ރައްޔިތުންގެ މަޖިލީހުގެ ބަޖެޓް ކޮމިޓީން ފާސްކޮށްފައިވާ، އަންނަ އަހަރަށް ލަފާކުރާ ދައުލަތުގެ ބަޖެޓަށް އިސްލާހު ހުށަހަޅަން މެންބަރުންނަށް 3 ދުވަހުގެ މުހުލަތެއް ދީފިއެވެ.

އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަަހަޅާފައިވާ ބަޖެޓަށް 160 މިލިއަން ރުފިޔާ އިތުރުކޮށް، މަޖިލީހުގެ ބަޖެޓް ދިރާސާ ކުރާ ކޮމެޓީން ބަޖެޓް މިހާރުވަނީ ފާސްކޮށްފައެވެ.

މަޖިލީހުގެ އިދާރާއިން މެންބަރުންނަށް މިއަދު އަންގާފައި ވަނީ ކުރިއަށް އޮތް ތިން ދުވަހުގެ ތެރޭގައި ބަޖެޓަށް ގެންނަން ބޭނުންވާ އިސްލާހެއް އޮތްނަމަ އަންނަ އަންގާރަ ދުވަހުގެ ހަވީރު 4ގެ ކުރިން މަޖިލީހުގެ އިދާރާއަށް ފޮނުއްވުމަށެވެ.

ބަޖެޓް ރިޕޯޓަށް ބަހުސް ކުރުމަށް ކޮންމެ މެންބަރަކަށް 7 މިނެޓް ދިނުމަށް ހަމަޖެހިފައިވާއިރު ބަޖެޓް ފާސްކުރުމަށް މިމަހުގެ 30 ވަނަ ދުވަހު މަޖިލީހުގެ ތަޅުމުގައި ވޯޓަށް އަހާނެއެވެ.

އަންނަ އަހަރަށް ލަފާކޮށް ފިނޭންސް މިނިސްޓްރީން މަޖިލީހަށް ހުށަހެޅީ 42.6 ބިލިއަން ރުފިޔާގެ ބަޖެޓެކެވެ. ރައްޔިތުންގެ މަޖިލީހުގެ ބަޖެޓް ދިރާސާކުރާ ކޮމިޓީން ބަޖެޓް ފާސްކުރީ ބަޖެޓަށް އިތުރު 160 މިލިއަން ރުފިޔާ އިތުރުކުރުމަށްފަހުއެވެ. އެހެންކަމުން އަންނަ އަހަރުގެ ބަޖެޓުގެ ޖުމްލަ އަދަދު 42.8 ބިލިއަން ރުފިޔާ އަށް ވަނީ އިތުރުވެފައެވެ.