ގދ. ފަރެސްމާތޮޑާ އެއަރޕޯޓް ހުޅުވުމާއެކު ހުވަދޫގެ އިޤްތިޞާދަށް ބޮޑު ކުރިއެރުމެއް އަންނާނެ ކަމަށް ޓްރާންސްޕޯޓް މިނިސްޓްރީގެ ނައިބު ސައުދުﷲ އަހްމަދު ވިދާޅުވެއްޖެއެވެ.

ފަރެސްމާތޮޑާ އެއަރޕޯޓަކީ ގދ. ގެ އިޤްތިޞާދީ ނާރެހުގެ ގޮތުގައި ސިފަކުރަށްވަމުން ސަޢުދު މިއަދު ވިދާޅުވީ އެއަރޕޯޓް ނިމުމުން ފަހިވެގެންދާ އިޤްތިޞާދީ ފުރުސަތުތަކާއެކު ހުވަދޫގެ އިޤްތިޞާދަށް ބޮޑު ކުރިއެރުމެއް އަންނާނެކަމަށެވެ.

އެގޮތުން ހުވަދޫގައި ކުދި އަދި މެދު ފަންތީގެ ވިޔަފާރިތައް ފުޅާވުމާއި ވަޒީފާގެ ބާޒާރު ހުޅުވިގެންދާނީ އެއަރޕޯޓާއެކު ކަމަށް ސަޢުދު ވިދާޅުވިއެވެ.

“ކުދި އަދި މެދު ފަންތީގެ ވިޔަފާރިތަކާއި މި ދާއިރާގައި އަލަށް ފުޅާވަމުން އަންނަ ގެސްޓްހައުސް ވިޔަފާރިއަށް ބޮޑެތި ފަސޭހަތަކާއި ކުރިއެރުންލިބި ވަޒީފާގެ މާކެޓް ބޮޑުތަނުން އިތުރުވެގެންދާނެ.” ސަޢުދު ވިދާޅުވިއެވެ.

Faresmaathodaa airport hulhuvumaai ekee Gdh iguthisaadh ah bodethi kuri erun libigendhaane.Kudhi adhi medhu fanthee viyafaari thakaai,midhaairaage alah fulhaavamun anna guest house viyafaari bodethi faseyhathakaai kuri erun libi vaxeefaage market boduthanun ithuruvegen dhaane.

— Saudulla Ahmed (@saudullaahmed1) February 5, 2023

ސަޢުދު މިމޭރުމުން ވިދާޅުވެފައިވާއިރު ފަރެސްމާތޮޑާ އެއަރޕޯޓު އަންނަ މާރޗް މަހުގެ 15 ގައި ރަސްމީކޮށް ހުޅުވައި ޚިދުމަތްދޭން ފެށުމަށް ސަރުކާރުން ވަނީ ނިންމާފައެވެ.

ރައީސް އިބްރާހިމް މުޙައްމަދު ޞާލިޙް ރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް ވަޑައިގަތުމަށް ކުރެއްވެވި މަސައްކަތްޕުޅުގައި އެންމެ ބޮޑަށް ރައްޔިތުންނަށް ވެވަޑައިގެންނެވި އެއްވަޢުދަކީ ކޮންމެ 20 މިނެޓަކުން ދަތުރުކުރެވޭ ހިސާބުގައި އެއަރޕޯޓެއް ތަރައްޤީ ކުރެއްވުމެވެ. އެގޮތުން ގދ. ފަރެސްމާތޮޑާ އެއަރޕޯޓް ހެދުމުގެ މަޝްރޫއުގެ މަސައްކަތް ސަރުކާރުން ހަވާލުކޮށްފައިވަނީ އެމްޓީސީސީއާއެވެ.