ވެންޓިލޭޓަރުގެ ޚިޔާނާތުގެ މައްސަލައިގައި 3 މީހަކަށް ދަޢުވާކޮށްދިނުމަށް އެދި އެންޓި ކޮރަޕްޝަން ކޮމިޝަން، އޭސީސށން ޕްރޮސިކިއުޓަރ ޖެނެރަލްގެ އޮފީހަށް ފޮނުވައިފިއެވެ.

ކޮވިޑު19 އާއި ގުޅިގެން ހާލު ބޮޑުވާ މީހުންނަށް ވެންޓިލޭޓަރު ހޯދުމުގެ މައްސަލާގައި ކުރީގެ ހެލްތު މިނިސްޓަރު އަބްދުﷲ އަމީނާއެކު 11 މީހެއްގެ މައްޗަށް ދައުވާކޮށްދޭން މީގެކުރިން އޭސީސީން ހަތަރު ފަހަރެއްގެ މަތިން ޕީޖީ އޮފީހަށް ވަނީ ފޮނުވާފައެވެ. އެހެން ނަމަވެސް ތަހުގީގުގައި ބައެއް ކަންކަން ފުރިހަމަ ނުވާ ކަމަށް ބުނެ ޕީޖީން ވަނީ އެ މައްސަލަ އަލުން އޭސީސީއަށް ފޮނުވާފައެވެ.

ވެންޓިލޭޓަރތަކުގެ މައްސަލައިގައި ދަޢުވާކޮށްދިނުމަށް އެދި އޭސީސީން މިފަހަރު ޕީޖީ އޮފީހަށް ފޮނުވާފައިވަނީ މިނިސްޓަރ އޮފް ހެލްތުގެ ނައިބުކަމުގައި ކުރިން ހުންނެވި، ސ. ފޭދޫ ޕިންކް ހައުސް ޝިޔާމާ މުޙައްމަދާއި، ހެލްތު މިނިސްޓްރީގެ ޑިރެކްޓަރުކަމުގެ މަޤާމުގައި ކުރިން ހުންނެވި، ތ. ކިނބިދޫ ބޯގަންވިލާ، އަޙްމަދު އަސްލަމްގެ އިތުރުން އެމިނިސްޓްރީގެ ލީގަލް އޮފިސަރުގެ މަގާމުގައި ކުރިން ހުންނެވި، ލ. ގަން، ފެއަރީގާރޑެން ޢަލީ ޝިހާމްގެ މައްޗަށެވެ.

މި 3 މީހުންގެ މައްޗަށްވެސް ކުރުމަށް އެދިފައިވަނީ، ކޮރަޕްޝަން ހުއްޓުވުމާއި މަނާކުރުމުގެ ޤާނޫނުގެ 13 ވަނަ މާއްދާގެ ދަށުން، ދައުލަތަށް ފައިދާއެއް ލިބެން އޮތްކަމެއްގައި އެ ނޫންގޮތަކަށް ޢަމަލުކުރުމުގެ ކުށުގެ ދަޢުވާއެވެ. ހަމައެއާއެކު މި މައްސަލައިގައި ދައުލަތަށް ގެއްލުނު ތިރީސްއެއްމިލިއަން ފަންސާސްދެހާސް ފަންސަވީސް ރުފިޔާ އަނބުރާ ހޯދުމަށްވެސް ވަނީ އޭސީސީން ވަނީ އެދިފައެވެ.

ދުބާއީން ގެންނަން މަސައްކަތްކުރި 75 ވެންޓިލޭޓަރުގެ ތެރެއިން މިހާތަނަށް ލިބުނީ 15 ވެންޓިލޭޓަރެވެ. ވެންޓިލޭޓަރުތައް ގަންނަން ހަރަދު ކުރަން ނިންމާފައިވާ 34 މިލިއަން ރުފިޔާގެ ތެރެއިން އެޑްވާންސްގެ ގޮތުގައި ބޭންކު ގެރެންޓީއާ ނުލާ 30 މިލިއަން ރުފިޔާ ވަނީ އެގްޒެކިއުޓާސް ޖެނެރަލް ޓްރޭޑިން އަށް ދޫކޮށްފައި ކަމަށް އޮޑިޓް ރިޕޯޓުން ވަނީ ހާމަވެފައެވެ.

ވެންޓިލޭޓަރު ގަތުމަށް އެގްޒެކިއުޓާސްއާއެކު ހެލްތު މިނިސްޓްރީން ވެފައިވާ އެއްބަސްވުމާ އެއްގޮތަށް ތަކެތި ލިބިފައި ނުވާތީ އެއްބަސްވުން ސަރުކާރުން މިހާރު ވަނީ ބާތިލްކޮށް އެމައްސަލަ އާބިޓްރޭޝަނަށް ހުށައެޅުމަށް ނިންމާފައެވެ.