔޫތު މިނިސްޓްރީން ބުނީ އެމިނިސްޓްރީން ގެންދަނީ ރަށްރަށަށް ބޭނުންވާ ކުޑަކުދިންގެ ޕާކު ސާމާނާއި، އައުޑް ޑޯ ޖިމްގެ ސާމާނު ވެސް ފޯރުކޮށްދެމުން ކަމަށެވެ.