އައްޑޫ ސިޓީ ގަން އިންޓަނޭޝަނަލް އެއަރޕޯރޓް ތަރައްޤީކުރުމުގެ މަސައްކަތް އިންޑިއާގެ ކޮންސްޓްރަކްޝަން ކުންފުނި، ރެނާޓަސްއާ ހަވާލުކުރަން ނިންމައިފި އެވެ.

އިކޮނޮމިކް މިނިސްޓްރީން މީގެކުރިން ބުނެފައިވަނީ ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުގެ ބީލަން ކާމިޔާބު ކުރި ފަރާތަށް އެކަން އަންގާ "ނޮޓިފިކޭޝަން އޮފް އިންޓެންޝަން ޓު އެވޯޑް" ޙަވާލުކޮށްފައިވާކަމަށެވެ. އެ މަސައްކަތް އިންޑިއާގެ ރެނާޓަސްއާ ހަވާލުކުރަން ނިންމިކަން އިއުލާނުކުރެއްވީ ގަން އެއާޕޯޓަށް 80 އަހަރު ފުރުން ފާހަގަކުރުމަށް މިއަދު ބޭއްވި ހަފްލާގައި އެ އެއާޕޯޓު ހިންގާ ކުންފުނީގެ ޗެއާމަން އަޒާން އަހުމަދު ޒުހައިރުއެވެ.

މިއަދުގެ ރަސްމިއްޔާތުގައި އަޒާން ވިދާޅުވީ، މި މަޝްރޫޢުގެ ދަށުން އެއަރޕޯޓުގެ ޓާމިނަލް އަހަރަކު 1.5 މިލިއަން ފަސިންޖަރުންނަށް ޚިދުމަތްދެވޭވަރަށް ބޮޑުކުރެވޭނެ ކަމަށެވެ. އޭގެ އިތުރުން ޗެކިން ކައުންޓަރުތައް 18 ކައުންޓަރަށް އިތުރުކުރެވޭނެ ކަމަށްވެސް އަޒާން ވިދާޅުވިއެވެ.

އައްޑޫ އިންޓަނޭޝަނަލް އެއާޕޯޓް ތަރައްގީކުރުމުގެ މަސައްކަތް ކުރިއަށް ގެންދަނީ އިންޑިއާގެ އެގްޒިމް ބޭންކްގެ ލައިން އޮފް ކްރެޑިޓްގެ ދަށުން 17 މިލިއަން ޑޮލަރު (272.2 މިލިއަން ރުފިޔާ) ޚަރަދު ކޮށްގެނެވެ.

އެއަރޕޯޓް ތަރައްޤީކުރުމަށް ކުރިއަށްގެންދާ މަޝްރޫޢުގެ ދަށުން އެއަރޕޯޓްގެ ޓަރމިނަލް އެންމެ ޒަމާނީ ވަޞީލަތްތަކާއެކު ތަރައްޤީކުރުމަށްވަނީ ހަމަޖެހިފައެވެ. އަދި އެއަރޕޯޓްގެ މަސައްކަތް ނިމިގެންދާއިރު ޑިއުޓީ ފްރީ ފިހާރަތަކާއި، ރެސްޓޯރެންޓްތަކާއި ލައުންޖް ވަޞީލަތްތައްވެސް ތަރައްޤީވެފައި ހުންނާނެކަމަށް ސަރުކާރުން ހާމަކޮށްފައިވެއެވެ.

ސަރުކަރުން ބުނީ ގަން އިންޓަރނޭޝަނަލް އެއަރޕޯޓަކީ މުޅި ރާއްޖޭގެ ތަރައްޤީގައި އައްޑޫސިޓީގެ ދައުރު ފުޅާކޮށްދިނުމަށް މަގުފަހިކޮށްދޭނެ މުހިންމު މަޝްރޫޢެއް ކަމަށެވެ.

ރެނާޓަސް އަކީ ރާއްޖޭގަައި މީގެކުރިންވެސް ކޮންސްޓްރަކްޝަން މަޝްރޫއުތައް ހިންގާފައިވާ ކުންފުންޏެކެވެ. އެގޮތުން އެ ކުންފުނިން ވަނީ ހުޅުމާލޭގައި 'ރެނާޓަސް އިތާ މުތް' ފްލެޓް އިމާރާތް ކޮށްފައެވެ. އަދި ހުޅުމާލޭ ދެވަނަ ފިޔަވަހީގައި ވެސް އެކުންފުނިން ދަނީ ފްލެޓް އިމާރާތެއްގެ މަސައްކަތް ކުރަމުންނެވެ.