މިސަރުކާރުން ވިހިހާސް ވަޒީފާ އުފައްދައިފި ކަމަށް ކުޅިވަރާބެހޭ ވަޒީރު އަޙްމަދު މަޙްލޫފު ވިދާޅުވެއްޖެއެވެ.

މަޙްލޫފް މިއަދު ވިދާޅުވީ މިސަރުކާރުން ޒުވާނުންނަށް ފަހިކޮށްދެމުންގެންދާ ފުރުސަތުތަކުގެ ސަބަބުން ވަރަށްބޮޑު ހިތްހަމަ ޖެހުމެއް ލިބޭ ކަމަށެވެ. މިސަރުކާރުން ވަނީ މީހުން ބިނާކުރުމަށް ހިންގާ އެޕްރެންޓިސްޝިޕް ޕްރޮގްރާމްގެ ދަށުން 3000 ޒުވާނުން ވަޒީފާތަކަށް ނެރޭނެ ކަމަށް ބުނެފައެވެ.

މަޙްލޫފް ވިދާޅުވީ، މި ސަރުކާރުން ޒުވާނުން ވަޒީފާތަކަށް އަހުލުވެރިކުުމަށް އެޕްރެންޓިސްޝިޕް ޕްރޮގްރާމްތަކެއް ކުރިޔަށް ގެންދާ ކަމަށާއި، ވަޒީފާގެ 20،000 ފުރުސަތު މި ސަރުކާރުން އުފައްދާފައިވާ ކަމަށެވެ. އަދި މިދިޔަ 3 އަހަރުގެ ތެރޭގައި 15000 ޒުވާނުން ހިލޭ ޑިގްރީއަށް ކިޔަވަމުންދާ ކަމަށާއި ހަމައެއާއެކު ވިޔަފާރީގެ ގިނަ ފުރުސަތުތަކެއްވެސް ސަރުކާރުން ފަހިކޮށްދެމުންގެންދާ ކަމަށްވެސް މަޙްލޫފް ވިދާޅުވިއެވެ.

"އެޕްރެންޓިސްޝިޕް ޕްރޮގްރާމް، 20000 އަށްވުރެ ގިނަ ވަޒީފާ، 15000 ދަރިވަރުންނަަށް ހިލޭ ޑިގްރީ، ކުޅިވަރުގެ ރަންޒަމާން، 474 މިލިއަން ރުފިޔާގެ އެސްއެމްއީ ލޯނު ފަދަ އެތައް ރައީސް ޞާލިޙްގެ ސަރުކާރުން ހާސިލްކޮށްދީފައިވާކަމީ ޤައުމީ ޒުވަަނުންގެ ދުވަސް ފާހަގަކުރާއިރު އޮތް ހިތްހަމަޖެހުމެއް." މަޙްލޫފް ވިދާޅުވިއެވެ.

މި ސަރުކާރު ވެރިކަމަށް އައިފަހުން ޒުވާނުންނާއި ގުޅުންހުރި ގިނަ މަސައްކަތްތަކެއް ދަނީ ކުރަމުންނެވެ. އެގޮތުން ބައިނަލް އަޤުވާމީ ގިނަ ކުޅިވަރު މުބާރާތްތަކެއްވެސް ރާއްޖޭގައި ވަނީ ބާއްވާފައެވެ.