އިންޑިއާ ސަރުކާރުގެ އިހުލާސްތެރިކަމެއް ހުރީވިއްޔާ، އެ ގައުމުގެ ހިލޭ އެހީގައި އައްޑޫގައި އިމާރާތް ކޮށްފައިވާ ޕޮލިސް އެކެޑެމީގެ ރަޖިސްޓްރީ ދިވެހީންނާއި ހަވާލު ކުރުމަށް ކުރީގެ ރައީސް ޔާމީން ޢަބުދުލް ޤައްޔޫމް އެދިވަޑައިގެންފި އެވެ.

ރިޔާސީ އިންތިހާބުގެ ކެމްޕޭނުގައި އައްޑޫއަށް މިހާރު ކުރައްވަމުން ގެންދަވާ ދަތުރުފުޅުގައި ހުޅުދޫ-މީދޫއަށް ވަޑައިގެން އެ ރަށުގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ކާރުގައި ވަޑައިގަންނަވާއިރު އެއްކޮޅުން އަނެއްކޮޅަށް ފެންނަނީ ވަރަށް ރީތި ބޮޑެތި އިމާރާތްތަކެއް ކަމަށެވެ. ނަމަވެސް، ރަނގަޅަށް ބައްލަވާލެއްވިއިރު އެއީ ސަރުކާރުން ކޮށްފައިވާ މަސައްކަތެއް ނޫން ކަމަށާއި އެއީ އިންޑިއާ ސިފައިން އައްޑޫގައި ތިބުމަށްޓަކައި ޕޮލިސް އެކެޑެމީގެ ނަމުގައި "ދަމާލާފައިވާ ބައްރެއް" ކަމަށެވެ.

ޔާމީން ވިދާޅުވީ އެވަރުގެ ބޮޑު އުމްރާނީ ތަރައްގީއެއް އައްޑޫ ސިޓީގެ އެހެން ތަނެއްގައި ނެތްކަމަށެވެ. އެހެންކަމުން މި ހިސާބުން މިއީ އައްޑޫގެ ރައްޔިތުން އެކަމާ ވިސްނަންޖެހިފައިވާ ކަމެއްކަމަށް ޔާމީން ވިދާޅުވިއެވެ.

"މިވަރުގެ މަސައްކަތެއް ކުރުމުގެ ބޭނުމަކީ މިތަނުގައި ތިބުން. ތިޔަ ޓްރޭންކުރާ ފުލުހުންތައް ޓްރޭން ކުރިނަމަވެސް، އަޅުގަނޑުމެންނާ މިހާރުވެސް އެ އިމާރާތްތައް ހަވާލު ކުރަންވީ. އިހުލާސްތެރިކަމެއް މި މަސައްކަތުގައި އިންޑިއާ ސަރުކާރުގައި އޮތްކަމަށް ވަންޏާ، ޞާލިޙްގެ ސަރުކާރުގައި އިހުލާސްތެރިކަމެއް އޮތްކަމަށް ވަންޏާ އަޅުގަނޑުމެންނާ އެބަޖެހޭ އެތަނުގެ ރަޖިސްޓްރީ ހަވާލު ކުރަން." ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވިއެވެ.

ޔާމީން ވިދާޅުވީ އެތަނުގެ ރަޖިސްޓްރީ ހަވާލުކުރީމާ އެތަނަށް އެމީހުން (އިންޑިއާ މީހުން) ވަންނާނީ ދިވެހީން އެ މީހުން އެތަނަށް ވެއްދުމުން ކަމަށާއި އެއަށްފަހު އެތަނުގައި ޓްރޭންކުރާނީ ދިވެހީން ދައްކާ ބައެއް ކަމަށެވެ.